Мишши Юхма. Пюрнеске но солэн эшъёсыз. Выжыкыл

Удмурт Дунне
By Удмурт Дунне Август 3, 2017 17:10

Мишши Юхма.

Выжыкылысь люкет

Пуксе айко, эшъёсы, котыр люкаське, кылзыны дасяське. Али тӥледлы выжыкыл мадё. Ыр тӧл ортчиз, собере нош берытскиз. Тылобурдоос вуизы, вайёс вылэ пуксьылӥзы но чалмизы. Турын-куаръёс ӵаштыртӥзы, йыръёссэс лэзьязы, дыр вуиз кутскыны. Жадем муш но сяська вылэ лэзиськиз, жужгетӥз: «Мынам но выжыкыл кылзэме потэ!»

Кылзы, мусо муше, кылзы.

Аргамак валме кытко. Паймымон валэ мынам, огшоры ӧвӧл: кык солэн бурдыз но кык сюлэмыз — тӧллэсь но ӝог нуоз со монэ. Пеймыт-пеймыт тыпы нюлэсэ монэ ворттоз. Со нюлэсын бадӟым, ӝужыт тыпы сылэ, отын тылобурдо улэ — визьмо душес. Кин со доры лыктэ, ваньзылы-ваньзылы со выжыкылъёссэ вера.

Мон но вуылӥ со тыпы доры, выль выжыкыл кылӥ. Кызьы вал, ваньзэ тодам кельтыны тырши: ӟеч адямиослы мадён понна — ваньзылы, кин яратэ паймымон выжыкылъёсты.

 

Нырысетӥ люкет

Кытын улэ Пюрнеске? Маганьби нылашен тодматскон

Та учыр вылэм Бадӟым шурлэн ярдуръёсаз интыяськем шаерын. Бадӟым шур паськыт. Одӥг ярдурысен мукет ярдурзэ уд адӟы.

Бадӟым шурлэн шораз — пичи шормуӵ. Котыр вуэз лазег, соин корт пыжъёс со шормуӵ доры ӧз матэктылэ, ма, чорыгасьёс но пыжъёсынызы ӧз вуылэ. Шормуӵын котьку туж чалмыт вылэм, нокин отын уг улы, кожалод. Но со озьы чик но вылымтэ.

Улэм-вылэм со шормуӵын ӟуч пугане — Пюрнеске нимо пичи адями.

Тӥ, эшъёс, оло, уд тодӥське: та шаерын улӥсь вань пичи адямиосты одӥг кылын нимало — пугане.

Мон тодӥсько, мар со Пюрнеске пугане кылын. Вералом-а? Ярам, верало. Пюрнеске — со чиньы быдӟа адями.

Улэм Пюрнеске огназ. Сяськаосын но турынъёсын эшъяськем, ӵук лысвуэз бичаса, вувылсяськаысь юылэм. Нош нуназе пӧйшураны ветлэм, зэмос пӧйшурась кадь, пытьыосъя Инмарлэсь скалъёссэ — зорпапаосты (зоронокибыосты) — утчам но йӧлзэс кыскыса куро вылын, карнанэн сямен, дораз нуллэм.

Шунды дораз бертэм бере Пюрнеске но ӧсъёссэ ворсаллям. Нош укнооссэ пась кельтылэм, ӟозъёс быдэс уйзэ кубызэн лачмыт крезьгуръёссэс мед шудозы шуыса. Нош ӟардыку, котыр чалмыт дыръя ай, сяськаос нырысетӥ шунды сиосын ӵош Пюрнескеез, сюрс пичи чингылиосынызы жингыртыса, сайкатъязы.

 

Пюрнеске ӧжыт гинэ чиньыелэсь бадӟымгес вылэм. Юнме шорысь ӧз понэ ук солы сыӵе ним. Котькуд толэзь со доры эшез, вуриськись мудӥсьшыр Каюра, вуылӥз. Кикыньӧл куаръёслэсь Пюрнескелы чильпырась дӥсь вурылӥз — солы туж тупа вылэм.

— Нош кыӵе со Пюрнеске? — юалоды тӥ.

Сыӵе ик адями, но туж пичи, вӧзтӥз ортчыса, ӧй но адӟысалды сое. Пюрнеске чебер, питырес ымныро, нырыз ӧжытак чатырес. Синкашез сьӧд. Нош синмыз курень, кырыжалэс, вань пуганеослэн озьы: ӝужытэсь ӧвӧл бере, кин ке малпамтэ шорысь вылазы медаз лёгиськы шуыса, ваньзэ котыр адӟыны кулэ. Кымесыз Пюрнескелэн бадӟым, малы ке шуоно со трос малпаське, кызьы шуге-леке сюремъёсты утёно. Пельёсыз солэн кузесь, ваньзэ кылыны мед быгатоз шуыса. Бамъёсыз ӵыжытэсь, горд улмо кадесь, йыраз — эшеныз, мудӥсьшырен, тыпы суллэсь вурем йылсо изьы. Изьы йылын — паймымон чагыр чавгапусь сяська, со шормуӵын будэ. Куке Пюрнеске пӧйшураны мынэ, котыртӥз мушъёс бергало, та ческыт зыно сяськалэсь мӧльзэ бичало но, тау шуыса, лобӟо, нош куддыр возьмато солы трос зорпапаё интыосты.

