Пичи Пурга: Ужбергатӥсьёс вань, но дась-а соос потыны бадӟым рыноке?

Удмурт Дунне
By Удмурт Дунне Август 4, 2017 22:18

Удмуртилэн Тӧроезлэсь ужзэ быдэсъясь Александр Бречалов туннэ потаз Пичи Пурга ёросэ. Пумиськылӥз ёрослэн активеныз, Вуж Мӧнья гуртысь калыкен.

Вуж Мӧнья гуртын вань нянь пыжонъя, сӥль тырем поттонъя но мукет предприятиос. Уж инты вань, соин ик гуртэ егитъёс но кыле — татын соос 600 пала. Ӟеч азинске киужъёсъя центрзы но.

Гурт калыкен пумиськыку.

“Надежда” СПК-ен кивалтӥсь Бронислав Ясонов, аслаз предприятиеныз тодматыкуз, малпанзэ вераз: кулэ вылэм шаерамы бакча сиён будэтонъя программа кылдытыны. Гурт калыкез сюлэмшугъяськытто сюресъёс, нылпи сад — татын, пе, ӧсъёсты вошъяно, выжзы кезьыт — школалы кулэ автобус но мукет. Озьы ик шараяськиз тунсыко югдур: Выль Мӧнья гуртысь “Родина” СПК-лы пумит валантэм йыружъёс лэсьтӥсько: одӥг мурт колхозэз ас кияз басьтыны турттэ. Со понна али кивалтӥсьсэ кышкатъя, ужасьёс вылэ омырске, производствоез куспетӥ каре. Ёрос Прокуратура та югдурез тупатыны  уг выры, шуэ калык. Александр Бречалов соку ик ёросысь югдурез утисьёслы вазиськиз, шуиз дасялэ вань кулэ ужкагазъёсты, ужпумез сэрттом-пертчом. Гуртоос капчиен шокчизы.

Вуж Мӧньялан потто пӧртэм сӥль тыремъёс.

Та нуналэ Александр Бречалов пумиськылӥз на Пичи Пургалась муниципал кылдытэтъёслэн йыръёсынызы, ёросысь депутатъёсын но ужбергатӥсьёсын.

— Ёросын улон туж ик урод ӧвӧл, но калыклэн мылкыдыдыз тулкымъяське, ёрос кивалтэтлы кулэ матысьгес калыкен вераськыны, адямиослы усьтӥськыны, — йылпумъяса вераз Александр Бречалов.

Выль Мӧнья гуртысь предприятиос сярысь ке, кивалтӥсь пусйиз: умой, соос вань шуыса, но бадӟым рыноке потыны соос тросэз дась ӧвӧл на.

Мария Векшина

Удмурт Дунне
By Удмурт Дунне Август 4, 2017 22:18