Глазовысь эмъюртъёсын уг тырмо эмчиос

Удмурт Дунне
By Удмурт Дунне Август 9, 2017 15:27

Та пумысен сюлмаськонзэ шараязы Чепца механикая заводын ужасьёс. Соосын пумиськылӥз Удмуртилэн Тӧроезлэсь ужзэ быдэсъясь Александр Бречалов.

Чепца механикая заводын ужасьёс Александр Бречаловлы юанъёсын вазисько.

Шаерамы тазалыкез утёнъя удысын оптимизация шуген ортчиз, гуртъёсын ворсаськизы медпункъёс, больницаосын — койка-интыос. Глазовын, кылсярысь, огазеямын вал 2 бадӟым эмъюртъёс — ёрос но кар больницаос. Александр Бречалов куриз Глазовлэн йырызлы Олег Бекмеметьевлы но Удмуртиысь Правительстволэн Тӧроезлэн воштӥсезлэсь ужзэ быдэсъясьлы Наталья Судариковалы пусйыны, кыӵе тужгес лэчыт юанъёс вань та пумысен Глазовын, собере соосты сэрттоно-пертчоно.

Чепца механикая завод Глазовын валтӥсь предприятие луэ. Со поттэ цирконийлэсь арбериос, атомной энергетикалы топливо дася но мукет. Вузъёссэ дуннеысь пӧртэм сэрегъёсы лэзья. Азинскон понна кулэ ужан амалъёсты но выльдыны, инкуазь сярысь сюлмаськыны — завод та бордын чырмыт ужа, пӧртэм проектъёслы уксёен юрттӥське.

Тодады вайытом, Удмурт элькун но «Росатом» корпорация огкыл тупатӥзы: соя Глазовын выльдэмын но пуктэмын луозы куд-ог юртъёс, хоккея но мини-футболъя командаослы юрттэт сётӥськоз.

 

Сергей Захаров

Туспуктэм: udmurt.ru

Удмурт Дунне
By Удмурт Дунне Август 9, 2017 15:27