Мынозы пыкъям школае

Удмурт Дунне
By Удмурт Дунне Сентябрь 1, 2017 14:09

Шаерысьтымы 592 школаос пӧлысь ог 80 процентэз туала куронъёслы тупало ни. Нош Кизнер ёросысь Кибья черкогуртысь огъя тодон-валан сётонъя школа воксё куашкан калэ вуэмын.

Кибья школалы 85 ар ни. Зэм, ачиз со вӧл-вӧл, югыт. Но борддоръёссэ пыкъяса возё ни — коръёсыз сисьмемын, пыртӥзы тӧл шула. Липетэз отӥ-татӥ вия. Дышетӥсьёс сое кышъяны-буяны выро ик. Туэ но 1-тӥ сентябрьлы юртсэс чебертыны дауртӥзы, нылпиослы шумпотон кузьмано шуизы. Но кышъяськемзы кемалы меда?

Дэбес ёросысь Котегуртысь школа.

— Укноосмес пластиклы воштыны курыса, предписание гожтэмын. Но соосты воштон школалы туж дуно усёз. Собере вашкала юртэз сэзъяны но уд дӥсьты — мырдэм сылэ,  — вера школалэн директорез Нина Парамонова. — Милемлы 10 ар ӵоже ни сӥзё, выль школа пуктозы шуыса. Туэ нош ик 2018-тӥ арлы кельтӥзы. Проект но лэсьтӥзы ни. Но со бумага вылын гинэ.

Школаын спортзал ӧвӧл. Ярано коть, коридорзы паськыт, отчы тэрытӥсько. Куазь чебер дыръя ульчаын бызьыло-тэтчало. Но коридорын тэтчаны уд дӥсьты — выж пыртӥ потоно кадь. Таӵе югдурен валче но, миым гинэ гуртысь 4 егит, трос нылпиё семья кошкиз ни. Туэ 1-тӥ классэ лыктӥсь ӧвӧл. Гуртэ ог 250 улӥсь кылемын на. Соос но ялан кулэсмо.

— Гуртмес воксё бырись шуыны уг луы. Нылпи садамы группа тросаз. 2018-тӥ арын школае 4 нылпи лыктыны кулэ, таос но гуртысь ӧз пегӟе ке, — шуэ Нина Семёновна.

Школаын туннэ 23 дышетскисез. Ваньзы сямен школа котыртӥ гожеръяло, дышетӥсьёссылэсь юаллясько, мар вылез туэ луоз дышетсконазы, кызьы 1-тӥ сентябрьзы ортчоз…

1-тӥ сентябрьзы шулдыр ортчоз. Талы мыло-кыдо дасяськизы уго. Зэм, отӥяз нош ик сюлмаськонъёссы кутскозы, вылды: школаын кезьыт, липет вия…

Шаерысьтымы таӵе ик югдурын эшшо 3 школа: Дэбесысь Котегуртын, Пичи Пургалась Аксакшурын, Дэриысь Постолын.

Шӧкыч уром

Туспуктӥз А. Горбунов

 

Удмурт Дунне
By Удмурт Дунне Сентябрь 1, 2017 14:09