Ми — туала анайёс! Кыӵе ужпумъёс ас азяз пуктэ «Нуныкай» центр?

Удмурт Дунне
By Удмурт Дунне Сентябрь 18, 2017 13:50

Ижын ужзэ мытӥз покчи пиналъёс понна «Нуныкай» центр. Кыӵе ужпумъёс сылозы со азьын но маин со пиналъёсты бордаз кыскоз? Кенешиськом проектлэн кивалтӥсеныз Ольга Бикузинаен.

О. Бикузина: «Нуныкай» проект борды кутски, аслам нылпиосы сярысь малпаса.

— Шоркарамы удмурт анай-атайёслы, соослэн нылпиоссылы чаклам клубъёс азьвыл но вал. Кема аръёс ӵоже туж пайдаё ужаз «Шудон корка» клуб. Со сяна — «Анай клуб», «Билингва» центр. Маин «Нуныкай» висъяськоз?

— Пусъеме потэ: вань та проектъёс туж пӧртэмесь ке но, соос азьын одӥг ужпум сылэ: городын будӥсь нылпиосты удмуртлыклы матэгес карон, анай кылзылы дышетон, удмурт сям-йылолъёсты возьматон. «Билингва» нырысь ик кылдытэмын анай-атайёслы, дышетӥсьёслы юрттэт сётон вылысь. Зэм, солэн семинаръёсаз нылпиослы удмурт кылын нимаз дышетон программа но чакламын вал. Отын пиналъёс шудон, киужен вырон пыр анай кылзэс дышетӥзы. Табере, куарусён толэзьысен кутскыса, «Билингвалэн» семинаръёсаз нылпиосын ужан форма воштӥськоз. Пиналъёс понна, удмурт кылын квест выллем, шудонъёс радъяськозы. Со сяна, «Билингва» семинаръёс толэзяз одӥг пол радъясько. Нош «Нуныкай» — со удмурт кылын пиналэз дышетонъя но азинтонъя центр. Отын ми котькуд кӧснуналэ пӧртэм урокъёсты удмурт кылын радъяломы (кылэз волятон, киужен вырон, крезьгур урокъёс). Занятиос вискын удмурт кылын шудонъёс луозы.

«Нуныкай» центрмы кылдӥз ке но, малпасько, «Анай клуб» но ужамысь уз дугды. Угось таиз анайёс понна площадка. Отын соос люкасько, пӧртэм ужпумъёсъя верасько. «Анай клуб» аслаз «кенешаз» шуак-дуак бичаське, мылкыд куремъя. Шуом, вань кыӵе ке малпан яке вань ӟеч специалист, психолог, со дась луэ анайёсын пумиськыны. Ми тупатӥськом нунал, инты но ялӥськом та пумиськон сярысь. Лыкто вань мылкыд карисьёс.

Ватсасал на: вань та клубъёс но проектъёс удмурт нылпиосын ужез котыр ласянь нуыны юртто, аспӧртэм радлык, система кылдыто.

Нылпиосын шудыса.

— Ижкарысь удмурт нылпиосын ужан опытэз бадӟым Удмурт нылкышно кенешлэн. Соосын кусып возьыны чакласькоды-а?

— Макем трос огъя мылкыдын ужась огазеяськонъёс, сокем умой. Вань удмурт огазеяськонъёс азьын одӥг ужпум сылэ: удмурт кылмес но культурамес утён. Соин ик ми туж шумпотом, партнёръёсмы тросгес луизы ке. Нош та проектмес дасяны милемлы юрттӥз «Удмурт Кенеш» огазеяськон.

— Кызьы малпаськоды, Ижысь анай-атайёслэн нылпиоссэс удмурт кыллы, культуралы дышетон луонлыкъёссы тырмыт-а?

