Гожтӥз-а Кедра Митрей «Дитя больного века» автобиографической повестез?

Удмурт Дунне
By Удмурт Дунне Сентябрь 27, 2017 13:38

Туэ Кедра Митрейлэн (Дмитрий Иванович Корепановлэн) вордскемез дырысен 125 ар тырме.

Печатласа ӧз вутты

Со революцилэсь азьвыл дышетскем удмурт интеллигентъёс пӧлысь одӥгез, 1920-тӥ–1930-тӥ аръёсысь журналист, дышетӥсь но азьветлӥсь, пыд вылаз султытӥз удмурт литератураез. Удмурт лулчеберетлэн историяз Кедра Митрейлэн нимыз весяклы кылиз, но, сакгес учконо ке, улэм-вылэмез но творчествоез пыр-поч эскерымтэ. Кылсярысь, революцилэсь азьвыл гожъямъёсыз но 1911-тӥ арын гожтэм автобиографиез. Со быдэсак огпол но ӧз печатласькы на, тодосчиос Кедра Митрейлэн автобиографиез сярысь  нимысьтыз ӧз гожъялэ.

1911-тӥ арын 19 аресказ Кедра Митрей быдэстӥз аслэсьтыз бадӟым ужзэ — автобиографизэ. Отын Дмитрий Корепанов семинарист ачиз маде улэм-вылэмез сярысь, Глазов уездысь Эгра гуртын вордӥськемез бордысен кутскыса но семинариысь Инмарлы оскымтэез понна уллямзы сярысь учырен мадёнзэ йылпумъяса. Ваньмыз со ӟуч кылын гожтэмын.

Кедра Митрей улэп дыръяз автобиографизэ печатласа ӧз вутты. 1911-тӥ арын ыстылӥз ужзэ пӧртэм журналъёсы. Гожтэтъёсаз сое пӧртэм сямен нима — «Автобиография и мемуары», «Дневник». Редакциос сое печатланы пумит луизы — бадӟым шуиллям. Зэмзэ но — рукописьлэн быдӟалаез — кык палысеныз гожъям 194 лист. Ачиз Кедра Митрей ужезлэсь кыӵе ке люкетсэ гинэ поттыны пумит луиз.

Кызьы кылдӥз ним

Озьы ке но калык тодматскиз автобиографиезлэн люкетъёсыныз гинэ. Соос нырысьсэ печатласькизы 1965-тӥ арын — Кедра Митрейлэн ӟуч кылын гожтэм произведениосыныз «Избранное» бичетын. Озьы, «Избранное» сборниклэн редакторез — удмурт критик Алексей Ермолаев — калыкез Кедра Митрейлэн автобиографиеныз нырысьсэ кӧня ке тодматӥз.

Та сборникын авторлэн рукописез 3 поллы вакчиятыса сётэмын, кылыз тупатэмын но волятэмын. Печатлакузы автобиографилы ним сётӥллям но жанрзэ воштӥллям: «Дитя больного века» автобиографической повесть. Озьы, Кедра Митрейлэн автобиографиез удмурт литературае но лулчеберетэ пыриз «Дитя больного века» автобиографической повесть сямен.

Критикъёс «Дитя больного века» ним пумысен споръясько. А. Ермолаевлэн огаз статьяяз пусъемын: Кедра Митрей ачиз тазьы нимаз аслэсьтыз автобиографической ужзэ. Нош Кедра Митрейлэсь творчествозэ эскерись тодосчи З. Богомолова берло сётэм интервьюаз шуэ, со, З. Богомолова, сётӥз «Дитя больного века» ним 1965-тӥ арын печатлам ужлы.

Кедра Митрейлэн архиваз «Дитя больного века» нимын 2 гожтос возиське — нырысетӥез луэ 1913-тӥ арын гожтыны кутскем, но йылпумъямтэ роман, нош кыкетӥез — газетэ печатланы дасям статья. Нош аслаз писательлэн киыныз одӥгаз но рукописяз «Дитя больного века» автобиографической повесть сярысь пусъемзэ мон ӧй шедьты.

Огъя вераса, Кедра Митрей ӧз гожты асьмелы тодмо «Дитя больного века» автобиографической повесть. 1965-тӥ арын печатлам «Дитя больного века» автобиографической повестьысь люкетъёс — со берло, совето вакытэ туж зол тупатъям но вакчиятэм произведение. Кедра Митрейлэн ужезлэсь нимзэ но жанрзэ воштэм сяна, печатламлэсь азьло автобиографилэн текстэз но редактировать каремын вал.

