Москваын кылдоз Кайгырон борддор

Удмурт Дунне
By Удмурт Дунне Август 10, 2017 14:49

Репрессиос улэ шедемъёсты буре вайыса, Москваын кылдоз Кайгырон борддор. Со усьтӥськоз туэ 30-тӥ октябре — политической репрессиос улэ шедемъёсты буре ваён нуналэ — Москваын, Сахаров но Садово-Спасской урамъёслэн вожазы.

Комплексэз кылдытон вылысь конкурсэ 300-лэсь трос ужъёс вуизы. Вормисе потӥз Россиысь калык суредасьлэн Георгий Франгулянлэн проектэз. Со верамъя, комплекслэн бадӟым люкетэз туэ мае лэсьтэмын ни вал. Синпелет пуктонлы оглом 80 тонналэсь трос туй кошкоз.

Туспуктэм: pda.diary.ru

Борддорез пуктон 460 миллион манет тыр усёз, со пӧлысь 300 миллионзэ висъяз Москвалэн Правительствоез. Али уксё бичало лэсьтӥськон ужъёсты йылпумъянлы. Юрттыны быгато вань мылкыд карисьёс, со понна фондлэн вотэс бамаз пыроно.

Акциез радъясьёс малпало, азьланяз таӵе синпелетъёс Россиысь мукет каръёсын но кылдозы шуыса. Фондэ та пумысен куриськонъёс вуизы ни Якутиысь, Пензаысь но Магаданысь, берлояз музей но усьтыны чакламын. Но репрессиос улэ шедемъёсты буре вайыса пуктэм тужгес бадӟымез «Маска скорби»  синпелет луоз Екатеринбургын — со лэсьтӥськоз Эрнст Неизвестныйлэн проектэзъя.

Нялтас вераса,  политической репрессиос улэ шедемъёсты буре вайыса мемориал пуктон сярысь указ гожтӥз Президент В. Путин 2015-тӥ арын.

Елена Рябина

Удмурт Дунне
By Удмурт Дунне Август 10, 2017 14:49