Дагестан: Инкуазез чебер, куноез ӧжыт

Удмурт Дунне
By Удмурт Дунне Сентябрь 18, 2017 16:40

Сулак каньонлэн мурдалаез ог 2 иськем.

Туэ Сьӧд зарезь дурын ӧй шутэтскы: калыкен пачылмем ярдуръёс акыльтӥзы. Кужым люкаме потӥз шыпытын. Озьы сюрес вуттӥз монэ Дагестанэ, Каспийской зарезь дуре.

Кыдёкысь но матысь зарезь

Каспийской зарезь зэмзэ но гань-гань вылэм. Пыласькисьёсыз кытӥ-отӥ гинэ адско.  Сьӧд, Горд зарезьёсын ӵошатыса, таиз мыным сюлэмыя луиз. Соин, дыр, татчы Кама но Волга шуръёс усё. Таин сэрен Каспийлэн вуэз сокем сылало ӧвӧл.  Тодосчиос сюлмасько, солэн вуэз, пе, арлы быдэ ог 7 сантиметрлы лазегоме.  Туристъёс ярдуръёсаз 2-3 нуналлэсь трос кылльыны уг чидало — Дагестан соосты инкуазеныз гочатэ.

Зарезьлэсь ог 70 иськемлы палэнэ пуксемын Буйнакск город. Ӵапак со палъёстӥ ортче Россиысь тужгес кузез тоннель — Уйпал (Гимринской) портал. Выльдӥллям сое  2012-тӥ арын. Но гурезь пушкытӥ ог 4 иськемлэсь ятыр кыстӥськись чильк-вальк сюрес гинэ туристъёсты татчы уг гочаты. Дуннелэн пӧртэм сэрегъёсысьтыз тодосчиос но журналистъёс вуо татчы… пӧртмаськемзэ тодыса. Тоннельысь потыса, машинаос, моторзы кысэмын ке но, асьсэос гурезь выллань тубо. Шурысь ву гинэ но улӥысен выллань, пе, ӧръяське!

Нырысь малпалляй: со супыльтонъёс гинэ. Но тоннельысь потэммы бере синъёсылы ӧй оскы — сюрес зэмзэ но пӧртмаське! Азямы мынӥсь машина тыпак дугдӥз. Водитель но вӧзаз пукись воргорон «корт валысьтызы» потӥзы. Машиназы гыж! интыысьтыз вырӟиз. Пиосмурт, телефонзэ поттыса, ваньзэ тае видео вылэ гожтыны кутскиз. Ми но пукыны ӧм чидалэ. Абдрамы: нырысетӥ машина сьӧры кыстӥськиз милямез но!  Аспӧртэм сюреслэн кузьдалаез 1 иськем пала.

Тодосчиос тае пӧртмаськонэн уг лыдъяло. Та интыын пыдлось музъем плитаос, пе, пилиськылэмын, соин отысь кужмо магнит сиос кыре пото. Мынӥсь-ветлӥсьёс та вадесэз шаплы ортчыны тыршо. Сиос укыр золэсь — кинлэн ке йырыз висьыны кутске, кинлэн ке киосыз-пыдъёсыз юскисько…

Тоннель бӧрсьы абдратӥзы монэ 52 иськем кыстӥськись Сулак каньон но отӥ бызись шур. Соосты адӟытэк, Дагестанысь одӥг турист но уг кошкы. Сулак дуннеысь тужгес мурез каньон лыдъяське — мурдалаез 1 сюрс 920 метр. Но ярдураз васькыны, вуэныз гылтӥськыны соку ик уд быгаты — сопалаз но, тапалаз но меӵ, ӝужыт гурезьёс сыло. Та сяна, бадӟым изъёс вискын лачак кыйёс уло. Сюрес но кышкыт — гурезь йылтӥ со пыгыр-погыр ортче, 1 метрлы палэнэ вамыштод — лобӟод. Шурез учкон понна синъёсты улӥе лэзьыны ик шурдыт.

Шокан пытсаське, Чиркей тыэз адӟыса. Пуртыын кадь со зыл-зыл кылле. Шораз туж бадӟым гидроэлектростанция пуктэмын, вӧзаз пичи гурт пуксемын. Куке-соку гурт вӧл-вӧл вылэм, но ӝынызэ Чиркей ньылэм. ГЭС угось синсузёнтэм, вуэз быдэс Уйпал Кавказэз, пе, сектаны тырмоз.

Шуо, Россиын пустыняос ӧвӧл. Учкод ке — вань вылэм. Дагестанысь Махачкала городлэсь ог 20 иськемлы палэнэ кошкыса, вож гурезьёс вискысь соку ик син шоры йӧтэ ӵуж-ӵуж Сарыкум. Ӵапак отысь луое, «Белое солнце пустыни» киноез пуктыку, Саид нимо героез согылӥзы. Сарыкум Европаын тужгес бадӟымез пустыня лыдъяське. Гужем татын 90 градусозь но пӧсь, пе, луылэ. Но ӝокытэз шӧдоно ӧвӧл. Сопалась но, тапалась но вистэм-вожтэм тӧлъёс пельто. Соос пустынялэсь туссэ вошъяло — йылыз я отын, я татын луэ. Сарыкум Горд Книгае пыртэмын. Солэн луояз 350-лэсь ятыр нымы-кибыос уло-выло. Отын кӧс ке но, вуэз яратӥсь топольёс но бадьпуос вез-вез будо.

