«Удмурт Кенешлэн» ӵектэмезъя Ижын кылдоз этнопарк

Удмурт Дунне
By Удмурт Дунне Август 2, 2017 15:35

«Удмурт Кенеш» огазеяськон ӵектэ Ижысь Кызьпу арамаын удмурт этнопарк лэсьтыны. Та пумысен маде «Удмурт Кенеш» огазеяськонлэн вице-президентэз Владимир Байметов.

— Владимир Александрович, кылем арын гинэ вераськон мынӥз кызьпу арамаын спортъя бадӟым комплекс лэсьтон сярысь. Но, шӧдске, со проект палэнтэмын. Нош «Удмурт Кенешлэн» этнопарк пумысен дэмланэз улонэ пыӵалоз-а?

— Малпасько, та ужпум борды ми туж дыраз кутским. Соин ик оскисько быдэсмонэзлы но. Та нуналъёсы «Удмурт Кенеш» огазеяськонлэн активез, удмурт движениысь кивалтӥсьёс Кызьпу арамаын пумиськылӥзы Удмуртилэн Тӧроезлэсь ужзэ быдэсъясен Александр Бречаловен но Ижлэн тӧроеныз Юрий Тюринэн. Кызьпу арамаез выльдон-чебертон, удмурт шӧмъем карон сярысь рос-прос вераськон мынӥз.

Александр Бречалов пусйиз, али парклэн тусыз солы воксё уг кельшы. Та интыез ӟечгес, калыклы ярамонгес лэсьтоно, татын вань мылкыд карисьёс спортэн вырыны мед быгатозы, пичи нылпиос анай-атайёсынызы мед поръялозы, пӧртэм ужрадъёс, мастер-классъёс мед ортчылозы.

Александр Бречалов пумит луэ парке кыӵе ке бадӟым юртъёс, спорткомплексъёс пуктонлы. Соин соглаш луо Ижлэн кивалтӥсез Юрий Тюрин но, уноез «кенешчиос» но. Та инты чебер вож зона луыса ик мед кылёз. Но сое чебергес, туала улонлы тупасьгес кароно.

— Ижысь удмуртъёс понна Кызьпу арама аспӧртэм вӧсь инты но луэ. Татын арлы быдэ ортчыло Гербер, Выль. Соослэн ӵуказе нуналзы кыӵе луоз?

— Та праздникъёс Кызьпу арамаын азьланяз но ортчылозы. Соосты удмуртъёс гинэ ӧвӧл, мукет калыкъёс но яратӥзы ни. Туэ гинэ Гербере 7 сюрс пала  адями пыриськиз. «Удмурт Кенешлэн» активеныз вераськыса, ми огкылэ вуимы: парклэн одно ик удмурт тусыз, шӧмыз луыны кулэ. Кыкетӥез, татын нылпиосын ӵош шутэтскыны, поръяны мед луоз. Куинетӥез, спортэн вырыны, тазалыкез юнматыны. Кылсярысь, Александр Бречаловен парк кузя поръян вискын гинэ вӧзтӥмы куас бодыосын нылкышноос ортчизы, соос азьланяз но татын тазалыксэс юнматыны мед быгатозы. Арамаын вань баскетболэн шудон площадка. Азьланяз но со мед луоз.

Ижысь кызьпу арамалэн тусыз но пуштросэз сярысь вылӥ кивалтӥсьёсын вераськон.

Ми, «кенешчиос», дэмласьком парке 2 сцена лэсьтыны. Одӥгзэ бадӟым лэсьтыны луысал, чебер удмурт тусо амфитеатр выллем. Ма, нылпи площадкаослы но удмурт шӧм пыӵатыны кулэ.

— Вераськонъёс мыно вал татын удмурт кафе усьтон сярысь…

— Та малпанэз ми умоен лыдъяськом. Паркын эшшо туж тунсыко инты вань на. Азьвыл верамъёсъя, тапалан, пе, удмуртъёс вӧсясько вылэм. Со интые пуктэмын бадӟым из. Ми дэмласьком та дун-чылкыт из котырез чебертыны.

Паркын ошмес но бызе. Зэм, эскеронъёс возьматӥзы, солэн вуэз юыны но мисьтӥськыны ярантэм. Озьы ке но, со ошмес котырез но чебертыны луысал, аспӧртэм тымет яке шур выллем лэсьтыса.

Паркез выльдыны оскемын луоз Ижысь ик Горький парклэн кузёезлы. Ми туж оскиськом, дэмланъёсмес лыдэ басьтозы шуыса. Та нуналъёсы «Удмурт Кенешлэн» Ижкарысь активеныз пумиськылћм, этнопаркез азинтонъя дась концепциез эскерим ини. Матысь дыре нош ик пумиськылом Ижкар городлэн администрациеныз.

Елена Миннигараева

Туспуктэмъёс: Вячеслав Бакулев, vk.com («Удмурт Кенеш»)

 

 

Удмурт Дунне
By Удмурт Дунне Август 2, 2017 15:35