Лекма шур вамен выжез тудву нуиз

Удмурт Дунне
By Удмурт Дунне Август 30, 2017 17:13

Яр ёросысь Меметгуртэ сюрыны сюрес одӥг — Лекма шур вамен. Со вылтӥ но капчиен уд ортчы: выжез тулыс тудву сьӧраз нуиз.  

Миым пӧсьтолэзе Меметгуртын улэмзылы паймиськиз вал. Соку куашкам выжзы трос вылын возиськиз. Шурдыса но адямиос со вамен потазы. «Скорой» дорозь висисьёсты ки вылазы шур вамен поттазы. Пожарной машина гуртэ пырыны быгатытэк, коркаос пеньлы пӧрмылӥзы. Кылем арын Яр ёрос администрациен кенешимы, оскытӥзы вал: выжлы проект лэсьтон борды басьтӥськиськом, вуоно арын, оло, со луоз. Та сярысь «Удмурт дуннелэн» 46-тӥ номераз гожъямы.

Ольга Ившина: Выжтэк кылеммы бере мужикъёсмы пыж лэсьтӥзы.

Редакциямы алигес Меметгуртысь выльысь гожтэт вуиз: «Выжмес шур воксё сьӧраз нуиз ни. Ми нош ик кылим шурлэн сопал ярдураз. Яр администрация копак номыр но уг кары. Юн но юн куриськом ӝутыны со югдурез».

Меметгуртын 50-лэсь трос адями пусъемын, нош улӥсез 35 лыдъяське. Гуртын нылпи сад но, школа но ӧвӧл. Шур вамен потыны шугъяськонъёс кылдэмен, пичи пиналъёсты нылпи садэ уг нулло ни. Но дышетскон ар вуиз ке, школьникъёслы кызьы ке но шур вамен  выжоно луоз. Соос гуртын 4 кузя. Тулыс пыжен поттазы вал.

— Выжтэк кылеммы бере мужикъёсмы пыж лэсьтӥзы. Май толэзез быдэссэ сямен нылпиосты Лекма вамен пыжен поттылӥмы, — шуэ Ольга Ившина. — Сюлэм пыдтышке вуэ, кышкыт.

Вортча гурт поселение сыӵе дыръялы спасательной жилетъёс шедьтылӥз ик. Но озьы улыны уг луы ук. Кытчы но ӧз вазиськылэ гуртоос, выж лэсьтыны курыса. Валэктон котькытысь одӥг: коньдон ӧвӧл. Нош Лекма арысь аре лекгес луэ: паськыта но муроме. Мурдалаез туннэ 3 метрлэсь ортче ни, пасьталаез 25-30 метр люкаське.

— Алигес мужикъёсмы люкаськизы но кенешизы: лэсьтомы пешеход. Пыдын ортчымон кык-куинь ваче шуккем дускоосты озьы шуиськомы, — вера Лариса Дюкина. — Ёросысьтымы ужбергатӥсь, нюлэсэн вырись Андрей Саламатов материал дунтэк сётӥз. Пуӵъёсты вуэ шуккизы. Но киын но пыж вылысен пуӵез трос-а жугод? Мужике кипыдэсъёсыз ик вирӟектыса, вуиз. Али со пешеход вылтӥ потаськомы. Но сюлэм интыяз ӧвӧл: выж пыд улын лэйка. Со но гужемзэ гинэ чидалоз — тулыс нош ик тудву сьӧраз нуоз. Кин но со шуэ: гуртты быре, кошке мукет азе улыны. Зэм, милям магазинмы гинэ но ӧвӧл. Соин ик ми Глазов пала корка но пуктӥм ни вал. Но отчы выжеммы уг поты. Картэ — фермер, зӧкез пие али 9-тӥ классэ потӥз. Со но шуэ: гуртысь ум кошке, будӥ ке, папалы юрттӥсько.

Калык ёрос администрацилы шуэ: выжмес гинэ лэсьтэ — милемлы мукетыз номыр кулэ ӧвӧл. Мужикъёсмы сое асьсэ кужымен но лэсьтыны дасесь, бетонлэсь свая гинэ шуккыса мед сётозы.

— Али Меметгуртэ арнялы быдэ сямен вуылӥсько, — шуэ ёросысь Депутатъёслэн кенешенызы кивалтӥсь Александр Старцев. — Туннэ утчасько сваяосты жугыны быгатӥсь машина. Балезиноын техника вань, но специалист уг сюры. Глазове вазиськыны медӥсько на. Сваяосты шуккыны юрттӥмы ке, отӥяз кызьы ке но лэсьтӥськоз ни.

Меметысен Вортчаозь шур вамен меӵак ог 2 иськем. Вань на котыр сюрес — 8 иськем кузьда. Отӥ нюлэс вортто. Соин но зор дыръя сюрес воксё пырыны-потыны луонтэм луэ. Тракторен гинэ ке шат. Школа автобусэз отӥ лэземзы уг луы. Собере, отӥ но Лекма вамен потоно луэ. Соиз но выж начар. Вортча гурт поселениен кивалтӥсь Любовь Гаврилова верамъя, ӵапак та кыдёкысь, котыр сюресысь выжез юнматыны но сюресэз лэсьтыны ёрос администрация ужпум пуктэ. Планэ со 2025-тӥ арозь пыртэмын.

Елена Сараматова

 

Удмурт Дунне
By Удмурт Дунне Август 30, 2017 17:13