Мария Векшина. 12 книга но одӥг пытьы. Верос.

Удмурт Дунне
By Удмурт Дунне Август 8, 2017 17:15

Мария Векшина.

Верос

Жингыртӥсько ӧсаз. Уг усьты. Йыгаськисько. Дымбыр-тӥсько. Ӝыны час ортчыса, ӧс усьтӥськиз. Мон шоры учкизы бездыт, пыдэстэм пеймыт вышкы кадь синъёс. Кытын меда туннэ солэн лулыз?

Ӝӧк вылэ понӥ ваем сиён-юонме. Йӧканазэ усьтӥ — шыр сюмаменыз ошкоз, плита вылысьтыз кастрюляяз пыри — чын кӧс. Кӧня меда та сиськытэк улэмын: куэз лыосыз борды лякиськемын, синмыз йыр кобыяз пыремын — оло, соос ӧвӧл ни, куасьмемын. Улэп шӧй.

— Тае си, — ваем сиён-юонэ шоры возьматыса, верай. — Мар сыӵе кема ӧд усьты?

— Кошкемдэ возьмай. Немарлы татчы ветлыны, — шорам учкытэк, нукыртӥз.

Пыри комнатаяз. Со сьӧрам, йырез портӥсь куараеныз: «Эн ветлы татӥ, кошкы! Кӧня верано, эн ветлы татӥ…» Но малы ке усьтӥз ук. Акыльтӥз-а дымбыртэм куаралэсь?

Соку ик кизьнӥ — тузонлы аллергия. Укноосыз пеймыт секыт штораосын возъямын. Кӧня усьямтэ ни таос? Сяськаоссэ таки кисьтамтэ, кӧня верай. Тылэз ӝуатӥ.

— Синъёсы! — кеськиз.

Валес вылысьтыз султылэ ик вылэм. Тузон выж вылтӥ сюрес лёгемын: ноутбукен валес — ӝӧк — сьӧрос…

— Кема-а тазьы кылльыны малпаськод на?

Синъёссэ чиндыр-вандыр киосыныз тыллэсь ватыны турттэ. Тылэз кысӥ — синнуныоссэ (зрачок) сутоз ай.

— Тынад ужед ӧвӧл!

* * *

Милемлы быдэн 10 арес. Паймисько солэн визьмызлы но оломае но тодэмезлы — трос лыдӟиське, эшшо вань на апайёсыз. Соос улонэз аръёслы азьланьгес тодыны юрттӥзы. Эше пичи дырысеныз ик дышиз ваньмызлэсь азьпалан, визьмо но быгатӥсь луыны. Пушказ пушйиз чебер сяська. Со сяська ӵукналы быдэ кужмояз, йырзэ вӧл-вӧл лэзьяса, ваньмыз шоры вылӥысен учкыны кутскиз. Огпол ми соин гожтэтъёс лэзьяса шудыны кутским. Одӥг гожтэтысьтыз лыдӟи: «Мон пушкы кыӵе ке лек урдо (бурундук) каръяськиз. Со шуэ: тонэ утчало, мыным, пе, кулэ кыӵе ке книгаез шедьтыны. Со тыныд мертантэм тодон-валан сётоз. Мар монэн? Ӝокасько. Та лулме мыддорин берыктэме потэ. Юртты мыным».

Юрттыны ӧй быгаты. Кӧня ке ар ортчыса, эше мынэсьтым палэнскиз. Ми соин ӵошен будӥм, ӵошен шу-дӥм, лыдӟиськыны дышетским, тодон-валанъёс сьӧры уйиськылӥм — ог-огмес ӟеч тодӥм. Таин йырин ик солы тушмон луи. Ӧй вал, мон солэсь визьмогес ӧй вал, азьпалтылыны но ноку ӧй тыршылы. Но вот… тушмон луи. Ачиз гинэ тодэ, мар солэн йыраз соку бергаз. Оло, урдоез вылаз эшшо но шаянгес урдӥськиз?

