Кузьма библиотекалы журналлы гожтӥськон

Удмурт Дунне
By Удмурт Дунне Сентябрь 20, 2017 10:27

Выль книга, газет-журнал басьтыны библиотекаослы уксё ӧжыт висъяське. Вань амал: biblio.planeta.ru вотэсбамын котькуд адями быгатэ библиотекаослы юрттон вылысь уксё кельтыны.

Та дырлы люкамын ни 670 сюрс манет, лэсьтэмын 270 подписка. Проектэ пырисько 6 сюрс 422 библиотекаос, соос пӧлын Можга, Иж городъёсысь, Кизнер, Дэри но куд-ог мукет ёросъёсысь лыдӟиськонниос.

Пичи дыръям яратӥсько вал «Мурзилка», «Мишка» но мукет журналъёсты, наукаен герӟаськем книгаосты учкылыны. Тросэз адямиос библиотекаосын газет-журналъёсты лыдӟыса быдэс нуналъёсын но пукыло. Но арысь аре журналъёслы гожтӥськыны секытгес луэ, шуо библиотекаын ужасьёс, «Удмурт дунне» газетлы но гожтӥськыны уксё уг тырмы ни.

— Быдэс арлы милемлы Можга кар администрация висъя 200 сюрс манет, со тырме ёросысь 4 библиотекаосы 70-лэсь уно дунтэм газет-журналъёслы гожтӥськыны. Ӧжыт-а со? Куд-ог ёросъёсын солэсь но ичигес висъяло, — вера Можга ёрос библиотекаен кивалтӥсь Елена Зворыгина. — Журналъёсты адямиос туж лыдӟо, потэ на вылэм гожтӥськеммы литературая зӧк журналъёслы.

 

Гожтӥськон — 2017

Та югдурен тодмо Россиысь библиотекаослэн ассоциацизы. Библиотекаослы юрттон вылысь, со, Кун Думалэн юрттэменыз, улонэ пыӵатэ «БиблиоРодина» проектсэ. Котькуд адями  biblio.planeta.ru вотэсбаме пырыса, быгатэ бырйыны библиотекаез но лэсьтыны солы подписка. Озьы Россиысь библиотекаосы вуыны быгатозы таӵе тодмо газет-журналъёс: «Наука и жизнь», «Машины и механизмы», «Вокруг света», «Юный техник»… Оглом вераса, наукаен герӟаськем дуно журналъёс.

— Та проект городъёсты но гуртъёсты азинтыны юрттэ. Будӥсь егитъёслы кулэ визьмо журналъёс, сотэк ми ыштӥськом вуоно инженеръёсты, академикъёсты, тодосчиосты, — вера «Наука и жизнь» журналлэн валтӥсь редакторез Елена Лозовская.

Та дырлы люкамын ни 670 сюрс манет, лэсьтэмын 270 подписка. Проектэ пырисько 6 сюрс 422 библиотекаос, соос пӧлын Можга, Иж городъёсысь, Кизнер, Дэри но куд-ог мукет ёросъёсысь лыдӟиськонниос. Но сюриз ни меда соослы меценат? Можга ёросысь Н. Байтеряков нимо библиотека «БиблиоРодина» проектэ нырысетӥ нуналысен ик пыриське. Но библиотекалы журналъёсты гожтӥсьёс ӧз сюре на. Сыӵе ик югдур Удмуртиысь йӧскалык библиотекаын но. Мар веранэз мукет пичигес ёросъёсысь книга юртъёс сярысь.

Зэм, ми  дышемын ӧвӧл на таӵе амаллы, уксёмес лыдъяськом на. Но ӧжыт ӧвӧл ни благотворительностен вырисьёс но. Озьыен, оскиськом: азьланяз библиотекаосы газет-журналъёслы гожтӥськисьёслэн лыдзы будоз.

Мария Иванова

Туспуктэм: «Удмурт дунне»

 

 

 

 

Удмурт Дунне
By Удмурт Дунне Сентябрь 20, 2017 10:27