Ижын кылдӥз 2 кылын вераськись нылпиос понна «Нуныкай» центр

Удмурт Дунне
By Удмурт Дунне Август 14, 2017 16:00

Ижын кылдӥз 2 кылын вераськись нылпиос понна «Нуныкай» центр

«Удмурт Кенеш» огазеяськонлэн бурд улаз кылдӥз выль проект — удмурт кылэз дышетӥсь нылпиослы но соослэн анай-атайёссылы «Нуныкай» центр. Со  Ижкар администрацилэн проектъёсъя конкурсаз вормисе потӥз.

Ижысь анайёс нылпиосынызы ӵош люкаськыса шудо.

— Проектмы «Нуныкай» — 2 кылын вераськись нылпиослэн центрзы» нимаське, — шуэ проектлэн одӥгез валтӥсез Ольга Бикузина. — Та центрамы пумиськонъёс арнялы быдэ  ортчылозы. Отчы ми ӧтчаломы пӧртэм ӧнерчиосты, соос мастер-классъёс радъялозы. Шуом, одӥгаз пумиськонын куролэсь арбериос лэсьтом, мукетаз — керттӥськыны дышетом, куинетӥяз — пӧраськом. Нылпиос пӧртэм киужъёсын вырон, шудон висказы удмурт кылын мед вераськозы.

Пусйыны кулэ, таӵе ужан амал Ижысь удмурт нылпиос понна выль ӧвӧл ни. Арлэсь кема шоркарын ужаз удмурт анайёслэн аспӧртэм клубзы. Мыло-кыдо  анайёс нылпиосынызы ӵош  пумиськылӥзы, пӧртэм ужпумъёсъя вераськизы, киужен выризы, нылпиосынызы удмурт шудонъёсын шудӥзы. Пумиськонъёс ӵемысь шуак-дуак ортчылӥзы. Шуом, кинлэн ке вань мылкыдыз нылпиосын тунсыко удмурт шудон радъяны. Та сярысь со Интернет вотэсын ивортылӥз: кин эшшо пыриськыны мылкыд каре? Ку люкаськыны быгатом? Кытын? Озьы анайёс но нылпиоссы кытӥяз ужан нунал пумын, кытӥяз шутэтскон нуналъёсы пумиськылӥзы, ог-огзы доры куное ветлэм кадь, вераськыны-кенешыны, шутэтскыны. Пумиськылӥзы я библиотекаын, я  паркын, я эшшо кытын ке.

— Анай клубен ужан ӟеч сямлы пӧрмиз ни, — пусъе Ольга Бикузина, — тросэз нылпиос, кудъёсыз возьдасько вал удмурт кылзэс поттаны, али ма но со вераськыны тыршо ни. Нылпиос шедьто выль эш, валало, удмурт кыл семья куспын гинэ уг улы шуыса, анай кылынызы мукет интыын но вераськыны луэ. Кызьы шуэ нылы, удмурт кыл «секретной» кылысь огшоры вераськон кыллы пӧрме ни.

«Нуныкай» центр ужаны кутскоз сентябрь толэзьысен. Кытын люкаськылозы анай-атайёс но нылпиос, али малпасько на.  Нош ми та сярысь ивортомы вуоно «Герд» номерамы яке тӥ асьтэос но «Удмурт Кенеш» огазеяськонлэн «ВКонтакте» вотэс бамаз пыраны быгатӥськоды.

Елена Панфилова

Удмурт Дунне
By Удмурт Дунне Август 14, 2017 16:00