Дун-чылкыт ужен выро кышкасьтэмъёс

Удмурт Дунне
By Удмурт Дунне Сентябрь 20, 2017 16:19

Ижысь Елена Макарова кисточкаоссэ, буёлъёссэ киысьтыз одӥг нуналлы но уг куя. Яратоно ужез — черкъёсысь борддоръёсты буян — усто мед пӧрмоз шуыса, быгатонлыксэ ялан волятэ.

Ижысь Елена Макарова.

Удмурт кун университетысь художественно-графической факультетын дышетскыкуз, Лена тодэ ини вал: тросэз эшъёсыз сямен инкуазез, адямиосты, пӧйшуръёсты суредаса уз пукы. Солы тунсыко потӥз стенопись. Таиз угось трослы секыт: бадӟым быгатонлыкед вӧзын одно ик мед луоз визьмыд — черк борддоръёсты суреданъя куронъёс юнэсь. Но соосты Лена пичиысен йыраз кельтӥз.

— Атае ожгарчи вал, соин семьямы я отын, я татын улӥз, — веранзэ мытэ нылаш. — Вордӥськи Владивостокын, быдэ вуи Самараын. Собере анаеным но атаеным берытскимы вордӥськем палъёсазы — Удмуртие. Вань та городъёсысь пичизэ но, бадӟымзэ но черкъёсты эскерыса потӥ: кызьы суредамын Дун-чылкыт адямиослэн тусъёссы, кыӵе сюжетъёс, буёлъёс кутэмын… Пӧртэм юанъёсын ёртылӥ отын ужась баӵкоосты. Черкъёсты суреданы мылкыдме зол бугыртӥз Россиысь дано суредась Виктор Васнецов. Со шуэ вал: обросъёсты, черкъёсты суредан — дун-чылкыт уж!

Университетын дышетскыкуз, Лена котыре биниськизы стенописен тунсыкъяськись нылъёс но пиос. Озьы соос уж борды басьтӥськизы. Уг учко, черк вуж яке выль, шаерамы яке элькунмылэн палэназ сылэ — соку ик сюрес вылэ пото. Черкез суредакузы, бадӟым куараен, жоб кылъёсын уг верасько, тамак уг кыско. Нылъёс котьку кышетэн, дэремен пӧрмытско. Вис карыкузы, гитара улсын кырӟало, тылскем дурын пуко.

— Ужамы пӧртэм стильёсты кутӥськомы: византийской, древнерусской, академической но мукет. Шуом, Москваысь Георгий Победоносецлы сӥзем черк чебермамын византийской амалэн, Ижысь Инмар Анайлы сӥзем храм — академической. Дун-чылкыт адямиосты суредакумы, тусъёссэс часэн-часэн дышетыны выриськомы — черкъёс пӧртэмесь, нош тусъёс огвыллемесь пӧрмыны кулэ. Соосты нырысь пыр адскись бумага вылэ гожмаськомы, отысь ини борддоре пуктӥськомы.

Черкысь борддорез суредаку.

Кылем арын тулыс Лена эшъёсыныз ӵош ужаз Можга ёросысь Бадӟым Кибья гуртысь черкын. Котькудӥз вӧсяськон инты нылашлэн сюлэмаз, пе, пытьы кельтэ.

— Кибьялась черк туж вашкала вылэм. Тае нырысь ик шӧдӥзы… пельёсмы — суредаськыку чирдэм куараос шуккисько. Нырысь малпалляй, мыным гинэ озьы потэ шуыса. Но берло эшъёсы но та сярысь веразы. Гуртоос шуизы, озьыен, пе, Инмар черкез выльдон ужъёслы бакельзэ сётэ. Пусъёно, татысь пересьёс милемыз туж шуныт пумитазы. Ӝог шедьтӥзы улон инты, кӧттырон. Толэзь куспын ужмес йылаз-пумаз вуттӥмы.

Та бӧрсьы егитъёс нош сюрес вылэ дыртӥзы. Ярославль улосысь Переславль-Залесский городысь 40 Севастийской Мученикъёслы сӥзем черкын ужасьёс борддоръёссэс выльдыны куриллям.

— Отын ми 5 толэзь пала ужамы. Огез сменамы шутэтске, мукетыз суредаськыны кошке. Черк городлэсь палэнэ интыяськемын — Трубеж шур дурын. Паймытӥз со милемыз: 3 рад укноос сыло, котькудаз пӧртэм наличникъёс тыремын. Черк туж ӝужыт. Соин ик суредаськыку йыр поромылӥз. Нялтас вераса, ӝуждалалэсь кышкасьёс ми дорын кема уг ӝегатско. Яке асьсэос кошко, яке учыр улля.

Переславль-Залесскийын ужакузы, егит суредаськисьёс вуылӥзы Москваысь, Ростовысь, Нижний Новгородысь, Сергиев Посадысь черкъёсы но музейёсы, пумиськылӥзы трос суредаськисьёсын.

— Кибашлыослэн визь-кенешъёссы милемлы туж кулэ, — вера Лена. — Угось огшоры бумага вылэ буёлъёс пуктылыку, тон соку ик адӟыны но дунъяны быгатӥськод: ужед пӧрмиз яке ӧз. Стенописьын ваньмыз мукет. Борддор вылэ суредэз люкетэн-люкетэн маялляськод. Оглом ужез адӟыны луэ, лесаосты (тубатъёсты, кутӥськонъёсты) куяса гинэ. Соку котькудмылэн мылкыдмы ӝутӥське. Гань-гань сюлэмын дормы пала потӥськомы.

Ольга Корепанова

Туспуктэмъёсыз Е. Макаровалэн

 

Удмурт Дунне
By Удмурт Дунне Сентябрь 20, 2017 16:19