Кызьпу арамая огкыл шедьтэмын

Удмурт Дунне
By Удмурт Дунне Август 11, 2017 12:22

Алигес «Удмурт Кенешлэн» Ижысь азьветлӥсьёсыз Кызьпу арамаез азинтон пумысен ваче син кенешизы  Удмуртилэн  Тӧроезлэсь ужзэ быдэсъясен Александр Бречаловен но Иж городлэн йырыныз Юрий Тюринэн.

Ижысь Кызьпу арамалэн пуштросэз но тусыз сярысь вераськизы вылӥ кивалтӥсьёсын.

Шумпотымон, трос аръёс ченгешем бере калык но кивалтӥсьёс одӥг малпанэ вуизы кадь — кенешемын: Ижысь Кызьпу арамаын луоз этнопарк! Отчы нокинэ номыр пуктыны уз лэзе. Арама кылёз шутэтскон, калык йылолъёс ортчытъян интыен, но сое одно ик утялтозы-тупатъялозы, чеберъялозы. Али та пумысен проект лэсьтон уж нуиське, отын лыдэ басьтозы калыклэсь ӵектонъёссэ. Валамон, котькуд ӵектослы дурбасьтыны уг луы, кылсярысь, данакез кулэен уг лыдъяло город шоры куала пуктонэз. Вашкала сямъёсты зэмос утисьёс шуо: удмуртъёс вӧсяськонзэс ортчытъязы чылкыт интыосын — тэльын, возьын — калык пӧлын, саптаськем интыын ӧз. Собере, трос-а калык ветлоз вӧсяськыны? Кин утялтоз-чаклалоз та интыез?

Ольга Шилова — «Удмурт Кенеш» огазеяськонлэн Ижысь Первомай ёросысь ёзэзлэн кивалтӥсез:

— Ижысь Кызьпу арамаын кемалась ини удмурт тусо парк лэсьтоно вал. Паймоно кадь, но элькунмылэн азьвыл кивалтӥсьёсыз дыръя та ужпум интыысьтыз ӧз вырӟы. Удмуртилэн Тӧроезлэсь ужзэ быдэсъясь Александр Бречалов та уж борды ачиз басьтӥськиз, милемыз, «кенешчиосты», но пичияк чепыльтӥз. Ойдолэ, дэмлалэ, шуэ, тӥ бордысь тросэз потэ, вералэ-дасялэ дэмланъёстэс. Зэм но, милемлы соиз-таиз кулэ шуыса трос вераськиськом, но со дэмланъёсты умой-умой дасяны, куспамы огкыл шедьтыны быгатоно на.

 

Валентина Ившина — «Удмурт Кенеш» огазеяськонлэн Ижысь Октябрь ёросысь ёзэзлэн кивалтӥсез:

— Кызьпу арамае нокыӵе бадӟым юртъёс ӧвӧл пуктоно шуыса дэмлан мыным тужгес кельше. Собере, та парк понна город ик кыл кутоз шуыса малпан но шонер. Зэм, али паркез кыӵегес карон ласянь малпанъёс висъясько на. Кылсярысь, уг тодӥськы, кулэ меда куала… Собере, этнопарк но, шуом, Удмурт культурая центр ог-огзылэсь мед висъяськысалзы. Соос азьын чылкак пӧртэм ужпумъёс сыло.

 

 

Илья Викторов — «Удмурт Кенеш» огазеяськонлэн Ижысь Ленин ёросысь ёзэзлэн кивалтӥсез:

— Али Кызьпу арамаез тросэз Кеч парк шуо. Чебер уг кылӥськы. Та паркын ик кортлэсь лэсьтэм кеч сылэ. Со кечез татысь басьтоно. Куд-огез дэмла сое паркысь ик нылпи площадкае пуктыны. Нош парке пырон доры мон пуктысал Шунды-мумылы сӥзем синпелетэз. Шумпотӥсько, али «кенешчиослэн» кылзы оглом тупа. Парке куала лэсьтон ласянь гинэ ваче вуонъёс кылдо. Малпасько, сыӵе куала Ижын, Кызьпу арамаын, луыны кулэ ӧвӧл. Ма, Ижысь удмуртъёс тросэз «Удмурт Кенеш» сярысь но уг тодо но, малпаськоды, соос куалае вӧсяськыны ветлозы?

Юрий Мишкин — «Удмурт Кенеш» огазеяськонлэн Ижысь Индустриальной ёросысь ёзэзлэн кивалтӥсез:

— Со паркын нуналлы быдэ огшоры поръяны, шутэтскыны мед луоз. Нош куала ласянь ке… Сое ялан утялтыса возёно луоз ук. Асьмелэн «Лудорвай» музей-заповедникамы но куала вань. Оло, сое бадӟымгес кароно. Мылкыд карисьёс отчы ветлыны быгатозы.

Но оглом учконо ке, городын тросгес чузъяськысал ке удмурт кыл, солэн огъя тусаз но удмуртлык тросгес шӧдӥськысал.

 

 

 

Елена Ленцова — «Удмурт Кенеш» огазеяськонлэн Ижысь Устинов ёросысь ёзэзлэн кивалтӥсез:

— Кызьпу арамалэн тусыз пумысен вераськонъёс 10 арлэсь кема мыно ни, дыр. Но таиз вераськон — аспӧртэм йылпумъян выллем.

Али арамаын ӟусъёс вылын адямиос пуко, книга лыдӟо, кин ке бызьылэ, кин ке пиналэныз поръя. Ваньмыз та озьы ик мед кылёз. Инбам улын нимаз инты мед луоз пичи пиналъёсын шудон понна, нимаз — мӧйыослы люкаськыны, нимаз инты — егитъёслы. Шуом, татын ик сюанъёс дыръя егитъёс фотое пуксьылыны мед быгатозы. Ваньмыз туж чебер но одно ик удмурт тусо мед луоз.

«Герд»

Удмурт Дунне
By Удмурт Дунне Август 11, 2017 12:22