Выль: Ужрад шулдыр эшъёсын, нош бакча – емышъёсын

Удмурт Дунне
By Удмурт Дунне Август 8, 2017 16:45

«Удмурт Кенеш» огазеяськонлэн Можгаысь ёзэтэз 2004-тӥ арысен Выль шулдыръяськонэз радъя. Нырысетӥ аръёсаз ужрадэ Можга карысь калык гинэ пыриськылӥз, собере ёросысь гуртоос но кыстӥськизы. Кылем арын празднике лымшор ёросъёсысь бускельёс вуылӥзы. Нош туэ «Выль» шулдыръяськон элькун инлык басьтӥз.

5-тӥ гудырикошконэ Можгаысь Сюга шур дурысь возьвылэ 2 сюрс 500 пала адями люкаськиз. Можгаос кунооссэс шулдыр удмурт кырӟанъёсын, ческыт сиён-юонэн, пӧсь чаен пумитазы. Выль праздникез сӥё-дано усьтон ужрадын люкаськем калыкез элькунысь но интыысь кивалтӥсьёс ӟечкылазы.

— Можга музъем вылын сьӧлыктэм калык улэ. Ми сое валамы туэ элькун Герберез ортчытыку, — вазиськиз национальной политикая министрлэсь ужзэ быдэсъясь Лариса Буранова. — Инвожо толэзе зор ведра дурысь кадь кисьтӥз. Нош праздникмы вуиз но, Инмар асьмелы шундыё нуналзэ кузьмаз. Мон туж шумпотӥсько туннэ асьмеос нош ик люкаським шуыса. Азьланяз но тазьы ик уртче ужаны но, шутэтскыны но мед быгатом. Элькун Кивалтэтлэн но Удмуртилэн Тӧроезлэсь ужзэ быдэсъясьлэн Александр Бречаловлэн нимынызы  ӟечкыласько но сӥзисько ваньдылы юн тазалык, шудбуро но ваньбуро улон. Собере кыл сётэмын вал «Удмурт Кенеш» огазеяськонлэн тӧроезлы Татьяна Ишматовалы.

«Удмурт Кенеш» огазеяськонлэн Тӧроез Татьяна Ишматова калыкез Выль шулдыръяськонэн ӟечкылаз.

— Бур нуналэн, гажано люкаськем калык! Шумпотымон, элькунысьтымы ёросъёсысь сяна, татчы бускель Татарстан улосысь но куноосмы вуизы шуыса. Кин тыршыса ужа, со ик шулдыръяськыны но дыр шедьтэ. Вашкала удмурт сям-йылолъёсты утьыса, лулчеберетмес азинтыны мед быгатом. Куазьмы мед удалтоз, ӝӧкмы тыр мед луоз, — сӥзиз Татьяна Витальевна.

Нош «Можга ёрос» муниципал кылдытэтлэн йырыз Аркадий Вершинин ӧпкельыса пусйиз:

— Котьку но та шулдыръяськонэ выль ӟег пызьлэсь пыжем нянь сукыриен лыктӥсько вал. Туэ, зоро куазен йырин, озьы ӧз пӧрмы. Туннэ нуналлы бусыосы одӥг комбайн но ӧз поты на. Нош азьвыл аръёсы гудырикошконлэн кутсконаз ӟегез араса но, октыса но вуттӥськом вал ини. Одӥг осконэн улӥськом: шуныт шундыё нуналъёс кемагес кыстӥськозы, Инмар шепаськем ю-нянез дасяны одно ик луонлык сётоз.

Вожвылъясько быдэ вуисьёс.

 

Шулдыръяськонэз сӥё-дано усьтэм бере куноос возьвылын кылдытэм «Выльгуртэ» дыртӥзы. Нянь, Йӧл, Сӥль, Чечы, Чорыго но Емышо урамъёстӥ юмшазы. Гурт удысын ужасьёс татын сиён-юонъёсын вузкарон радъязы. Котькудӥзлэн пыжиськемъёсын, сӥльтыремъёсын, али гинэ кыскем чечыен но мукет сиёнъёсын кунояськыны луонлыкез вал. Нош «Паймымон емышъёс» но «Бакча сульдэр» адӟытонъёсысь тумошо арбериос калыклэсь мылкыдзэс ӝутӥзы.

14-17 аресъем пиналъёс понна «Шунды» огазеяськонлэн Можгаысь ёзэтэз «Быдэ вуон» площадка радъяз. Ӵошатсконэ Можга, Кизнер, Грак ёросъёсысь но Можгаысь быдэ вуоно нылъёс но пиос пыриськизы. Татын соос табань пыжыны, пу вандыны, кортӵог шуккыны быгатэмзэс, удмурт сям-йылолъёсты, визькылъёсты тодэмзэс возьматӥзы. Со сяна, егитъёс кускерттон пуныны но вож нуныез биняны дышетскизы. Спортэн эшъяськисьёс асьсэлэсь кужымзэс «Быгылес сяртчыос» ӵошатсконын мертазы. 1-тӥ интые Грак ёросысь команда потӥз, 2-тӥ интыез Кизнер ёросысь куноос басьтӥзы, 3-тӥ инты Можгаысь егитъёслы сюриз.

Бакча емышъёсын адӟытон.

Нош кузпалъёс пӧлын «Азвесь сюрло» ӵошатскон ортчиз. Татчы Можга, Алнаш, Кизнер, Сюмси ёросъёсысь 6 семья пыриськиз. Соос карнанэн ву нуллӥзы, емышъёслэсь бакча сульдэр пӧрмытӥзы, мунчо ӵупизы, культо но веник керттӥзы.

Та нуналэ возьвылэз чебер удмурт крезьгуръёс шулдыртӥзы. Можгаын ортчись «Яркыт веран» фестивальын возьматэм тужгес но усто номеръёс чузъяськизы. Нылпиосын семьяос «Кӧжыпогъёс» вожвылъяськонын удмурт кырӟанъёсты быдэстӥзы. Тужгес но устоен Шумиловъёслэн семьязы лыдъямын. Мылкыд карисьёс Можгаысь шаертодонъя музейысь ӧнерчиосын ӵош такмакъёс кырӟазы. «Выль» шулдыръяськон яркыт эктон программаен йылпумъяськиз.

Выльлы сӥзем шулдыръяськонъёс озьы ик ортчизы Ижын но, ёросъёсын но.

Мария Мамонтова

Туспуктэмъёс: vk.com («Октябрь» культурая юрт)

 

Удмурт Дунне
By Удмурт Дунне Август 8, 2017 16:45