* * *

Со валесаз выдӥз. Синъёсыз мертчизы вӧлдэт шоры. Мон кресло вылэ пукси.

— Тонэ редакциын возьмало на. Берытскы.

Со номыр ӧз вазьы. Мугорысьтыз одӥг пигонэз но ӧз вырӟы. Мон шӧдысал.

Ми кыкнамы ик журналистъёс. Мон публицист, нош со — писатель. Лулызъя. Кыкнамы но Москвае дышетскыны мынӥмы. Мон — журналистикая факультетэ, со — литературной институтэ. Но берен шаерамы берытскыса, солы литературной журналэ инты ӧз сюры. Блогезъя тодо ке но вал, туж умой, мукет сямен гожъяське шуыса. Солэн произведениосаз ӧй вал а-ля «шаерме гажасько», «кызьы мон яратӥ», «мар со урод, нош мар умой». Сое гочатӥзы интеллектаульной проза, конспирология, история. Москваын дышетскыкуз, зымиз Умберто Эколэн, Хорхе Борхеслэн произведениосазы но философской ужъёсазы. Библиотекаосын вийылонъёс, пусъёслэн кужымзы, ватэм малпанъёс… — ваньмыз та кортназ солэсь йырвизьзэ. Кытысь ке шедьтӥз масонъёслэсь, спиритикъёслэсь кружокъёссэс, отчы ветлылыны кутскиз, тодаз вайиз вашкала удмуртъёслэсь но вӧсяськон сямзэс, узырлыксэс. Ваньзэ тае ӵошатӥз но огкадь нюжаоссэ шедьтӥз.

Кылсярысь, масонъёс, пе, калленэн, трос дауръёс ӵоже, лушкем огазеяськонъёс кылдытъяса, быдэс дуннеез киултыны туртто. Та малпанзы соослэн одӥг книгаязы гожтэмын, пе. валамон, со али но шедьтымтэ. Собере кутскизы пеймыт вакытъёс, инквизиция.

Нош мар удмуртаз? Озьы ик. Вал огазеяськон, но таосызлы нокинлэсь на вал ватскыны, кивалтӥз соин Быдӟым Вӧсясь, бордаз возиз Зарни книгаез. Собере кутскизы пеймыт вакытъёс, Быдӟым Вӧсясь котыраз 12 воргоронъёсты люказ но соослы Зарни книгалэсь пуштроссэ мадиз. Собере книгаез сутӥз, 12 пиосъёсты дунне кузя пазьгиськыны косӥз. Нокин соосты медаз шедьты-куты.

Оло, со книга сутымтэ? Оло, со 12 воргоронъёс, вылӥ тодон-валанъёсты, удмурт калыклэсь узырлыксэ медаз вунэтэ шуыса, асьсэос выль книгаос гожъязы — огез интые кылдӥз 12 Зарни книга — но табере со бамъёс дуннелэн пӧртэм серегъёсаз ватӥськыса кыллё, ас вакытсэс возьмало. Та малпанъёсын черлаз мынам эше.

* * *

— Мон тодӥсько, кытын луыны быгатоз огез Зарни книга, — вӧлдэт бордысь синъёссэ ишкалтытэк, шуиз эше.

— Тырмоз! Кытчы вуттӥз ни тонэ со малпанэд. Тазалыкед но, кынаред но ӧвӧл ини.

— Со луыны быгатоз 2 интыын. Яке Кузебай Герд нимо  йӧскалык музейын, яке кун архивын,  — сипыртыны кутскиз со. Эшме кылон понна дораз матэгес пуксёно луи. — Мон ваньзэ валай. Со 12 воргоронъёс чиптэм-чаптэм нокызьы но ышыны уг быгато вал. Уг! Соос, дуннелэн пӧртэм серегъёсаз пазьгиськыса, котыразы калыкез люканы кутскизы. Лушкем, ватскыса. Учкы ай, кытын гинэ уг уло азьветлӥсь удмуртъёс: Эстониын, Финляндиын, Америкаын… Соос пӧлын ик лушкем ужасьёсыз но вань. Алигес тодӥ: Аргентинаын кыӵе ке но аргентинец удмурт кылэз дышетыны кутскем — со 12 воргоронъёс пӧлысь огезлэн, дыр, ужам емышез. Аргентинец али Интернет пыр монэ шедьтӥз. Тӥни таӵеос пӧлысь утчаны кулэ со зарни-тодон-валан-нуллӥсьёсты. Юрттод-а мыным?

