Герман Гессе. Нюлэс мурт

Удмурт Дунне
By Удмурт Дунне Август 2, 2017 17:10

Сузьиз улонэз

Германиын но Швейцариын улэм писатель, Нобель премилэн лауреатэз (1946) Герман Гессе вордӥськиз 2-тӥ июле 140 ар талэсь азьло.

Г. Гессе вань ожъёслы пумит луэмзэ вералляз. Сое янгыше уськытылӥзы, политикаез уг вала шуыса. Но кулэмез бере ини, 60-тӥ-70-тӥ аръёсы, со властьлы пумитъяськись егитъёслэн кумирзы луиз. США-ын но Япониын солэсь книгаоссэ, пась потытозь, лыдӟылӥзы. Ма понна? Эрикез яратӥсь, калыклэсь пӧртэм геройёсыз понна.

Г. Гессе школазэ гинэ но ӧз йылпумъя — пегӟиз. Со котькытысь пегаз — ужысьтыз, семьяысьтыз (4 пол кышно-яськылӥз). Шузиме шуыса, сое психиатрической больницае выдтылӥзы. Пурысь улонлэсь шоканэз пытсаськыса, ассэ утчаса, Европаез, Индиез котыръяз, пумен ас понназ дышетскиз, трос книга лыдӟиз. Котькуд ветлэмысьтыз произведениез вордскылӥз. Геройёсыз солэн ачиз кадесь ик — калыклэсь пӧртэмесь. Вормонтэм шуг-секытъёс пыр потыса, Инмарлы матэ луо, я улонлэн гуаз усё…

1951-тӥ арын потӥз солэн берпуметӥ произведениез — «Игра в бисер» — туж шуг роман, татын огинэ сузьемын философия, история, психоанализ. Талэсь азьвыл потэм произведениоссэ лыдӟытэк, сое валаны ик уг луы. Соин дэмласал: Г. Гессеез лыдӟыны кутскелэ выжыкылъёсыз но притчаосыз бордысен. Соос то-дэ вайыто Бразилиысь туала писательлэсь Пауло Коэльолэсь произведениоссэ.

Ольга Вахитова

Нюлэс мурт

Герман Гессе

Вашкала вакытъёсы, адямиос Музъем вылын трос луытозь, улӥллям нюлэс муртъёс.  Соос, ог-огзылэсь кыдёке кошкыны кышкаса, улӥллям бадӟым тэльёслэн вужеразы, ожмаськиллям ӵыжы-выжыосынызы — обезьянъёсын, одӥг гинэ инмар, одӥг гинэ закон кивалтэм соосын — сик. Адямиос тэль сьӧры поталлямтэ — отын, писпуос сьӧрын, сутӥсь шунды улын номыр ӧвӧл шуыса, тӧдьы но шал-шал буш дунне шурдыт потылӥз соослы. Нюлэс аямиос пӧлын улӥз песятай. Куке но со, кышкыт пӧйшуръёслэсь пегаса, тэль пуме потэм но соку ик сукыр кылем. Табере со вӧсясь (жрец) луиз, гажамон адями, нимыз Мата Далам — пуш синмыныз адӟись, иське. Солэсь кылзӥськылӥзы шундыез адӟыса но улэп кылемез понна. Мата Далам визь-кенешен юрттылӥз — калык сиён-юонэн дунзэ тыриз. Пересьмемезъя вӧсясьлэн эшшо но золгес кивалтэмез потыны кутскиз. Пумен олокыӵе но сям-йылолъёс малпаз: тэльлэн инмарез, уйвӧтам лыктыса, озьы косӥз, валэктылӥз калыкезлы. Егитъёс пӧлысь кин но со, пӧлазы Кубу нимо воргорон но, сое пӧяськись шуылӥзы, со, пе, ачиз сярысь гинэ сюлмаське.

Воксё пересьмыса ини, синтэм вӧсясь косӥз выль толэзьлэсь вордӥськемзэ сӥлы карылыны. Со калыкез котыртэме султытъяз, ачиз шораз пуксьылӥз но ош куэн золтэм шыркунэн (барабан) йыггетылӥз. Калык эктыса-эктыса катьтэммылӥз но муз вылэ гаӵоло усьылӥз. Та вакытэ котькудзэ косэмын вал паллян пельзэ йылсо сяська венен пасяны. Быдэ вуись нылъёслэсь пельёссэс бышкылӥз ачиз вӧсясь.

Кубу но солэн эшъёсыз пумит луизы та йылоллы. Кӧня ке нылъёсты ас палазы берыктыны быгатӥзы. Тани вӧсясь ожалскиз ини нылъёс вылэ, но огез кужмоез ныл  донгиз сое, вожомем песятай сяська венен бышкалтӥз синмаз — ныллэн синмыз потӥз. Тае адӟыса, калык кышкаса но йыркуръяськыса пумиз. Егитъёс азьпала потӥзы ини вал, вормонзэс шӧдыса, Кубу вӧсясез пельпумтӥз  ик кутӥз, но соиз султӥз, шыркунзэ сайяса, но ӟазырес векчи куараен вераз кышкыт юриськон кылъёсты, сокем кышкытъёссэ — калык курдаса кин кытчы пегӟиз, нош Кубулэн сюлэмыз шымырскиз.

