Пичи Пурга ёрос газетлэн удмурт ватсэтэз 2 буёло потыны кутскоз

Удмурт Дунне
By Удмурт Дунне Август 9, 2017 17:09

Пичи Пурга ёрос газетлэн удмурт  приложениез вуоно арняысен 2 буёло потыны кутскоз, воштӥськоз пуштросэз но, табере вирнуналэ потӥсь удмурт газет ӟуч кылысь берыктэмын уз луы, журналистъёс нимысьтыз удмурт материалъёс дасялозы.

— Газетын туспуктэмъёс озьы ик сьӧд-тӧдьы потозы, буёло луозы йыръянъёсыз гинэ. Сьӧд сяна,  эшшо одӥг буёлэз уже кутыса, газетлэн дуныз уз буды, — вера удмурт газет понна кыл кутӥсь Наталья Фролова. — Таяз арлы лыдӟисьёсмы гожтӥськемын ни бере, вирнуналэ потӥсь газетмылэсь гинэ пуштроссэ воштомы, удмуртарня газетмы азьло сямен ик ӟучысь берыктэмын луоз.

Ужез быдэсак ӧре пыртыны чакламын выль арысен. Соку ик воштӥськоз удмурт газетлэн нимыз но. Кыӵе со луоз, али лыдӟисьёс пӧлын юалляськон мынэ. Огез нимыз, кылсярысь, «Пурга куара».

— Малы удмурт газетмес воштыны малпам? Ӟуч кылысь берыктыса гожтэмлэн яркытэз, аспӧртэмлыкез, шӧмыз быре, тужгес ик газетэз печатлан нуналэ дыртыса ужаку. Удмурт адямилы сыӵе материалэз лыдӟыны шуг. Газетмы лыдӟымон мед луоз шуыса, та воштӥськонъёсты пыртыны малпамы, — вера Наталья Фролова.

Тодады вайытом, туннэ нуналлы шаерамы потэ 16 удмурт издание, со пӧлын – 3 газет, 4 журнал но  ёрос газетъёс бордын 9 приложение.  Котькудӥз соос пӧртэм сямен пото: кин ӵемгес, кин шергес, кин зӧкгес, кин векчигес, отын возьматӥсько удмуртлыклы сӥзем материалъёс, печатласько  авторъёслэн, лыдӟисьёслэн ужъёссы. Та дырозь Пичи Пурга ёросын гинэ удмурт  приложение потылӥз  ёрос газетысь текстъёсты берыктыса.

Нялтас вераса, удмурт кылын потӥсь «Маяк» кутскон сётэ, шуыны луоз, анай кылын потӥсь ивор вӧлмытон ёзъёсты утёнъя но азинтонъя концепциез улонэ пыӵатонлы. Азьланяз выльдӥськонъёс луыны кулэ мукет изданиосъя но.

 

Ольга Зорина

Туспуктэм: vk.com (Алексей Воронцов)

 

 

Удмурт Дунне
By Удмурт Дунне Август 9, 2017 17:09