Зэмзэ вераса, таӵе тупатъянъёс пайда вайизы. Малы ке шуоно, литературае нырысетӥ вамыш лэсьтӥсь егит авторлэн кылыз секыт, шакрес на вал. Нош редактура бере гожтэмзэ лыдӟыны капчигес луиз. Кедра Митрейлэн текстысьтыз канцеляризмъёс но огшоры вераськон стиле пырись кылъёсты редакторъёс вошъяллям чебер литературной кылысь синонимъёсын, тупатӥллям предложениысь кылъёслэсь радлыксэс но мукет. Но куд-ог учыръёсы таӵе воштонъёсын сэрен Кедра Митрейлэн текстэзлэн пуштросэз чылкак воштӥськиз. Совето вакытэ Кедра Митрейлэн текстэз идеология ласянь но тупатэмын вал.

Кудӥз лыдӟымонгес?

Соин но, дыр, 1990-тӥ аръёсы, странаын бадӟымесь воштӥськонъёс ортчем бере, Кедра Митрейлэн автобиографиез выльысь печатласькиз. Автобиография кыкетӥзэ потӥз «Инвожо» журналын 1993-тӥ–1994-тӥ аръёсы. Но сое озьы ик печатлазы «Дитя больного века» автобиографической повесть нимын, озьы ик вакчиятыса сётӥзы. Но, нырысетӥ публикациен ӵошатыса, 2-тӥ публикацие автобиографиысь тросгес люкетъёс пыризы. Со сяна, авторлэсь стильзэ но орфографизэ воштытэк сётӥзы.

Озьы ке но, озьы ке но, таяз учыре но автобиография трос поллы вакчиятыса печатламын. Публикация азьын журналлэн редакторез Пётр Захаров валэктон сётэ: печатлаське 1965-тӥ арын А. Ермолаевен дасям корректура…

Огъя вераса, таяз учыре но «Дитя больного века» автобиографической повесть — со мукет произведение, авторлэн кылыз тупатъятэк сётэмын ке но. Кедра Митрейлэн рукописез жанрезъя луэ автобиография — зэмос адямилэн зэмос улонэз сярысь мадёсэз. Со туж кузь. Кутске предисловие бордысен, кытын автор пыр-поч валэктэ, малы автобиография гожтыны малпаз. Рукописьын со улэм-вылэмзэ бӧрсьысь бӧрсьы суреда: возьматэ Эгралась церковно-приходской школаын но Зураысь 2 классъем училищеын дышетскыкуз луэм тунсыко учыръёссэ, Эгралась Казане семинарие мынон-бертонъёссэ, анай-атаезлэсь, семьяезлэсь но тодмоосызлэсь улонзэс. Со ӝожтӥське секыт улон-вылонэзлы, ассэ ачиз быдтон амал утча. Чик но батыр кадь ӧвӧл — туж огшоры адями. Рукописьын сюжет ышылэ туж трос авторской отступлениосын сэрен.

«Удмурт дунне» ортчытэ Кедра Митрейлы сӥзем ужрад

Соин произведение, кудӥз асьмелы тодмо — А. Ермолаевен дасям автобиографилэн вакчиятыса сёэм вариантэз — «Дитя больного века» автобиографической повесть — лыдӟымонгес ик, дыр. Таиз публикация зэмзэ но автобиографической повесть жанрлы тупа: татын вакчияк возьматэмын валтӥсь геройлэн — зол сямо муртлэн — пӧртэм шуг-секытъёс пыр ортчыса аслэсьтыз малпанзэ — Инмарлы осконлэсь куштӥськемзэ — утемез.

Таин валче тодэ лыктэ гениальной Маркс Перкинс редактор, кудӥз тупатъяз но лыдӟымон кариз Ф. Фицджеральдлэсь, Э. Хемингуэйлэсь но Т. Вулфлэсь романъёссэс. Оло, автобиографилэн вакчиятэм вариантэз — А. Ермолаевен, З. Богомоловаен но мукет адямиосын кылдытэм «Дитя больного века» автобиографической повесть шуон — зэмзэ но оригиналлэсь умойгес? Кин тодэ… Но Кедра Митрейлэн та дырозь рукописьын возиськись туж кузь 300 бамъем автобиографиез но — 20-тӥ даурлэн кутсконаз удмурт интеллигентлэн зэмос улонэз, малпаськемез сярысь история — пайдаё но лыдӟымон.

Лариса Дмитриева

Удмурт Дунне
By Удмурт Дунне Сентябрь 27, 2017 13:38