— Нырысь ик удмурт кыллы, удмурт культуралы дышетон семья бордысь потыны кулэ. Но семья пушкын гинэ сое возьыны шуг. Аслам нылпиосы сярысь верано ке, уг тырмо эшъёс, кинэн соос куспазы но удмурт кылын вераськыны быгатысалзы. Ижкарын туж ӧжыт интыос, кытын нылпиос зэмзэ но удмурт сямен вераськыны, удмурт эшъёс шедьтыны, кылзэс волятыны быгато. Татчыозь милемлы сыӵе инты луиз вал «Билингва» проектлэн семинаръёсыз. Со пумиськонъёс милемыз но, нылпиосмес но выль тулкыме ӝутӥзы, шуыны луоз: нылпиосмы трос удмурт эшъёс шедьтӥзы, анайёс но кусып тупатӥзы. Пумен-пумен озьы пӧрмиз: толэзяз одӥг пол пумиськонъёс милемлы ӧз ни тырме, соин ик выль проектъёс кылдытон борды кутским.

— Кӧня дырлы чакламын «Нуныкай» проект но ачид мар возьмаськод солэсь?

— «Нуныкай» проект Ижкар администрацилэн проектъёсъя конкурсаз вормисе потӥз. Со чакламын таиз ар пумозь. Мар луоз собере, али шуг вераны. Но проектлэсь кулэлыксэ адӟимы ке, одно ик тыршом азьланяз но пумиськонъёс радъяны. Нялтас вераса, «ВКонтакте» вотэсын «Нуныкайлэн» аслаз группаез вань ни. Отысь тодыны луоз вань выль иворъёсмес.

«Нуныкай» проект буш интыын ӧз кылды. Йырын кемалась ини бергаз мар ке сыӵезэ кылдытон сярысь малпан. Соин ик туж шумпотӥ «Удмурт Кенеш» огазеяськонлэн кивалтӥсезлэн Татьяна Ишматовалэн вазиськемезлы, проектъёсъя конкурсэ пыриськыны ӵектэмезлы.
Зэмзэ верано ке, нырысь ик та проект борды кутски аслам нылпиосы понна. Ма, котькуд анай ас пиналъёсыз понна сюлмаське ук. Туж потэ вал нылпиосылы сыӵе площадка кылдытэме, кытын соосты валалозы, кытын удмурт кылзэс волятэм гинэ ӧвӧл, тодон-валан но басьтозы. Ачим йылпумъяй Глазовысь педагогикая институтэз. Соин валасько: пинал удмурт кыллы уз дышы нимысьтыз урокъёс пыр гинэ, кулэ на ӵош шудон-бызьылон. Городын удмурт школае, удмурт садике нуллыса гинэ, пиналэз удмурт уд кары.

— Анай-атайёс ӵемысь витё, удмурт кылъя пӧртэм занятиос, клубъёс дунтэк мед луозы шуыса. Кызьы малпаськод, азьланяз проектлы коньдон ӧз висъяськы ке, дась-а луозы анай-атайёс дун тырыны? Быгатоз-а «Нуныкай» коммерция проект луыны?

— Зэмзэ вераса, мон берло дыре ӵем пумитасько сыӵе анайёсты, кудъёсыз нылпиоссэс будэтон, визьман вылысь пӧртэм кружокъёслы, занятиослы коньдонзэс пичи но уг жаляло. Ижкарысь туала удмурт анай-атайёс валало: ваньмыз дунтэк уг луы. Шуом, пӧртэм мастер-классъёс ортчытъяны, киужен вырыны материал кулэ, сое но басьтоно. Мон ӧй шуысал, ваньзы дунтэк проектъёсты гинэ возьмало шуыса. Но мар луоз азьланяз, улон возьматоз.

Али мон ӵемысь пумиськылӥсько шоркарысь удмурт анайёсын. Мон ачим но соос пӧлысь. Ми котьку но дась пӧртэм пумиськонъёсы пыриськыны — паркын-а со луоз, кафеын-а, яке воксё кин ке доры куное лыктомы-а. Ми, итальянецъёс сямен киосмес шонаса, чик возьдаськытэк удмурт сямен вераськиськом котькытын. Ми котьку но дась ог-огмылы юрттыны.

 

Елена Миннигараева

 

 

Удмурт Дунне
By Удмурт Дунне Сентябрь 18, 2017 13:50