Удмурт филармония усьтӥз 80-тӥ сезонзэ

Удмурт Дунне
By Удмурт Дунне Сентябрь 22, 2017 15:18

Филармония возьма учкисьёссэ но кылзӥсьёссэ.

Таиз сезон учкисьёслы но кылзӥсьёслы трос кузьымъёс дасяз, озьы филармония аслэсьтыз котырес лыдпуссэ пусъёз. Кыӵеесь соос?

Оглом вераса, филармонилэн сӥзьыл вакытэз туж узыр луоз, солэн сцена вылаз котьку сямен концерт сётозы дуннелы тодмо артистъёс. Кылсярысь, 9-тӥ коньывуонэ вордскем палъёсаз шудоз тодмо пианистка Ася Корепанова.

1-тӥ-6-тӥ шуркынмонэ ортчоз «80 ар. Улэп крезьгур гинэ» фестиваль. 6 нунал ӵоже кылзӥсьёслэсь пельёссэс кӧялозы-вӧялозы тодмо крезьгурчиослэн но кырӟасьёслэн гуръёссы. Соосты быдэстозы Россиысь тодмо артист Даниил Крамер, Борис Андрианов, Нина Шацкая, Америкаысь Рита Эдмонд, озьы ик удмурт филармониысь коллективъёс но артистъёс.

Нош 4-тӥ шуркынмонэ филармония уйинозь ужалоз.

— Та нуналэ котькуд учкись быгатоз филармоние экскурсие лыктыны, учкыны, кызьы коллективъёс концертъёслы дасясько, озьы ик быгатоз дӥсяны трико но «Италмас» ансамбльлэн залаз эктыны, ассэ артистэн шӧдыны, — вера филармонилэн кивалтӥсез Алексей Фомин.

4-тӥ шуркынмонэ концерт кутскоз 21.00 часын — огшоры нуналъёсы учкисьёс филармоние 19.00 часын вуыло. Концерт возьматоз Москваысь Marimba Plus Duo дуэт — маримба крезьгуро инструментэн шудоз Лев Слепнер, кырӟалоз Татьяны Шишкова.

30-тӥ шуркынмонэ ӧсъёссэ усьтоз мукетыз фестиваль — «IzhJazzFest’17». 4-тӥ толсурозь Удмуртиысь калыкез шулдыртозы пӧртэм артистъёс — Денис Мажуков, Андреа Манзони, Вадим Эйленкриг и Антон Баронин, нош Ижысь технической университетысь Биг-Бэнд пумиськоз Новосибирскысь технической университетысь группаен. Соос огъя концерт сётозы.

— Ми малпамы та группаосты одӥг сцена вылэ поттыны, озьы кылдоз студентъёслэн оркестрзылэн шулдыръяськон ӝытсы, — вера филармонилэн кивалтӥсез Алексей Фомин. — Озьы ик «Чайковскийлэн дор палъёсаз» фестиваль но туэ мукет сяменгес ортчоз: 2 толэзь интые фестиваль 2 арня кыстӥськоз. Дуннелы тодмо кизилиос концертъёссэс сётозы Ижын, Воткинскын но Сарапулын.

Мария Иванова

Удмурт Дунне
By Удмурт Дунне Сентябрь 22, 2017 15:18