Пюрнеске вылын кузь, пӧртэм чибориё суредъёсын чебермам тӧдьы шортдэрем. Шортдэремзэ солы бубылиос чеберъязы — соос шормуӵын усто суредасьёсын лыдъясько. Куке но вань бубылиос тӧдьы бурдоесь вылӥллям. Но огпол одӥг пичи бубыли анайзэ ыштэм, мукетыныз сое сурам но мурт бубылиос доры сюрем. Выль  юртын пиналъёссы вылымтэ, соин пичи бубылиез асьсэлы кельтӥллям. Анаез нылпиезлэсь кытынзэ тодэм гинэ, соку ик дораз лобӟем. Озьы даллашон потэм. Пичи бубылиез яратыны вуэм бубылиослэн сое берен сётэмзы уг поты ни, нош анай лекъяськыса, кыскыса ик нуыны турттэ… Пичи бубыли но анаез доры кыстӥське. Валамон ини, берло анаез нылпизэ ас дораз нуэм. Со дырысен котькуд бубыли ас дӥсьсэ пӧртэм буёлъёсын чеберъяны кутскем: нылпиоссы тодманы мед быгатозы. Озьы тӥни бубылиос суреданы дышетскиллям, суредасьёс луиллям. Соин Пюрнеске шортдэремзэ соослы чеберманы сётэм.

Шортдэремзэ Пюрнеске котьку кузь кускерттонэн керттылэ. Нош кускерттонэз солэн огшоры ӧвӧл — сюсе нимаськись турынлэн куроез. Со но та шормуӵын гинэ будэ.

Пюрнескелэн пыдаз — горд сапег. Чебер: тӧдьы гожъёсын но котресъёсын буямын. Укыр тыршиллям бубылиос. Огез бубыли, Пюрнескелэсь шортдэремзэ чеберъякуз, малпамтэ шорысь буёлзэ кисьтэм. Кӧня ке шапыкез горд сапегез вылэ но усем. Соку бубыли малпам сапегзэ но буяны.

Ма, тужгес но кулэзэ вераны вунэтӥськем. Пюрнескелэн сабляез вань. Пичи но капчи ке но — зэмос кырыж сабля! Со кускерттон борды юнматэмын. Кутонэз саблялэн зарниямын. Нош пуртэсэз азьвесямын, шунды шорын чиляса улэ. Тӥ шуоды, малы ӟеч пичи пуганелы сабля кулэ? Ӟеченыз сэрен ик кулэ. Лябъёсты утён понна. Вот сыӵе со, Пюрнеске, Бадӟым шурлэн шораз, шормуӵын, улӥсь пияш. Нош эшшо со ноку но нокинэ но уг пӧя. Нош кин ке маке вера ке, Пюрнеске котьку оске.

Огпол ӵукна, сяськаос сюрс чингылиосынызы жингыртыны кутскем бере, Пюрнеске сайказ но ӝогак валесысьтыз султӥз. Чибориё шортдэремзэ дӥсяз, кусказ сюсе турынлэсь кускерттонзэ керттылӥз, пыдаз горд сапегзэ кутчаз, йыраз тыпы суллэсь йылсо изьызэ изьыяз, солэн йылаз, космонавтлэн скафандрез вылын антенна сямен, паймымон чагыр чавгапусь сяська лэчыраса улэ, но коркась потӥз. Малпамтэ шорысь нюлэс кушысь ноку но адӟылымтэ сяськаез синйылтӥз.

Со сяська ӝужыт гырлысяськалы укша, бурдъёсыз горд-горд пишто. Пюрнеске сяська шоры паймыса учкиз но со дыре ик векчи куара кылӥз:

— Аван-и, Пюрнеске!

Сяська кылын со луэ: «Ӟечбур, Пюрнеске!» Сяськаос но ведь верасько, адямиос, пӧйшуръёс но тылобурдоос кадь.

Но асьмеос соосыз ум валаське. Сяська кылэз кыло но валало пичи пуганеос гинэ.

— Кам ку? Кин со? — юаз Пюрнеске, котыр утчаськыса.

Нокин уг адӟиськы. Паймыса Пюрнеске сяська пушкы учкыны малпа вал ини, но модосэз вылӥе кыстӥськиз.

— Абдрамон сяська! — шуиз Пюрнеске но паймеменыз кузь пельёссэ выртӥз. — Мар ке татын валантэм, — малпаськыса курень синъёссэ сяська пала кырыжтӥз.

