«Шундыкар» лагерьлы — 25 ар!

Удмурт Дунне
By Удмурт Дунне Сентябрь 1, 2017 10:47

Таяз арняе йылпумъяськиз усточи нылпиослы «Шундыкар» лагерь. Туэ со пусйиз азвесь арлыдзэ — 25 арессэ! Отчы вуылӥзы 95 пиналъёс, соос дышетскизы 10 ӧръёсъя.

Журналистика, видеоискусство, суредаськон, театр, дӥськут дизайн… Котькудзэ отрядэз дышето нимо-дано егит адямиос. Кылсярысь, вуоно журналистъёсты дасяз тележурналист Вероника Ваулина, нош литераторъёсты — кылбурчи Богдан Анфиногенов.  Вашкала сямен крезь но кубыз лэсьтыны пиналъёсты дышетӥз Василий Широбоков. Озьыен, лагерьын туала удмурт улон гинэ уг кылдыто, вашкалазэ но улӟыто.

— Отрядам вал 6 адями, 2-ез лэсьтӥзы кубыз, 4-ез — крезь, — вера Василий Широбоков. — Пиналъёслэн ужамзыя ужамзы потӥз. Смена пумын асьсэос курисько вал ни сое я тае лэсьтыны. Отбой бере но шумпотыса ужазы — умгес вуттӥське вал.

Вылӥ модалы матын луизы дизайнеръёслэн ужъёссы. 8 нылъёс 9 нунал куспын вуризы быдэс коллекция. Киын.

— Мон азьын сылэ вал ужпум: усьтыны нылпиосты, угось соос, тросэз кадь ик, дышемын шаблонъёсъя малпаськыны, — вера отрядлэн дышетӥсез Полина Кубиста. — Ми вуримы «от кутюр» дӥськут бичет, сое огшоры улонын уд нуллы. Валтӥсь интыын — малпан, собере ини — техника. Но, жаляса верано, одӥг арня таӵе лагерь понна туж ӧжыт. Нылпиос ог-огзы борды дышыса гинэ вуо, нош тани — люкиськоно ни.

Полина Кубисталэн мылкыдыз уртче, пиналъёсын ужаны капчи вал, шуэ, уго соос туж тыршисесь но мыло-кыдоесь.

«Шундыкарлы» 25 ар тырмемен валче тунсыко ужрадъёс ортчылӥзы. Уно аръёс ортчыса, лагере выльысен вуизы азьвыл пиналъёс, нош али — тодмо адямиос: «Удмурт Кенеш» огазеяськонлэн тӧроез Татьяна Ишматова, «Удмуртия» ГТРК-ысь журналист Валерий Сидоров, горд сюен вырись Вера Степанова. Вожатойёс куспын нюръяськон вал. Бусыын пумиськизы азьвыл, али но вуоно вожатойёс. Уно ужрадъёс пӧлын — модая театр, «Кык кизилиос», «Модный приговор» но мукет. Тунсыко вал, куке вожатойёс возьматӥзы удмурт субкультураосты: хиппи, рок но мукет.

— Берпуметӥ нуналаз тужгес устоосыз зарнивуам «оскаръёсын» пусъемын вал, — вера «Шунды» огазеяськонлэн тӧроез Алина Чернова. — Тужгес устоез отряд луиз крезьгурчиослэн но крезь лэсьтӥсьёслэн огъя отрядзы, ӧнерчи — суредаськись Чудья Жени, тужгес мыло-кыдо пинал —  Пичи Пурга ёросысь Арлан гуртысь арганчи Данил Ефимов, вожатой — Кирилл Кириллов.

25 ар куспын мар гинэ ӧй вал ни, но «Шундыкар» лагерь котьку ӝуатэ пиналъёсты, усьтэ соослэсь быгатонлыкъёссэс. Таиз ар но пӧртэм ӧй вал. Туала удмурт культуралэн азьланез ӵапак та нылпиос киын. Адӟом, кыӵе шӧмо со луоз.

Мария Векшина

Туспуктэмъёс: vk.com («Шунды»)

Тросгес туспуктэмъёс татын.

 

Удмурт Дунне
By Удмурт Дунне Сентябрь 1, 2017 10:47