Фин-угор писательёслэн 14-тӥ конгрессы: Адӟем карелэ удмуртъёслэсь!

Удмурт Дунне
By Удмурт Дунне Август 30, 2017 11:50

Кылем арняе йылпумъяськиз фин-угор писательёслэн 14-тӥ конгрессы. Уноез докладъёс сӥземын вал исторической романъёслы но, чузъяськизы туала литературалэн улэм-вылэмезлы сӥземъёсыз но. Ӝутӥськиз ужпум: литератураосты берыктылоно кылысь кылэ.

Сету калык дорын пумиськон.

Удмуртиысь делегация одӥгез пичиез ке но вал, удмурт тема ужрадын тужгес яркыт пиштӥз. Отчы ветлӥзы егит прозаик Мария Векшина, егит тодосчи Лариса Дмитриева но кылысь кылэ берыктӥсь Александр Егоров. Конгресслэн ужаз мылысь-кыдысь пыриськизы Тартуын дышетскись удмурт докторантъёс, Эстониын улӥсь удмуртъёс. Литературамес возьматэм сяна, вал мукет но бадӟым ужмы: «Удмурт Кенеш» огазеяськонэзлэн Тӧроез Татьяна Ишматова куремья, удмурт калыклэн эшезлы Арво Валтонлы сётӥмы «Удмурт Кенеш» огазеяськонлэсь грамотазэ, кылем арын со К. Герд нимо премиен пусъемын вал.

Адӟиськиз, фин-угор литератураос азинско. Но соос ог-огенызы кусып уг возё. Уго тросэз произведениос кылысь кылэ уг берыктӥсько, литератураос ас пуртыязы пӧзё. Со сяна, тросэз писательёс, кылзы (эстон, фин) азинске ке но, гожъясько англи кылын.

— Тӥ асьтэ калыкты азьын кыл кутӥськоды, гожъяське анай кылыныды, — писательёслы вазиськиз Фин-угор литератураослэн ассоциацизылэн кивалтӥсез Янош Пустаи. — Литературалэн интыез улонамы бадӟым. Кылсярысь, «Калевала» эпос фин калыклэсь асваланзэ ӝутӥз, со бордысен азинскыны кутскиз фин литература. Кулэ ялан нуыны берыктон ужез — озьы ачиз калык вала: соослэн литературазы тунсыко но дуно.

—  Ливъёс уло Латвиын, ми ог 250 кузя, берло переписья 20-ез гинэ ассэ ливен лыдъяз, соос пӧлын 3 кылбурчиос, соос гожъясько лив но латыш кылъёсын. Озьы ке но, вераны луоз, лив литература латышеныз али оградын сылэ. Но лив кылын лыдӟиськисьёс ӧжыт, — вераз Вальтс Эрнстрейтс.

Конгресс сӥземын вал историлы. Котькуд литератураын сямен, валтӥсь интыосын луо Быдӟым ож, Граждан ож, Пугачёвлэн ӝутскемез…

Но конгрессын чузъяськыны кулэ литературалэн туала вакытэз, шуг-секытъёсыз сярысь но докладъёс, малпа Фин-угор литератураослэн ассоциацизылэн вице-президентэз Ева Тулуз. Озьыен, конгресс понна исторической учыр вал: нырысьсэ татчы вуизы нганасан гожъяськисьёс. Валерия Савриян ӝожтӥськиз, калыксы быре ни шуыса. Кылэз школаосын дышетон понна букваръёс но учебникъёс ӧвӧл — соос лэсьтэмын 2-тӥ классозь гинэ. Нош литературазы возиське калык кырӟанъёс вылын. Соосты быдэстӥз Нина Чунчунар.

Огаз секциын Мария Векшина мадиз туала удмурт литературалэн улонэз сярысь, вераны кулэ,  унозэ проектъёсты бергатэ  «Удмурт дунне» газет. Кылсярысь, «Ингож» литературной приложение бордысь кылдытэмын литературая студия, ортчиз егит писательёслэн семинарзы, та улсын радъяськыло литературной пумиськылонъёс но.

— Милемлы эстон писатель Арво Валтон котьку шуэ: адӟем карелэ удмуртъёслэсь! — доклад бере шуизы поръёс.

Та кылъёсты кылыса, милям, удмуртъёслэн, мылкыдмы лӧптӥз. Озьыен, ужмы асьмелы гинэ уг, мукет фин-угор литератураослы но пайда вае.

Конгресс огыр-бугыр ортчиз. Нуналлы быдэ пӧртэм докладъёс чузъяськизы, нуналъёс йылпумъяськылӥзы я крезьгуро группаослэн концертъёсынызы, я кылбур лыдӟонъёсын. Выру палъёсысь Мари Калькун улӟытэ лымшор эстонъёслэсь кырӟанъёссэс, быдэстэ соосты пӧртэм крезьгуро инструментъёсын шудыса. Мукет нуналаз калык тодматскиз удмурт кырӟанъёсын, соосты быдэстӥз удмурт-эстон AR-GOD группа. Куинетӥ нуналаз аслэсьтыз кылбуръёссэ лыдӟиз эстон нылмурт Кристина Эхин. Ӝыт таин ӧз йылпумъяськы, залын кема чузъяськизы на удмурт, вепс, ӟуч, эстон но мукет чуръёс.

Ассоциацилэн кивалтӥсез вуоно 2 арлы озьы ик кылиз Янош Пустаи. Нош вуоноез конгресс ортчоз Румыниысь Коложварын. Сӥземын со луоз диаспораослэн литератураоссылы.

Мария Иванова

Туспуктэм: fb.com

 

Удмурт Дунне
By Удмурт Дунне Август 30, 2017 11:50