«Шӧкыч» сэрег пусъе вордӥськем нуналзэ

Удмурт Дунне
By Удмурт Дунне Сентябрь 20, 2017 15:38

13-тӥ октябре, пятницае —  ӵапак та пӧртмаськон нуналэ «Шӧкыч» уром ваньдэсты аслэсьтыз вордӥськем нуналзэ  пусйыны ӧте! Эгра ёросысь Сэп гуртысь Лӧптэм табань нюкын 15 часын маскаръяськон ужрад усьтӥськоз.

Куное ӧтемын  гуртысь маскарчиос: Лӧпшо Педунь, Якшур-Бӧдьялась  ури-бериос — Зина но Лиза,  Пичи Пургалась Ури-бери Орина, Лопок Надёк, Орел Галя, Захар Гали, Шарканысь Врач (Петр Вахрушев), Микол Орина, Николай Трубачев но мукетъёс…

Ог-огенымым тодматском, супыльтом, серекъялом. Гуртысь маскарчиос тӥледлы  пелейӧтонъёссэс лыдӟозы, шудозы-шулдыртозы, кырӟаса но лэзёзы, нош Сэп гуртысь эшъёсмы лӧптэм табаненызы утялтозы! Нош мон тӥледлы аслэсьтым карме возьмато!  Тамында улыса-вылыса, ялан редакцилэн сэргаз ӝиптӥськыса улӥ, нош табере тани Сэпысь лыдӟисьёсы мыным  нимысьтыз  патер – кар – кузьманы медо!

Мынам аслам но кузьыме дась – вордскем нуналэлы сӥзьыса,  маскарчи авторъёсмылэн серемес веросъёсынызы «Шӧкычлэн песьтэрез» книга  поттӥ! Сценкаос но юморескаос,  серемес учыръёс но такмакъёс – ух, шулдыр, аслым кельше! Тӥляд сое ӝоггес лыдӟемды потэ ни?  Соку лыктэ куное Сэп гуртэ! Маскараослы кузьмало,  коштанъёслы  — дунтэм дунын вузало! Мар-о, бурдъёстэс сузяды?  Соку лобим!

ШӦКЫЧ УРОМ

Афишаез лэсьтӥз Вера Штыкова

Удмурт Дунне
By Удмурт Дунне Сентябрь 20, 2017 15:38