Россиысь сиён-юонъёслы сӥзем картае пыриз перепеч

Удмурт Дунне
By Удмурт Дунне Август 11, 2017 13:18

Удмурт калык пӧрамъёс пыризы Россиысь сиён-юонъёслы сӥзем картае.

Россиын улонэ пыӵа «Лэсьтэмын Россиын» проект, со бизнесэз, культураез азинтыны юрттоз. Али пӧртэм улосвылъёстӥ ветлэ экспедиция, чакла: кыӵе сиён-юонэныз ушъяськыны быгатэ соиз яке таиз улосвыл. Та нуналъёсы экспедиция вуылӥз шаерамы. Куноос пыразы Сарапул ёросысь Нечкиное, Ижысь «Бобровая долина» этнокомплексэ — татын соос веръязы удмурт сиён-юонъёсты, пумиськонэ ӧтемын вал Брангуртысь песянайёс но.

Перепечъёс — нырысетӥосыз пӧлысь, мар та картае Удмурт Элькунлэсь пыртэмын луоз.

— Сиён-юонъёслы сӥзем карта вань улосвылъёсын кылдыны кулэ, со возьматоз кунмылэсь узырлыксэ. Россия — со Зарни кольцоысь городъёс гинэ ӧвӧл, кунмы ушъяськыны быгатэ пӧртэм калыкъёслэн сиён-юонъёсынызы но. Картаын возьматэмын луоз, кыӵе сиён-юонъёсты потто сояз я таяз улосын, кыӵе калык пӧрамъёсты отын веръяны быгатозы куноос, кыӵе ресторанъёс соосты пӧрало, сётэмын луозы рецептъёс но. Перепечъёс — нырысетӥосыз пӧлысь, мар та картае Удмурт Элькунлэсь пыртэмын луоз, — вераз проектлэн кивалтӥсез Екатерина Шаповалова.

Удмурт сиён-юонъёсын тодматскыкузы, куноос веръязы зыретэн табанез, пӧртэм перепечъёсты, кирень куарен бинялтыса пыжем чипеез, виртыремез, пельнянез но мукет пӧрамъёсты.

— Удмуртиын туж дун-ъясько гордкушманлэсь сиёнъёс — ми та бакча сиёнэз пыжиськом, пӧзьтӥськом, туйиськом. Огез пӧраммы — вароген пыжем гордкушман, — шуиз ресторан возись Кирилл Барков.

Экспедиция 3 интые гинэ вуылӥз ай, 3-тӥез — Удмуртия. Со возьматэ: шаермы туристъёслы сиён-юонъёслы сӥзем фестивальёсыныз тодмо ини. Со понна тау шуоно «Быг-Быг», «Пельмень-фест» ужрадъёслы. Кылсярысь, «Пельмень-фестлы» луыса шаермы Гиннесслэн рекордъёсъя книгаяз сюриз — татын мында пельнянь нокытын ӧз на сие.

Вераны кулэ, та карта Россиысь калыкъёслэн сиён-юонъёсынызы гинэ уг тодматы, со улосвылын дасям вузлы Россиысь но кунгож сьӧрысь вуз каронниосы потыны юрттоз. Удмурт шаермы быдэсак ассэ сюдэ, вузмы кыле но на. Озьы 47 процент йӧлэз, 50 процент сӥлез, 100 процент курегпузъёсты луэ палэнын вузаны.

Россиысь сиён-юонъёслы сӥзем экспедиция сюрессэ мытӥз 3-тӥ гудырикошконэ Суздальысен. Азьланяз со кошкоз Владимир, Ростов, Самара, Тула но мукет улосвылъёстӥ. Та картаез шедьтыны луоз russia.travel вотэс бамысь. Проектэз радъяло Туризмъя федерал агентство, Россиысь экспортъя центр,             Отель но ресторан возисьёслэн федерацизы.

Сергей Захаров

Туспуктӥз А. Горбунов

 

Удмурт Дунне
By Удмурт Дунне Август 11, 2017 13:18