Дуно толэзь

Удмурт Дунне
By Удмурт Дунне Сентябрь 1, 2017 12:34

Тросэз анай-атайёс понна август — сюлмаськон толэзь. Угось нылпиез 1-тӥ классэ сётон трос дырез, кужымез но коньдонэз кулэ каре. 

 Дасясько тулысысен

Ижысь Инна но Володя Никитинъёслэн Ленӥзы туэ школае мынэ. Талы анай-атаез тулыс ик дасяськыны кутскиллям. 4 толэзьлы азьлапал план лэсьтӥллям, кытчы но малы коньдонзэс быдтозы.

— Сотэк уг луы, — шуэ егит анай. — Нылмылэн кружокъёсызлы сяна, уждунмес тырмытоно ипотекалы, квартплаталы, сиён-юонлы. Кузпалэным кенешимы: май толэзе Ленӥмылэн комнатаяз ремонт лэсьтомы, июне гожъяськон арбериос басьтомы, июле песьтэр утчаломы, августэ дӥсь, пыдкук сярысь сюлмаськомы.

Ремонтлы Никитинъёс ог 30 сюрс манет быдтӥллям. Борддоръёсын — выль обой, сэргын — шкаф, ӝӧк, пукон, ӝажы, вӧлдэтын — юг-юг лампа.

— Уксёмес шыръяны тыршимы, — шуэ Инна. — Кылсярысь, мебель выльзэ ӧм басьтэ, Интернетысь одӥгез сайт пыр шедьтылӥмы. Книга-тетрадьёслы но коньдонмы ӧжытгес кошкиз. Июнь толэзе Ижысь оптовой базаосын 12 бамъем тетрадьёс 1 манет 60 копейка сылӥзы. Нош августэ бадӟым вуз карон центръёсын соос 2 манет 60 коньы луизы ини. 3 висъето пенал басьтӥмы 240 манетэн, али  350-озь ӝутӥськемын. Озьы суредаськон-гожъяськон арбериослы оглом 1 сюрс манетмы кошкиз. 2 но ӝыны сюрс манет сётӥмы школае ужан тетрадьёслы.

Туэ элькунысьтымы школаосы 21 сюрс пала нылъёс но пиос нырысьсэ школае вамыштозы. Соос чидатэк витё ни 1-тӥ сентябрез.

Никитинъёс тужгес кема утчаллям рюкзак. Эмъясьёслэсь вань ӵектонъёссэс лыдэ басьтыны тыршиллям. Песьтэрлы 3 сюрс 600 манетсэс жаляллямтэ.

— Педиатрмы валэктӥз, рюкзаклэн, пе, берыз «Х» буквалы кельшыны кулэ. Соку со нылпилэн мугорызъя ӟеч пуксе, тыбырыз уг жадьы. Та сяна, учкимы, малэсь  дасямын, угось рюкзакез 1 арлы гинэ ӧм басьтэ. Вуремын полиэстерлэсь, вылыз вуэз пыӵатӥсьтэм суретэн зырамын. Озьыен, зор-кот улын со уз безды. Саптаськиз ке, ӵушалтыны луоз.

Дӥсь ласянь кузпалъёслы трос бызьылоно луымтэ. Вуриськись, котькуд пиналэз мертаса, быдэс класслы костюмъёс дасям. Талы Никитинъёс сётӥллям 3 сюрс 500 манетсэс. Вӧзаз бантикъёс (300 манет), бызьылыны костюм (2 сюрс 800 манет), кроссовки (1 сюрс 200 манет) но туфли (1 сюрс манет) басьтӥллям.

— Сяська керттэт пумысен сюлмаськозы ини Ленӥмылэн песянаез но песятаез, — шуэ Инна. — Соос Сарапул городын уло. Отысь теплицаысь дунтэм ӵыж-горд розаос ваёзы. Малпасько, 350 манетлэсь ятыр со уз луы.

Йылпумъяны луоз: Никитинъёс школалы дасяськонлы ог 15 сюрс манетсэс быдтӥллям. Пыртоно ке комнатаын ремонтэз — 45 сюрс.

Шыръяны дышизы

Пичи Пурга черкогуртысь Семёновъёслэн 3 пиоссы. Шоретӥез — Владик — 1-тӥ классэ дасяське. Анаен-атай пизэс школалы дасяны кутскиллям августэ гинэ.

— Вазьгес ӧм вырӟе, угось ӵапак августэ бадӟым магазинъёс пӧртэм акциос ортчытъяны кутско: 2 арбери басьтӥськод, 3-тӥзэ кузьым чот дунтэк сёто. Озьы дэремъёс 600-700 манетэн сыло ке, ми 450 манетэн басьтӥмы, — вера Людмила Семёнова.

Бадӟымез пизы школае ветлэ ини бере, егит анай тодэ, кызьы уксёез шыръяны луэ. Магазинъёсы вамыштэмезлэсь азьвыл бумагае гожтэ, мар кулэ. Озьы кулэтэм арбериослы уксё уг кошкы, басьтоно вуз вуныса уг кыльы.

— 1-тӥ пимылы, сюрлыез медаз кырыжтӥськы шуыса, дуно рюкзак басьтӥмы вал. Но со мыным ӧз кельшы: буш песьтэр килограммлэсь ятыр кыске! Книгаос, дӥсьёс понӥськод ке, секталаез ог 10 килограмм луэ. Соин ик 2-тӥ пимылы 1 сюрс 200 манетэн огшоры рюкзак басьтӥмы. Чакламы огзэ гинэ: кутонъёсыз 5 сантиметрлэсь сюбеггес медаз луэ. Та сяна, школаын куро спортъя костюм. Бадӟымез пие штанзэ нуллӥз, нош кофтазэ огпол но ӧз дӥсялля. Соин ик Владикмылы 600 манетэн бызьылыны штан гинэ басьтӥмы. Фломастеръёс, карандашъёс 36 буёлозэ басьямы вал. Сомындаез школаын кулэ уг луы вылэм. Владиклы 8 буёлэнзэ гинэ кутӥмы. Пыдкук нуллон сумка, бубыли-галстук ачим вури. Озьы шоретӥ пимес школалы пӧрмытыны 10 сюрс манет тырмиз.

Дунъёс будӥзы

Удмуртстат арлы быдэ лыдъя, шорлыдын кӧня уксё кулэ нылпиез 1-тӥ классэ сётон понна. Туэ лыдпус, кылем арын сярысь, 1 сюрс 200 манетлы йылэм. Пиосты дасян 11 сюрс 700 манет тыр усем, нылъёсты — 11 сюрс 800 манет. Дунъёс будэмын ваньмызлы: школа форма — 250 манетлы, пыдкутчан — 200-лы, спортъя дӥсь — 340-лы, песьтэр — 400 манетлы.

Пусъёно: 11 сюрс 800 манет пушкы пыртэмын ӧвӧл ноутбук но телефон. Куд-ог школаосын куро, нылпилэн ноутбукез одно ик мед луоз шуыса. Элькунамы солэн шоро-куспо дуныз 29 сюрс манет котыр. Огшоры телефонъёс ог 3 сюрс манет сылӥзы, смартфонъёс — 11 сюрс 700 манет. Озьы 1-тӥ классэ вамыштӥсьлэн дуныз 45 сюрс манетозь будӥз.

Туспуктӥз А. Горбунов

 

Удмурт Дунне
By Удмурт Дунне Сентябрь 1, 2017 12:34