Яр ёросысь ужбергатӥсь Андрей Саламатов пуэн выронъя завод пуктыны медэ

Удмурт Дунне
By Удмурт Дунне Август 9, 2017 15:02

Гуртэз азинтозы ужбергатӥсьёс. Яр палъёсын соос вань. Ёросэ потакуз, соосын тодматскиз Удмуртилэн Тӧроезлэсь ужзэ быдэсъясь Александр Бречалов. 

Андрей Саламатовлэн пуэн выронъя предприятиез.

Биграгуртын аслэсьтыз ужзэ бергатэ фермер Андрей Саламатов. Со пуэн выре: пул, корка, погонаж, эстӥськон пызь… Ваньзэ тае поттэ Андрей Саламатов. Али тросэз материалэз куштӥське — кылем-мылем пу эстӥськонлы яке мукет материалъёс лэсьтыны ярасал. Номыр медаз куштӥськы шуыса, пуктоно завод. Таӵе сюрестӥ вамышъяны медэ егит ужбергатӥсь, кулэ ужтӥрлык басьтэм ини. Озьыен, азьланяз та предприятиын ужан интыос но йылозы.

— Али ми 250 тонна эстӥськон пеллетъёс поттӥськом, ӧдъяськом 1 миллион 500 сюрс тоннаозь йылэтыны. Озьыен, кылем-мылем пумы, пу пызьёсмы уз куштӥське ни, — шуэ ужбергатӥсь.

Предприятие вуззэ кунгож сьӧрысь 6 кунъёсы, Россиысь пӧртэм сэрегъёсы вуттэ. Но шуг-секытсы вань ик: кунгож сьӧры вуз куинетӥ адямиос пыр потэ, озьыен, вузлэн дуныз но будэ, со понна заказчикъёсын шонерак кусып тупатоно. Тӧролэсь ужзэ быдэсъясь Александр Бречалов та пумысен юрттӥсько шуиз.

Биграгуртысь Александр Бречалов кошкиз ёрос центре. Татын со пумиськылӥз ёрос активен, пыраз ужбергатӥсьлэн Наталья Никифоровалэн вуриськон предприятияз. Цех 11-тӥ арзэ ужа ни ке но, ӧсъёссэ дырын-дырын гинэ усья — гужемзэ Юкаменск но Яр ёросъёсысь школаосын дышетскисьёслы форма, куд-ог дыръя гуртысь коллективъёслы, спорт командаослы дӥсь вуре. Ужбергатӥсьлэн усьтэмез потэ аслэсьтыз магазинзэ, ательезэ, но со понна сертификат басьтыны кулэ. Уг пӧрмы на —  тыриськонъёсыз трос. Соосты кышномурт ворсасал,  ужбергатӥсьёслы юрттӥськись фондысь ичи процентэн кредит басьтысал ке. Александр Бречалов соку ик Удмурт Правительстволэн ёзчиосызлы вазиськиз, ужбергатӥсьлы юрттӥськыны курыса.

Нош Ярысь улӥсьёсты сюлмаськытто сюресъёс: Кирове котыр сюрес урод бере, бадӟым фураос Яр пыр кошко, посёлокысь сюресъёсты быдто.

— Ми валаськом, котыр сюрес туж кулэ, амал утчалом,  вуоно арлы сюрес быдэсак тупатъямын мед луоз шуыса, — вераз Александр Владимирович.

Сергей Захаров

Туспуктэм: udmurt.ru

 

Удмурт Дунне
By Удмурт Дунне Август 9, 2017 15:02