Малпанъёссэ кылыса кадь, векчи куара нош куаретӥз:

— Аван-и, Пюрнеске! Мон со. Мон со, пичи ныл, Маганьби. Та сяська — мынам коркае.

— Нош мон — ӟеч пугане, — шуиз Пюрнеске но йырзэ мыкыртӥз. Собере юаз: — Нош кызьы тон отчы сюрид?

— Мон татын вордӥськи, — либытак вераз нылаш, солэн куараез Пюрнескелэн пеляз чебер кырӟан кадь кылӥськиз.

— Нош кыӵе сяська та? — юаз Пюрнеске.

— Та сяськаез магань шуо.

Зэм, со сяська маклы укшась магань сяська вал.

— Соин ик монэ нимало Маганьби — магань сяськалэн кузёез, — жингыртӥз кырӟанлы кельшись куара.

— Васькы татчы, мон доры, — куриз Пюрнеске. — Ойдо ӵошен шудом.

— Монэ васькытэмед потэ ке, ӟечбуръяськы монэн но кур потыны сяська кылын. Соку сяська улӥе лэзиськоз.

Пюрнеске, кема малпаськытэк, зол куараен вазиз:

— Аван-ха, Маганьби. Тух ман пада.

Со луэ: «Ӟечбур, Маганьби. Пот мон доры».

Со кылъёс бере ик сяська модос лэзиськыны кутскиз. Лэзиськиз, лэзиськиз но бурдъёсыныз музъем борды йӧтскиз. Сяська усьтӥськиз но, пушкысьтыз пичи гинэ кык сӧзуло ӵужо-гордо дэремен нылаш потӥз.

Сыӵе дэремен вань пугане нылъёс дӥсясько.

Тӥляд адӟылэмды вань, дыр, таӵе кык сӧзуло дэремъёсты. Огез сӧзулыз мукетызлэсь вакчигес, сое ӧжытак вылӥязгес вуро но, бызьылыку со бубылилэн бурдыз кадь ӝутскылэ.

Маганьбилэн йырси пунэтъёсыз но вань. Нош пунэтъёсыз вылтӥ горд кышет керттэмын. Бамыз нылашлэн ӵыжыт-ӵыжыт, вуэм узы кадь ик. Синъёсыз бадӟымесь но югытэсь.

Маганьби но Пюрнеске нырысь, ваче ки кутӥськыса, тэтчазы, нош собере эктыны кутскизы. Тае адӟыса, ӟозъёс кубызъёссэс кутылӥзы но крезьгурзэс кисьтӥзы. Кема эктӥзы крезьгур чузъяськем улсын ӟеч Пюрнеске но пичи Маганьби.

Эктӥзы-эктӥзы но кырӟан малпазы. Тани соослэн кырӟанзы:

Жильыр бызе пичи шурмы,

Вузэ юэ шырчикпимы.

Жильырты, лэзь

Жингырес гуръёсты,

Улля татысь сьӧд кырныжъёсты.

Кӧттырымон шудэмзы-эктэмзы бере Пюрнеске пичи нылашез ас коркаяз ӧтиз.

— Ой, кыӵе чебер корка! — шумпотыса киыныз чабиз Маганьби. — Но вӧл-вӧл!

Со бергаса эктыны кутскиз. Нош дэремезлэн вылӥ сӧзулэз омыре ӝутскиз но ӧжыт гинэ вӧлдэтозь ӧз нуы пичи нылэз. Ярам ай, ӟеч Пюрнеске юрттыны дыртӥз но нылашез кутыса вуиз.

— Ой, тау тыныд, Пюрнеске, — мылкыдзэ усьтӥз Маганьби.

Пюрнеске возьдаськеменыз номыр ӧз вазьы.

Маганьби, эшшо огпол котыр учкыса, чабкиськиз:

— Ой, кыӵе умой тон дорын! Нош мынам коркаям, зэмзэ вераса, ӟоскытгес.

— Соку кыль татын, — дэмлаз Пюрнеске.

Маганьби шумпотыса соглаш луиз.

Озьы Маганьби но Пюрнеске одӥг коркан улыны кутскизы.

Вазь ӵукна чингылиос чузъяськем улсын сайкаллязы. Пальпотылӥзы шундылы, югыт нуналлы, шуныт ыр тӧллы.

Пюрнеске соку ик зорпапаослэсь йӧлзэс кыскыны кошкылӥз. Нош Маганьби корказэс сяськаосын чеберъялляз, шырчикпи сярысь кырӟанзэс кырӟалляз но Пюрнескелэсь бертэмзэ возьмалляз.

  Удмурт кылэ берыктӥз

Анастасия Деметер-Петрова

Суредаз Анна Образцова

Удмурт Дунне
By Удмурт Дунне Август 3, 2017 17:10