Вӧсясь юриськиз: Кубулэсь синъёссэ бадӟым тылобурдо мед кокчалоз, муссэ но сюлэмзэ кыр бусыын пӧсь шунды мед куасьтоз! Пересьлэн кужымез но калык пӧлын данэз али мында ноку ӧй вал на, табере со сэмберъяськись нылашез вайыны косӥз но мукет синзэ бышкалтыса поттӥз.

— Тон кулод отын, тэль пумын! — кеськиз вӧсясь Кубулы.

Со дырысен воргоронэз ӵыжы-выжыосыз кылэм-адӟемысь дугдӥзы. «Отын, тэль сьӧрын», озьыен, сутӥсь шунды улын, ӝуась буш дуннеын.

Трос нуналъёс но арняос ӵоже ветлӥз тэлетӥ Кубу, кымессэ кисыри шымыртӥз, ымныраз лек тус пыӵаз. Та дырозь одӥг адями но ӧз пота на вал  нюлэскысь шур дуре, тыр толэзь пиштыку. Кубу кема сылӥз ярдурын, толэзь но кизилиос шоры шонерак учкыса. Но номыр уродэз соин ӧз луы! Быдэс уй пукиз толэзь сиос улын — синтэм ӧз кыльы. «Толэзь — мынам эше, кизили но — эш, нош сукыр пересь — тушмон. Иське, «сьӧрын», оло, умойгес, «тэльын» сярысь!» Сое тодон понна одӥг гинэ сюрес: сик сьӧры потыса, вань ке солэн пумыз, зымыны гомась буш дуннее. Шунды кышкыт шуыса куке но кылдэм малпан, оло, сыӵе ик синпӧет гинэ? Та малпанэзлэсь Кубу куалекъясь луиз. Ноку но одӥг  нюлэс адями но ас мылкыд каремезъя тэльысь ӧз пота на, кышкыт шундылы ӧз сётскылы на. Нуназе вакыт со куалекъяса нюжтӥськиз шур дуре но ву вылысь адӟиз шунды сиосты. Яркыт тыл синъёссэ вандӥз, Кубу кышказ, синъёссэ чаляк пытсаз, пичияк усьтӥз — учкыны быгатӥз. Со быгатӥз, чидаз, со кышкасьтэм. Кубу оскиськиз шундылы, со яратӥз шундыез — шунды сое коть мед быдтоз, но синазькыль кариз вуж, пеймыт, сисьмем тэлез нукыртӥсь вӧсясеныз валче.

Кубу пыриз сьӧд нюлэскы, шедьтӥз вӧсясез но молотэн шуккиз йырбераз. Адӟиз, кызьы пересьлэн кырыжам ымысьтыз лулыз потӥз. Вӧсясьлэн гадь вылаз молотсэ понӥз — мед адӟозы, кин сое вииз, молот вылэ куалялюльылэн чалепеныз котыртэт но сиос суредаз — со вал шунды.

Ӟеч мылкыдын потӥз Кубу сюрес вылэ — пеймыт тэльлэсь пумзэ утчаны. Уйлы пумит ини, гурезь бамалэтӥ кема-кема тубемез бере, кытын вамышлы быдэ омыр пумен капчигес но кӧсгес луэ, со шӧдтэк шорысь тэль пуме вуиз. Нюлэс быриз, но соин ӵош быриз музъем но. Номыр уг адӟиськы, кыдёкын пиштӥсь кӧня ке кизилиос сяна, малы ке шуоно уй лэзиськиз.

Ӵуж сиосыныз мальдытыса, кытын ке кыдёкын ӝужаз шунды. Син сузёнтэм паськыт дунне вадьсын кылдӥз маке быдӟа горд тыл. Кубу шундылэн синъёсаз учкыны  шуак ӧз быгаты. Озьы ке но шӧдӥз-адӟиз, кызьы шунды тылси пӧртэм буёлъёсын кисьтӥськиз гурезьёс, изъёс, ярдуръёс но кыдёкысь чагырен чильпырась шормуӵъёс вылэ. Кубу ньыльпыдъяськиз но йырзэ мыкыртӥз мальдытӥсь дуннелэн инмаръёсыз азьын.

Изъёс борды кутскыса, адями меӵ гурезь кузя васькиз пумтэм-йылтэм дуннее, югытлы но зарезьлы матэ…

Вакчиятыса берыктӥз Ольга ВАХИТОВА

Суредаз Вера Штыкова

 

 

 

Удмурт Дунне
By Удмурт Дунне Август 2, 2017 17:10