Олег Поскрёбышевен люкам книгаос вуизы Йӧскалык библиотекае

Удмурт Дунне
By Удмурт Дунне Сентябрь 1, 2017 13:34

Удмуртиысь калык кылбурчилэн Олег Поскрёбышевлэн ӵыжы-выжыосыз солэсь люкам книгаоссэ Национальной библиотекалы кузьмазы. 

Олег Поскрёбышев дораз бадӟым библиотека  люкам.

Удмуртиысь ӟуч кылбурчи но публицист Олег Поскрёбышев вордӥськемын 1930-тӥ арын 10-тӥ июле Кез ёросысь Бани гуртын. Кылбуръёсаз со данъя Удмурт шаерысь чебер инкуазез, калыкез. Тросэз ужъёсыз удмурт, украин, коми, немец но мукет кылъёсы берыктылэмын. Огъя 27 книгаез печатламын.

Олег Поскрёбышев дораз бадӟым библиотека  люкам. Сое тус-тас каронлэсь утён понна но лыдӟись доры вуттон вылысь, О. Поскрёбышевлэн кузпалыз Зоя Ивановна  но 2 нылъёсыз книгаоссэ Национальной библиотекалы кузьмазы.

Библиотекаын ужась Надежда Пронина верамъя, кылбурчи 50 арлэсь кемагес люкам та книгаоссэ. Соос пӧлын трос Удмурт шаерысь чеберлыко литература, озьы ик Россиысь калыкъёслэн поэзизы но прозазы, кунгож сьӧрысь авторъёслэн ужъёссы, литературоведческой книгаос но мукет. Уката но трос кылбур бичетъёс, кылсярысь, А. Пушкинлэн, Ю. Лермонтовлэн.

оглом 1000-лэсь ятыр книгаос вуизы фондазы. Соос пӧлысь 200-лэсь тросаз книгаосын вань авторъёслэн кинюртэмзы но Олег Поскрёбышевлы ӟеч кылъёссы, кылсярысь, Сергей Викулов, Лев Ошанин, Флор Васильев кылбурчиослэн. О. Поскрёбышевлэн библиотекаез Национальной библиотекалэн фондаз нимаз коллекция сямен интыямын луоз.

Наталия Самсонова

Туспуктэм:  unatlib.ru

 

 

 

 

Удмурт Дунне
By Удмурт Дунне Сентябрь 1, 2017 13:34