«Кенеш» журналын — егитъёслэн творчествозы

Удмурт Дунне
By Удмурт Дунне Сентябрь 22, 2017 11:14

«Кенеш» журнал поттӥз егитъёслы сӥзем номерзэ. Кылем арняе соин тодматскон понна Ижысь огаз кафее люкаськизы егит авторъёс, критикъёс но удмурт литератураысь классикъёс. «Кенеш» журналлэн берлоез егитъёслы сӥзем номерез потӥз вал ни кыдёкысь 2003-тӥ арын.

— Со дырысен егитъёс будӥзы, зӧкомизы, талантогес луизы, таяз номерын соос бадӟымгес жанръёсты но куто — Дарали Лелилэн романысьтыз люкетъёс потӥзы, фэнтези но вань, — вера «Кенеш» журналлэн валтӥсь редакторез О. Бородина. — Егитъёсты ми тазьы нырысьсэ люкамы. «Кенеш» журнал — мӧйыослыгес журнал, шуо ке но, милям потэ вал тӥледын но, егитъёс, вераськеммы, малпанъёстэс тодэммы.

Таиз но номер кема кисьмаз, луоз, трос аръёс ӵоже редакциын егитъёслэн ужъёссы люкаськизы.

— Номере пыртоно кариськимы шаерысьтымы литературно-творческой кружокъёсы ветлӥсьёслэсь ужъёссэс но. Собыдӟа шаерамы чиньыен лыдъямон гинэ кружокъёс ужало вылэм — Алнаш, Пичи Пурга ёросъёсын быдэн одӥген но Можгалан 2 кружок. Озьы ке но сомында ужъёс люкаськизы — тросэз соос журналэ ӧз пыре. Бырйимы тужгес устооссэ — удмурт литератураын тазьы ӵем уг луы, — вера «Кенеш» журналысь кылбурет понна кыл кутӥсь Л. Нянькина.

Дарали Лели лыдӟе романысьтыз люкетъёссэ.

 

Журналысь луэ шедьтыны Дарали Лелилэсь, М. Векшиналэсь, Н. Михайловлэсь прозазэс, А. Шумиловалэсь, А. Бурдиналэсь, М. Михайловлэсь, П. Куликовскаялэсь кылбуръёссэс но мукетъёсызлэсь произведениоссэс. Кызьы пусйиз литературовед В. Шибанов, тросэз нимъёс тодмо ни вал «Удмурт дунне» газетэн поттэм «Ингож» бичетъя — тодады вайытом, книга потӥз кылем арын егитъёслы литературной семинар ортчем бере.

Егитъёс литературае туала омыр пырто, улонэз мукет сямен усьто, выль амалъёсты куто. Но соин валче журналысь редакторъёс пусъё: егитъёс ляб шӧдо кылэз, ӵемысь тӥяло кыл радэз.

Номерез учконо ке, тросэз егитъёс фэнтэзи амалэн гожъясько. Шумпоттэ: проза узыр. Кызьы шуиз В. Шибанов, проза вань ке, озьыен, литературалэн азьланез но вань. Табере егитъёсты драма борды кысконо на.

Мария Иванова

Туспуктэм vk.com («Кенеш» журнал)

Удмурт Дунне
By Удмурт Дунне Сентябрь 22, 2017 11:14