Кызьпу арамаын выль ӝукен куноятӥзы

Удмурт Дунне
By Удмурт Дунне Август 3, 2017 13:55

Удмурт вӧсясьёс, Инмарлы тау карыса, вӧсяськизы, азьланезлы ӟеч улон куризы но ӝукез вӧсязы.

Дышем сямъя 2-тӥ гудырикошконэ Ижысь Кызьпу арамын вуэм емышлы сӥзем Выль ортчиз. Татчы ог 2 сюрс пала адями люкаськиз.

Лыктэм калыкез праздникен ӟечкылазы Ижлэн йырыз Юрий Тюрин, город Думалэн кивалтӥсез Олег Гарин, «Удмурт Кенеш» огазеяськонлэн тӧроез Татьяна Ишматова, национальной политикая министрлэн воштӥсез Павел Орлов, Индустриальной ёрос администрацилэн кивалтӥсез Любовь Зайцева но Кун Думаысь депутат Алексей Загребин.

Удмурт вӧсясьёс, Инмарлы тау карыса, вӧсяськизы, азьланезлы ӟеч улон куризы но ӝукез вӧсязы. Люкаськем калык шумпотыса сииз выль ӝукез. Черодын сылоно луиз ке но, ваньмызлы тырмиз. Майя Спиридонова но Таисия Емельянова — Устинов ёросысь «кенешчиос» — чебер удмурт дэрем дӥсяса празднике лыктӥллям.

— Весь дорын пукыны мӧзмыт. Котькуд удмурт шулдыръяськонэ пыриськиськом: Гербере но ветлӥмы вал, тани Виле но лыктӥмы. Эшъёсын пумиськыса, удмурт концерт учкыса, мылкыдмы лӧптэ. Татысен адӟиськом, удмурт калык огазеяське, удмуртлык ӝутӥське шуыса. Со понна шумпотӥськом.

Шулдыръяськон.

Нылпиослы пӧртэм шудонъёс, вожвылъяськонъёс радъямын вал. Киужъёсын,  книгаосын но пӧртэм сиён-юонъёсын, гурын пыжем ческыт пӧсь перепечен вуз каризы.

Калык эктэ.

Калыкез шулдыртӥзы тодмо артистъёс Геннадий Бекманов, Геннадий Ганьков, Михаил Ворончихин но Андрей Корнилов, озьы ик, Ижысь «Задор мылкыд», «Ӟардон», «Инвожо» но «Эшъёс» фольклор коллективъёс. Концерт мыныку, калык тапыр гинэ эктӥз, нош концерт бере удмурт эктонъёс бер ӝытозь кыстӥськизы на.

Калык ӝук возьмало.

Наталия Самсонова

Туспуктӥз А. Горбунов

 

Удмурт Дунне
By Удмурт Дунне Август 3, 2017 13:55