Сюлэм висёнъёсын сэрен арлы быдэ Россиын 17 миллион адями быре

Удмурт Дунне
By Удмурт Дунне Сентябрь 22, 2017 13:30

Дышетскыны, ужаны — велосипедэн.

 Сентябре Ӝог юрттэт сётонлы но Сюлэмлы сӥзем нуналъёсты пусйиськомы. Сюлэм висёнъёсын сэрен арлы быдэ Россиын 17 миллион адями быре. Дыраз юрттэт сётымтэен, 1 миллион котыр мурт кулэ.

Шаерысьтымы эмъян удысысь кивалтӥсьёс котырес ӝӧк сьӧры люкась-кылӥзы, шугъяськытӥсь ужпумъёсты ӵошен шараязы. Ӝог юрттэт сётонъя станциысь валтӥсь врач Олег Прузан кунгожсьӧръёслэсь адӟем карыны куриз. Отын нырысетӥ юрттэт сётонъя дышетонъёс, нылпи садысен кутскыса, школаын но университетын азинтӥсько.

— Асьме дорын таӵе урокъёс школаосын бадӟым классъёсын гинэ мыно. Со тырмыт ӧвӧл. Нуналысь нуналэ адӟиськомы: калыклэн тазалык сярысь тодон-валанъёсыз начаресь. Тросэз уг валало, мар кароно, адями йырсазьзэ ыштыку, пыдзэ чигтыку, вирыз кошкыку… Уноез тодо сое гинэ: пӧсьвуаськыку кезьыт ву юрттэ.

Сюлмаськытэ мукетыз но: куд-ог адӟисьёс, тодон-валанъёссы вань ке но, юрттыны уг дырто, «скороез» витём, шуо. Малпало: вӧсь луэм адямилы шонертэм юрттэт сётӥзы ке, кыл кутон улэ сюрозы. Янгышало. Туннэ нуналозь 1 адями вылэ но сыӵе уж ӝутэмын ӧй вал на.

Эмъясьёс ӵекто калык пӧлын валэктон ужез паськытгес радъяны. Полицейскойёс, спасательёс но водительёс ӝог юрттэт сётонлы сӥзем курсъёс пыр пото. Таӵе ик дышетонъёс мукет ужасьёслы но ортчытъяно вылэм. Дуннеысь тазалыкез утёнъя огазеяськонлэн эскеронъёсыз сюлмаськыто: бырон учыръёс пӧлысь 10 процентэз герӟаськемын шуккиськонъёсын но сутсконъёсын. Та лыдпус арысь аре будэ. «Скорой» вуытозь, ичизэ ог 20 минут кошке. Шуге-леке шедемъёслы адӟисьёс та дыр куспын мед юрттысалзы.

— Курсъёсты шумпотыса радъяломы. Со понна кивалтӥсьёслы дӥнямы запрос келяно. Ужасьёсмы — 112 врач но 232 фельдшер — тыро-пыдо вералозы но возьматозы, кызьы улонэз утёно, — веранзэ йылпумъяз Олег Прузан.

Ольга Корепанова

Туспуктӥз А. Горбунов

Удмурт Дунне
By Удмурт Дунне Сентябрь 22, 2017 13:30