Кызьы Ижкар пусъе Сюлэмлэсь нуналзэ?

Удмурт Дунне
By Удмурт Дунне Сентябрь 25, 2017 16:22

Кызьы Ижкар пусъе Сюлэмлэсь нуналзэ?

29-тӥ сентябрь — Сюлэмлэн нуналыз. Арысь аре тае, Россия гинэ ӧвӧл, быдэс дунне пусъе, толэзь ӵоже пӧртэм ужрадъёс ортчытъяса. Палэнэ уг кыльылы Ижевск но.

Кылсярысь, 23-тӥ сентябре 10-ысен 13 часозь зоопаркын «Сюлэм вае тазалык» акция луоз. Лыктэмъёслэсь сюлэмъёссэс эскерозы элькунысьтымы валтӥсь кардиологъёс. 29-тӥ сентябре 9-ысен 15 часозь Диагностикая центр «меӵак телефон» радъялоз. Жингыртоно 8(3412) 68-37-86 номеръя.

— Республикаысьтымы котькуд 5-тӥез адями сюлэмыныз курадӟе, — вера Диагностикая центрысь валтӥсь врачлэн воштӥсез Сергей Помосов. — Сюлэм но сэр висёнъёсын сэрен арлы быдэ 8,5 сюрс адями улонысь кошке. Та пӧлысь 80 процентэз туннэ но улэп луысал, тазалыкез сярысь рос-прос сюлмаськысал ке.

Сюлэмынызы курадӟись-ёслы эмъясьёс туала юрттэт сёто. Пичи вурыс лэсьтыса, тромб кылдэм интые стент пукто. Озьы мугоретӥ вир гань-гань ветлыны кутске. Азьвыл та операциез Ижын чиньыен лыдъямон гинэ лэсьтылӥзы. Туэ 1 сюрс 250-эз быдэстэмын ини, планын эшшо 300-эз.

— Та операция эмъясьёслы секыт, висисьёслы капчи потэ, — шуэ Сергей Алексеевич. — Угось, вандылэм бӧрсьы, 2-3 нунал ортчыса, адями дораз бертыны быгатэ. Таин сэрен, вылды, пӧлысьтызы куд-огез капчияк малпа: секыт луиз ке, нош ик операция лэсьтозы. Азьвыл сямен ик, тамак кыске, курытсэ юэ, кӧё-вӧё сиське. Тазьы 3-5 ар улэ но, операцилэн пайдаез быре. Вал сыӵе учырмы — 1 адямилы 3-4 пол стент пуктылӥмы. Озьы ке но улэп кельтыны ӧм быгатэ. Висисез урод сямъёсыз быдтӥзы. Таӵе адямиос уг малпасько, кӧня кужым, уксё быдтэмын соосты утён понна: 1 операцилы кунмы 100 сюрс манетлэсь трос висъя.

Туннэ сюлэмынызы ӵе-мысь койкае шедё 25-27 аресъем егитъёс. Эмъясьёс тае герӟало соослэн улон сяменызы. Быдэс нуналъёсын компьютер сьӧрын пуко, мугорзэс кыдатыны вунэто, тазалыксы сярысь уг сюлмасько.

— 2007-тӥ арысен Диагностикая центрамы таза улонлы сӥзем школа усьтӥськиз, — вераз центрысь профилактикая ёзэн кивалтӥсь Светлана Шабардина. — Туннэ республикамылэн 40 сэрегъёсаз дышетонъёс ортчыло. Но отчы арлыдоосгес пыриськыло, нош туж потэ вылэм егитъёсты но адӟеммы. Угось тросэз уг тодо вирзӥбетэз, мӧйыослы гинэ ӧвӧл, соослы но котькуд нунал мертано шуыса.

Ольга Корепанова

Удмурт Дунне
By Удмурт Дунне Сентябрь 25, 2017 16:22