Потозы на-а газетъёс, кӧня ке ар ортчыса?

Удмурт Дунне
By Удмурт Дунне Сентябрь 27, 2017 15:10

Нош телевизорез учкисьёс луозы на-а? Иворез пӧртэм сямен вӧлмытон, сое азинтон сярысь трос вераськизы быдэс Россиысь егитъёс «Таврида» форумын.

Газетъёс бырозы шуыса, дасо аръёс талэсь азьло но вераськизы ни.

Газетъёс бырозы шуыса, дасо аръёс талэсь азьло но вераськизы ни. Соку котькудӥзлэн телефонэз, компьютерез кылдӥз уго. Тросэз зымизы Интернет дуннее, ивор отысь утчаны кутскизы. Со улонмес трос поллы каньылгес кариз: кытӥ ке ветлытозь, юанъёслы валэктонъёсты, вӧзад кылдӥсь югдурез тодыны луиз ини, кӧня ке кнопкае зӥбылыса гинэ.

— Ми 10 ар пала газетъёсыз гуэ ватӥськом ини, нош соос ялан улэпесь, — шуэ «Россия-24» каналлэн валтӥсь редакторез Евгений Бекасов.

— Мон газетэз киям ӧй кутылы, дыр… ноку, — серекъя Sputnik но RT каналъёслэн валтӥсь редакторзы Маргарита Симоньян. — Мон лыдӟисько социальной вотэсъёсты, асьме иворъёсмес но конкурентъёсмылэсь иворъёссэс. Интернетын 100 пала ивор вӧлмытӥсьёслы гожтӥськемын. Но вераме потэ тани мае: мон туннэ лыктӥ «Тавридае» чебер машинаен. Сюрес вылтӥ милемын огвакытэ ширтӥзы трос пӧртэм мукет машинаос, автобусъёс но… уробоен вал. Ноку номыр мылес ӧвӧл.

— Нош мон малпасько, газетъёс бырозы, — шуэ «News Media» медиахолдинглэн редакционной директорезлэн нырысетӥ воштӥсез Анатолий Сулейманов. — Ма, мар газетэз гинэ, сайтъёсыз но лыдӟемысь дугдозы. Али ик калык шергес но шергес вотэс бамъёсы пыра ни. Малы отчы пыралод, иворез лыдӟыны луэ ке социальной сетьёсысь? Сайтъёсты интые калык тросгес лыдӟе ни блогъёсты. Милемлы блогеръёсын яке эшъяськоно, яке ӵошатсконо.

— Мон соглаш ӧвӧл, газетэз лыдӟисьёс уз кыле ни шуыса, — вера «Комсомольская правда» газетлэн редакторезлэн воштӥсез Олеся Носова. — Ми реклама чотын улӥськом. Газетмес лыдӟисьёс ӧз луысалзы ке, реклама сётӥсьёс но бырысалзы. Нош милям тиражмы арысь аре будэ. Бен, мар веранэз ини: лыдӟисьёслэн куронъёссы воштӥсько, ми соосъя кариськиськом.

— Соиз зэм, — итӥське Анатолий Сулейманов. — Калыклы тунсыко ке лыдӟыны О.льга Бузовалэн сюанэз сярысь, малы ми со сярысь ум ивортэ? Нялтас вераса, Бузовалэсь Инстаграмзэ учке 10 миллионлэсь уно мурт. Кин эшшо сомында лыдӟисьёсыныз ушъяськыны быгатэ на? Туж ӧжытэз! Тунсыко ӧй луысал ке, гожтӥськисьёсыз но бырысалзы. Ми быгатысалмы рос-прос, «визьмо» иворъёс гинэ лэсьтыны, но куро бере огшоры иворъёсты но, сооссэ но дасяськом.

— Озьы ке но аудитория сьӧры гинэ мыныны уг луы, — шуэ Евгений Бекасов. — Кизилиос но соослэн коӵышъёссы сярысь иворъёс пӧлы политика, экономика сярысь но пыртано.

— Ми иворъёсмес лыдӟон пумысен 3 рейтинг дасяськом: тужгес трос пыранъёсъя, тужгес кема лыдӟемъя но кӧня ке пол одӥг иворез учконъя, — шуэ Олеся Носова. — Нырысетӥяз вормо кизилиослэн улонысьтызы выллем иворъёс, кыкетӥяз — политика но экономика удысъёсысь, куинетӥяз — пӧртэм статистика. Но вератэк уг луы тазэ но: азьвыл лыдӟисьёслы тырмыт вал текст, нош табере соос возьмало ни видеотрансляция, субтитръёсын видео. Та курон тужгес зол шӧдӥськиз туэ.

— Кузь, малпаськытӥсь ивор кулэ ӧвӧл ни, — шуэ Маргарита Симоньян. — Тунсыкогес но капчигес лыдӟыны вакчиоссэ. Но лыдӟисьёс ӧжытгес но ӧжытгес оско журналистъёслы. Азьвыл кинэ ке оскытон вылысь шуо вал: мон со сярысь лыдӟи газетысь! Оскытон понна со тырмыт вал. Малы иворъёслы оскон быре? Одӥгез муг — соослэсь шонерзэс эскерыны журналистъёслэн дырзы ӧвӧл, соин пӧяськонъёс луо. Кылсярысь, туэ вӧлмиз ивор Светлана Алексиевичлэн кулэмез сярысь. Со сярысь Твиттерысь бамаз нырысь ик гожтӥз Францилэн культурая министрез. Вань СМИ-ос иворез гожтӥзы, нош собере ваньзы чаляк ӵушылӥзы. Эскерысалзы ке, шонер-а со ивор, трос дыр ортчысал: герӟаськоно француз министрен, со ӝог гинэ валэктон ӧз ыстысал. Со дыр ӵоже ивор вужмысал. Профессионалъёс озьы уг ужало.

— Ивор дасякуды, тӥ сое яратыса лэсьтыны кулэ, сюлэмдэс поныса. Ӟеч-а со, урод-а — тӥ бордысь потэ, кызьы со шоры учкоз калык, — шуэ Евгений Бекасов. — Соин ичигес малпаське, газетты яке сайтты быроз меда шуыса. Ӟечгес лэсьтэ уждэс. Улонэз лэсьтӥськом асьмеос.

Елена Рябина

Удмурт Дунне
By Удмурт Дунне Сентябрь 27, 2017 15:10