Москваын кылдӥз Михаил Калашниковлы сипелет

Удмурт Дунне
By Удмурт Дунне Сентябрь 20, 2017 12:30

19-тӥ сентябре Москваысь Садовая-Каретная но Долгоруковская сюрес воже интыяськем скверын, Оружейникъёслэн пролказы палангес, Михаил Калашниковлы сӥзем памятник усьтӥськиз. 

Тодмо конструкторлы, Социалистической Ужысь кык полэс Геройлы, Россиысь Герой геройлы синпелет кылдытон бордын тыршиз Россиысь военно-исторической общество, юрттӥзы Москваысь город Дума но «Ростех» корпорация. Проектсэ дасяз Россиысь дано суредась Салават Щербаков.

Синпелетэз усьтонэ 200-лэсь трос адями пыриськиз: Россиысь военно-исторической обществоысь, Россиысь Культурая министерствоысь, Москвалэн  Правительствоысьтыз, Москваын улӥсь удмуртъёслэн землячествоысьтызы, Удмуртиысь кивалтӥсьёс, М. Калашниковлэн эшъёсыз но ӵыжы-выжыосыз.

Ужрадын М. Калашниковлэсь ӟеч сямъёссэ тодазы вайизы. Россиысь культурая министр, Россиысь военно-исторической огазеяськонлэн председателез Владимир Мединский пусйиз, тодмо конструктор огшоры сямо гинэ вал кадь ке но, котьку зэмлык понна нюръяськиз,  калыкез огазеяны быгатылӥз. Солэн кылдытэм пыӵал тӥрлыкез Атыкай музъеммес утёнын кутӥське, автоматэз Кремльысь музейын но Оружейной палатаын возиське, тужгес усто ӟуч пыӵал тӥрлыкъёсын артэ.

М. Калашниковлэн нылыз Елена Калашникова ватсаз, шумпотӥсько, пе, синпелетэз усьтӥзы ӵапак 19-тӥ сентябре, Россиын соку пусъёс Оружейниклэсь нуналзэ. Удмуртилэн Тӧроез Александр Бречалов вераз, 2019-тӥ арын М. Калашниковлэсь 100 ар тырмонзэ пусъёмы. Юбилейлы дасяськон синпелет усьтон бордысен кутскиз, конструкторез данъяса, Удмуртиын но бадӟым ужрадъёс ортчытэмын луозы.

Сергей Захаров
Туспуктэм: udmurt.ru

 

Удмурт Дунне
By Удмурт Дунне Сентябрь 20, 2017 12:30