Удмуртилэн азьвыл тӧроез Александр Соловьев домашний арест  улэ лэземын

Удмурт Дунне
By Удмурт Дунне Август 11, 2017 11:27

Интерфакс ивортэмъя,  Москваысь  Басманной суд Удмуртилэсь азьвыл тӧрозэ Александр Соловьевез СИЗО-ысь дораз — домашний арест  улэ — лэзиз.

А. Соловьев ӝегатэмын вал 4-тӥ апреле коррупциен выремез понна.

Сыӵе  куронэн (ходатайствоен)  судэ кыкетӥзэ вазиськиз ни следствие. Азьвылаз  А. Соловьевез ӧз лэзе, нош та рад судья Елена Ланская солы дурбасьтӥз.

А. Соловьев ӝегатэмын вал 4-тӥ апреле коррупциен выремез понна, келямын Москваысь СИЗО-е. Со нуналэ ик Россилэн Президентэз  Владимир Путин сое  осконзэ ыштэм понна отставкае келяз. Кызьы ивортылӥзы, А. Соловьев та ужъя  показаниос сётэ, сьӧлыкезлэсь уг сеськы.

Следствие мынытозь, Басманной суд арест улэ басьтӥз А. Соловьевлэсь Ижысь квартиразэ, Изгуртысь  юртсэ но нылъёсызлэсь ваньбурзэс: Ижысь но Москваысь 7 квартиразэс, 2 музъем участоксэс но машиназэс.

Следствие кыскемын 14-тӥ октябрёзь.

Ольга Корепанова

Удмурт Дунне
By Удмурт Дунне Август 11, 2017 11:27