«Удмурт дунне» ортчытэ Кедра Митрейлы сӥзем ужрад

Удмурт Дунне
By Удмурт Дунне Сентябрь 20, 2017 10:50

28-тӥ куарусёнэ проектъёсъя «Лифт» юртын ортчоз Кедра Митрейлы сӥзем лекция. Сое лыдӟозы егит тодосчи Лариса Дмитриева но кылосбур наукаосъя кандидат Александр Шкляев. Кутсконэз 18.00 часын.

Туэ 29-тӥ куарусёнэ Кедра Митрей писательлэн вордскемез дырысен  125 ар тырме. Соин сэрен «Удмурт дунне» газет но Йӧскалык библиотека радъяло лекция.  Со сӥземын луоз Эгра палъёсысь писательлэн творчествоезлы но улэм-вылэмезлы. Вераны кулэ, та пумиськонэн выльысен ужзэ мытоз «Удмурт дунне» газет бордын ужась «Ингож» студия.

Егит тодосчи Лариса Дмитриева эскере Кедра Митрейлэсь «Дитя больного века»  автобиографической повестьсэ, солы сӥзьыса, гожтӥз диссертация. Та пумиськонын аслэсьтыз темазэ тодосчи тазьы пусъе: «Кедра Митрей 1907-тӥ–1917-тӥ аръёсы: писательлэсь биографизэ кылдытон».  Со сяна, тунсыко, гожтӥз-а Кедра Митрей та произведенизэ, яке… Таӵе юан  Лариса Дмитриева лыдӟисьёс азе пуктэ «Ингож» газетлэн берпуметӥ номераз. 

Со сяна, ӵашъем нимъёсты шара поттэ но соослэсь творчествозэс эскере мукетыз тодосчи — Александр Шкляев. «Кедра Митреез выль сямен учкон» — тазьы нимаз со аслэьстыз вераськонзэ. Александр Григорьевич дунъялоз Лариса Дмитриевалэсь эскерон ужзэ. Со сяна, тодосчи Кедра Митрейлэн творчествоез пумысен ватэм юанъёсты кыре-буре поттоз на.

Витиськом вань мылкыд карисьёсты 28-тӥ куарусёнэ  «Лифт» юртын (Пушкинская урам, 216-тӥ юрт) 18.00 часын.

Мария Векшина

Удмурт Дунне
By Удмурт Дунне Сентябрь 20, 2017 10:50