“Лыдӟиськы, Ижкар!” фестиваль улсын ортчоз 200 ужрад

Удмурт Дунне
By Удмурт Дунне Сентябрь 2, 2017 14:15

Та нуналъёсы Ижын мынэ книгалы, литературалы сӥзем “Лыдӟиськы, Ижкар!” фестиваль. Туннэ 15.00 часысен кутскозы Москваысь писательёсын Александр Кабаковен но Владимир Сотниковен пумиськонъёс.

Фестивалез сӥё-дано усьтон.

Арлы быдэ фестивале пыриськыны мылкыд карисьёслэн лыдзы будэ. Туэ отчы книгаопоттонниосын ӵош вамыштӥзы редакциос но. Тодады вайытом, “Удмурт дунне” газет фестивале арлы быдэ пыриське. Таяз радэ ми ялӥм акция: котькуд гожтӥськисьлы — кузьым.

«Удмурт дунне» газет возьма лыдӟисьёссэ.

— Кин азьвыл аръёсы фестивалямы пыриськиз, соосгес ик азьланяз но милемын ужало. Озьыен: фестиваль соослы кельше. Со шумпоттэ. Туэ ар экологилы сӥзем бере, фестивалез ми культуралэн но лыдӟиськонлэн паркез шуыса нимам, — вера фестивальлэн огез радъясез Наталья Валишева.

Ф. Васильев нимо библиотека ортчытэ мастер-класс — отын нылпиос совето вакытысь открыткаослэсь шкатулка пӧрмыто.

Озьы нырысетӥ нуналысеныз ик Шор площадьысь шатёрын огыр-бугыр улон пӧзе. Йӧскалык библиотекалэн сэрегаз луэ визез сынаны — татын котькуд мылкыд карись тест гожтыны быгатэ. Школаын дышетскисьлэн сэрегаз — чернилаен гожъяськыны, писательлэн висъетаз — вашкала печатлан машинкаен  кагаз вылэ кылбур я верос шуккыны. Нош Ф. Васильев нимо библиотека ортчытэ мастер-класс — отын нылпиос совето вакытысь открыткаослэсь шкатулка пӧрмыто.  Тросэз возьмало Москваысь писательёсын Александр Кабаковен но Владимир Сотниковен пумиськонэз. Со кутскоз 15.00 часын.

Нош кыӵе мугъёсъя фестивале ӧтемын луо со яке та писательёс?

—  Ар ӵоже ми  лыдӟисьёслэсь юалляськиськом: кинэ адӟемды потэ фестивальысь, — веранзэ азьланьтэ Наталья Алексеевна. — Озьы Александр Кабаковлэн нимыз шараяськиз. Со сяна, ми котькуд арлыдо лыдӟисьёсмылы авторез ӧтьыны турттӥськом. Нылпиос но егитъёс понна, кылсярысь, туэ луиз Владимир Сотников.

Лыдӟисьёслэн фестивальысь Дмитрий Быков но мукет тодмо писательёсты адӟемзы потэ. Но кызьы верало радъясьёс, троссэ чортыны луонлык ӧвӧл, соос бадӟым гонорар куро.

«Лыдӟиськы, Ижкар!» фестиваль туэ 5-тӥзэ ортче. Та дыр куспын со тодмо ужрадлы пӧрмиз ни. Кылсярысь, Москваын улӥсь удмурт кышномурт Екатерина Назарова — та автор удмурт кылъя самоучитель поттӥз —  та нуналъёсы вордскем палъёсаз юромо та фестивалез адӟыны бертӥз.

Школьниклэн серегаз.

Нылпиос лыдӟо Г. Ходыревлэсь кылбуръёссэ.

 

«Лыдӟиськы, Ижкар!» фестивале вуозы Александр Кабаков но Владимир Сотников

Мария Векшина

Туспуктэмъёс: vk.com/chitaiizhevsk

Удмурт Дунне
By Удмурт Дунне Сентябрь 2, 2017 14:15