Уйпал (Гимринской) тоннель гурезь пушкытӥ кыстӥське 4 иськемлэсь ятыр.

Йырез сурась город

Гурезьёс, тыос сяна, Дагестанын синъёсты бордазы кыско городъёс. Зэм, соос асьме Ижкар яке бускель Казань выллем шукресэсь ӧвӧл. Озьы ке но котькудӥз аслэсьтыз туссэ дауръёсын утьыны быгатэм. Нырысь-валысь паймоно, кудаз вамыштыны. Гочатэ Дербент но — дунне вылысь тужгес вашкалаез город, Кубачи но — татын вашкала амалъёсын ож тӥрлык дуро, Гуниб но — Россиысь тодмо суредась Иван Айвазовский татын ужам вылэм…

Кошки Дербентэ. Ӵапак та городэ туристъёслы алигес выль маршрут усьтӥллям. Сое йылысеныз пумозяз учкыны 1 нунал гинэ уг тырмы вылэм. Дагестанэ 14 выжыысь калык интыяськемын. Но Дербентын улӥсьёс 15 шуо. Асьсэды соос нимаз выжыен лыдъяло.

Городэ пырыса, дауръёс сураськиллям кожалод. 14-тӥ даурысь вашкала юртъёс вискы туала кафеос но магазинъёс чуртнаськемын. Улӥсьёсыз туристъёслы вераны дырто: Дербентэз, пе, сьӧд кужымъёс кылдытӥзы, соин бус пӧлысь адями кылдӥз ке, соку ик шахада (вӧсяськон кылъёс) верано — соос ышозы…

Дербентын трос магалъёс — асьме сямен муниципал кылдытэтъёс. Урамъёсаз туала улон пыӵамтэ на: сюрес вылэ кӧльыос куямын, излэсь вашкала коркаос, ог-огзы борды ӝик-ӝик лякиськыса, сыло. Тӥни кытын йыр сураськыны кутске вылэм. Вакчи но сюбег урамъёссы олома мында. Огаз пырыса, берен потыны уд быгаты. Котькуд магаллэн аслаз мечетез. Отчы кинлы сюрем пырыны уг яра. Кузёез ӵогаса возе, ӧсъёссэ усья вӧсяськисьёслы гинэ.

Городлэн мукетыз синмаськымон сэрегез — Нарын-Кала. Изъёслэсь 30 метрлэсь ӝужыт кенер Дербент кузя кошке но 500 метрлы зарезе зыме. Со городэз Каспийской зарезьысь но, Кавказ гурезьёсысь но вуись тушмонъёслэсь утьылэ вылэм. Нарын-Калаын бадӟымез юрт — азьвыл ханлэн. Паськыт залъёс пушкын адско бассейн, шахматэн шудон сэрег, мунчо. Мунчо музъем пушкы лэсьтэмын, вӧлдэтэз вень кадь йылсо. Со, пе, юромо озьы малпамын —  путэк пӧсь-пӧсь эстыны 1 сюсьтыл гинэ тырме, шуо.

Кин ма каре

Дагестанысь калык кунооссэ яратэ но гажа. Котькуд семьялэн, пе, сямыз вань — кулэезлэсь тросгес сиён пӧрало, емыш, пудо будэто. Аслыд сяна, куноедлы но мед окмоз. Тае ас вылам шӧдӥ. Базаре персикъёслы вамыштӥ. Соос татын котькуд вамышын будо ке но, дунзы Удмуртиын кадь бадӟым. Абдрай: вуз карись уксё мычемме витьыса ӧз улы, персикъёссэ сётӥз но «Таза лу!» шуыса келяз…

Зэм, Дагестан — паймымон шаер, Турция, Египет я Греция выллем. Но мукет кунъёсын инкуазьзы, культуразы вылын коньдон поттыны быгато. Дагестанын, жаляса верано,  уг. Туристъёс чиньыен лыдъямон. Син шоры ялан йӧтылэ котькытын лошъяськись жуг-жаг. Амалтэк малпаськод: республика туризм удыссэ рос-прос азинтысал ке, кӧй но вӧй гинэ улысал. Туннэ озьы шуыны уг луы. Кышноос корка, нылпи котырын бергало. Воргоронъёс коньдон потто: одӥгъёсыз емыш будэто, кыкетӥосыз скал кулэсь пыдкук вуро, куинетӥосыз… Россиын лэзьымтэ ИГИЛ огазеяськонэ вамышто. Таослэн туспуктэмъёссы полицилэн ваньмаз сямен ёзъёсаз ошылэмын. Дагестанысь югдурез утисьёслы соосты кырмыны юртто Удмуртиысь но полицейскойёс.

Ольга Никитина

 

Удмурт Дунне
By Удмурт Дунне Сентябрь 18, 2017 16:40