Удмурт эксэй Вестеросын

Удмурт Дунне
By Удмурт Дунне Август 11, 2017 16:50

«Игра престолов» сериаллэн 7-тӥ сезонэз кутскиз, нош мон та сериалъя Mount & Blade: Warband (Clash of Kings мод) компьютерной шудонэн шудӥ.

«Игра престолов» сериалъя шудонысь кадр.

Та яркыт но лек шудонын стратегия но RPG огазеямын. Вир пазяське, калык черекъя, героед канжаськыса усьылэ — зэмос улонын кадь. Туж трос чыры-пырыос малпаса лэсьтэмын, суредамез ӟеч. Сюжетэз азинтон понна ачид сюлмаськиськод: мар потэ, со ик кариськод, эрико дунне кадь. Кыӵе ке лорд понна ожмаськыны луэ, кылсярысь, Оберин Мартелл понна, яке пӧртэм йыружчиослы юрттӥськыны, яке аслыд отряд кылдытыны. Опыт люкаса, котькудӥз жугиськись кужмогес луэ: всадник яке ӟеч ыбылӥськись луон понна 5-6 этап ортчоно. Уксё но опыт люкасько ке, героедлы бадӟым каръёсын сю миллион ож тӥрлык но дӥськут  бырйыны луэ. Аслад отрядэныд замокез киултӥд ке, выль кун кылдытӥськод (мон вал Арсури кунлэн  Чудья Жени эксэез). Бускельёс собере тонэн ожмаськыны вуо. Соин ик нырысь пичи но ляб кунъёс вылэ мыноно, кылсярысь, Эссос материке, малы ке шуоно Вестеросын вань кунъёс бадӟымесь но золэсь.

Тунсыко: 1 толэзь ортчыса, эрико калык (одичалые) огазеяськиз, собере Уй Дозорен но Уйпалэн ожмаськиз. Озьы луиз но, мон мынӥ Манс Налётчик (эрико калыклэн азьветлӥсез) доры но солэн вассалэз луи, нош аслам кунэ (2 кар но 10 замок) солэн музъемез луиз.

Куддыръя «Игра престолов» сериалысь тусъёс тодам лыкто: Сьӧд Замоке пырыса, учкисько ке ӝужыт йӧ борддор шоры, Эксэй Гаваньын Варисэз но Мизинецез пумитасько ке. Теон Грейӝоез пленэ басьтӥ но аслым Рамси (сериалын Теонэз кырмись) кадь потӥ. Табере мон тодӥсько «Игра престолов» сериаллэн дуннеысьтыз вань каръёсты, замокъёсты но соослэсь интыяськемзэс. Сериалэз яратӥсьёслы та туж зол тупась шудон.

Чудья Жени

 

 

 

 

Удмурт Дунне
By Удмурт Дунне Август 11, 2017 16:50