— Маин?

— Мыным кулэ программист, кудӥз быгатоз музейлэсь но архивлэсь ватэм материалъёссэс лушканы.

Хо-хо… горыны кутски мон.

— Тон малпаськод, со адямиос озьы гинэ ватскыса уло? Уг. Соослэн мукет кужмогес амалъёссы вань, дыр. Мон уг тодӥськы, кыӵеесь соос, — верай мон.

— Мед. Эскером. Мар ке кароно ук, кароно! Мон ке ӧй, Зарни книгаосты мынэсьтым азьлогес СООС шедьтозы.

— Кинъёс соос?

— Соос, кинъёс нуналлы быдэ бадӟым бинокльёссэс мынам укноосам берыкто, кинъёс ӵукналы быдэ ӧс дорам сыло. Мон йыртышеным шӧдӥсько соослэсь шокамзэс.

Ачим мон солы тушмон луэмысь дугдӥськем ни, лэся. Табере кылдӥзы мукетъёсыз.

— Чалякгес шедьтоно зар-ни-тодон-валан-нуллӥсь адямиосты. Сотэк монэ виёзы.

Со Зарни книга эшме шузи кельтэ ни. Шедьтоно ик-а, мар-а солы программист. Сюлмаськеменыз лулыз эшшо но чалякгес инбаме лобӟоз.

* * *

Программист быгатӥз пырыны музейлэн но архивлэн  тунгонэн ӵогам материалъёсазы. Валамон, огаз но Зарни книга сярысь пал кыл но поттамын ӧй вал. Но эше таин ӧз буйгатскы. Сётӥз мыным паспортсэ, коньдон, шуиз: басьты мыным Аргентинае билет. Мынам кылдӥз мукет планэ. Отысь монэ со шайтанъёс уз шедьтэ.

Эше удмурт кылэз дышетӥсь аргентинец доры мыныны малпаз. Уд, шуисько, уд мыны. Нош ачим валасько:  мон билетъёс ӧй басьты ке но, со кошкыны мукет сюрес шедьтоз.

— Тодӥськод-а, — валэктӥз со, — Умберто Эколы осконо ке, океан сьӧрын пӧртэм кужымъёсын вырись, уно осконъёсты вӧлмытӥсь огазеяськонъёс вань. Аргентина вашкала музъем вылын интыяськемын. Мон отысен быгато герӟаськыны  Быдӟым Вӧсясен.

Та кылъёсты веракуз, эшелэн синъёсыз пеймытын чилектӥзы, шайтанлэн кадь. Тае уд ни дугдыты, тае уд ни утьы.

Билет басьтӥ. Самолётэ эше, сьӧд-сьӧд дӥсяськыса — синъёссэ гинэ ватытэк кельтӥз — чакласькыса-чакласькыса потӥз. Оло, кин ке валатскоз, со кошке шуыса? Мон сое аэропортозь ик келяй. Укно пыр адӟи, кызьы солэн сьӧд мугорыз тубиз трап кузя но самолёт пушкы ышиз. Мон шӧдӥ: со уз берты ни.

* * *

Оло, зэмзэ но отысен шедьтоз Зарни книгаослэсь пытьыоссэс? 12 воргоронъёс зарни тодон-валанъёсынызы валче чиптэм-чаптэм ышыны уг быгато ук. Уг!

Туспуктӥз Чудья Жени

Удмурт Дунне
By Удмурт Дунне Август 8, 2017 17:15