Удмурт кылъя лагерьын дышетскиз 40 адями. Кытын со ортчоз вуоно арын?

Удмурт Дунне
By Удмурт Дунне Август 2, 2017 15:07

Удмурт кылъя лагерьын дышетскиз 40 адями. Кытын со ортчоз вуоно арын?

Кылем арняе йылпумъяськиз «Яратоно удмурт кыл» лагерь. Арня ӵоже Кияса ёросысь Вуж Сальялалан улӥзы 40 пала пиналъёс но мӧйыос, удмурт кылэз дышетыса.

Кин ке лагерьын улӥз арня ӵоже, кин ке одӥг-кык нуналлы гинэ вуылӥз. Лагерь Россилэн пӧртэм сэрегъёсысьтыз адямиосты огазеяз: Санкт-Петербургысь, Москваысь, Чувашиысь, Татарстанысь… Пӧлазы вал семьяосын лыктэмъёс, океанолог, кылчиос но мукет удысъёсын ужасьёс. Куное пыразы Удмурт кун университетэ удмурт кылъя курсъёсы вуэмъёс но.  Соосын туж визьмо но тунсыко лекторъёссы вал. Нылпиосты дышетӥз Оксана Крылова, удмурт кыллэсь радлыксэ валаны юрттӥз кылчи Артём Федоринчик, вераськыны дышетӥз удмурт кылъя  дышетӥсь Наталья Дмитриева, нош кылысь кылэ берыктылӥсьёсын ужаз удмурт азьветлӥсь Дарали Лели. Лекция лыдӟизы Москваысь Ольга Урасинова но Артём Малых, Финляндиысь Светлана Едыгарова-Мантель но мукетъёсыз.

Туэ лагерьын 4 группа вал ке: нылпиослы, 2-ез — кылэз тодӥсьтэмъёслы но кылысь кылэ берыктӥсьёслы. Азьланяз малпан вань усьтыны 5-тӥ группа — ар ӵоже удмурт кылъя курсъёсы ветлэм адямиос понна. Уго тросэз удмурт кылэн тодматско но, нош ик солэсь палэнтӥсько: ӧвӧл адямиос, кинэн соос вераськысалзы. Нош та лагерьын кылдыны быгатысал пичи общество. Оло, азьланяз, татын вордскысалзы ӟеч малпанъёс.

Лагерь дыръя ортчизы 25-лэсь уно пӧртэм ужрадъёс.

— Жаляса верано, лагерямы удмуртъёс туж ӧжыт пырисько, — шуэ проектлэн кивалтӥсез Евгения Лекомцева. — Соос тросгес луысалзы ке, ми нимысьтыз группа но усьтысалмы, соос проектъёс бордын ужасалзы.

Удмурт кылъя лагерьын удмурт кылэз гинэ дышето шуим ке, янгышалом. Солэн бусыез туж паськыт.  Нуналлы быдэ тунсыко ужрадъёс ортчылӥзы: котырес ӝӧкъёс, лекциос, удмурт калыклэн культураеныз, литератураеныз тодматсконъёс, адямиос гурт калыклэсь улонзэ, удмурт сям-йылолъёсты но адӟизы, оглом вераса, удмурт улонэ зымизы. Озьыен, дышетскисьёс шумпото: туэ лагерь зэмзэ но котыр ласянь удмурт шӧмо вал.

Нылпиосын урок.

— Лагерьын мон пушкын нош ик лингвист сайказ, табере мон тунсыкъяськисько фин-угор кылъёсын но. Мон кылъёсты ӵошатӥсько, кылъёсысь огкадьзэ, пӧртэмзэ утчасько, выжы калыкъёслэн кылъёсынызы вырисько, — вера Ижысь Александра Ивойлова. — Арня ӵоже мон выйи удмурт кылэ, тодматски усто адямиосын, лагерь пумын мон пичияк валаны но кутски, мар сярысь верасько удмуртъёс. Табере мон борды лякиськиз «Ой, пипу куар» кырӟан, 3-тӥ нуналзэ йырысьтым уг кошкы ни.

Удмурт кыл вылын уд узырмы — та веранэн тросэз соглаш луозы. «Яратоно удмурт кыл» лагерьлы но нокыӵе уксё уг висъяськы. Егитъёс асьсэос сое малпазы, лэсьтӥзы. Удмурт кылэз дышетыны мылкыд карисьёс татчы, асьсэос уксё тырыса, лыкто. Кылсярысь, арня ӵоже сётоно луиз 8 сюрс манет (!), кин улӥз палаткаын — ӧжытгес. Вань уксё кошке сиён-юонлы но изён интылы. Валамон, асьсэос радъясьёс бадӟым ыштонъёс адӟо. Ми али ним лэсьтӥськом ай, шуо соос. Но югдур секытгес. Соин ик утчало грант. Озьы лагере адямиос но тросгес вуысалзы.

Урокез нуэ дышетӥсь Наталья Дмитриева.

— Тодмо ини: вуоно арын лагерьмы ортчоз 30-тӥ инвожоысен 7-тӥ пӧсьтолэзёзь. Ум тодӥське на, кытын. Вазиськиськом лыдӟисьёслы, гуртоослы: кин милемыз пумитаны дась, лыктомы тӥ доры, — вера Евгения Лекомцева. — Возьмаськом «Удмурт Кенеш» огазеяськонлэсь юрттэтсэ, жаляса верано, ёрос администрациослэн но милемын вераськемез уг поты. Пичи административной юрттэт гинэ но милесьтым ужмес трослы капчиятысал.

Тодады вайытом, «Яратоно удмурт кыл» лагерь нырысьсэ ортчиз кылем арын Кез ёросысь Мыркчиньыпи гуртын.

Мария Векшина

Туспуктэмъёс: vk.com («Яратоно удмурт кыл» лагерь)

Удмурт Дунне
By Удмурт Дунне Август 2, 2017 15:07