Киров улосысь Светозарево гуртын «Выль ӝук» праздник  ортчоз

Удмурт Дунне
By Удмурт Дунне Август 11, 2017 10:15

12-тӥ августэ Киров улосысь Слободской ёросысь Светозарево гуртын «Выль ӝук» праздник  ортчоз. Туэ со радъяськоз 9-тӥзэ.

— Та шулдыръяськон 2009-тӥ арын улӟытэмын вал, со дырысен арлы быдэ августлэн 2-тӥ кӧснуналаз ортчытӥське, — вера Киров улосысь удмурт азьветлӥсь Андрей Соловьёв. — Арысь аре солэн темаез вошъяське. Туэ «Писпу юн выжыосын, нош ми — эшъёсын» нимаське. Вераськомы удмуртъёслэн сям-йылолъёсазы писпулэн интыез сярысь.

Туэ празднике нырысьсэ вуттозы Удмуртиысь гуръёсты, отын пыжозы ческыт перепечъёс но табаньёс. Соосты басьтыны луоз праздниклэн коньдонэныз — гырен (1 гыр — 20 манет).

Со сяна, котькуд «Выль ӝуке» шаерысьтымы делегация вуылэ. Туэ кировъёс возьмало кырӟасез Богдан Анфиногеновез.

«Выль ӝуке» арлы быдэ 1 сюрс 500-озь куноос вуо. Соос учко концертъёс, пырисько пӧртэм вожвылъяськонъёсы, сиё вӧсям ӝукез. Озьы ик соос понна йӧскалык сиён-юонъёсын ярмарка радъяське. 0+

Елена Рябина

Удмурт Дунне
By Удмурт Дунне Август 11, 2017 10:15