Фин-угор калыкъёслэн 1-тӥ ӧтчамзы ортчем дырысен 25 ар тырмиз. Кыӵе сюресэз со ортчиз?

Удмурт Дунне
By Удмурт Дунне Август 16, 2017 14:06

1992-тӥ арын удмурт азьветлӥсьёслэн кичӧлтэмзыя Ижын ортчиз  Россиысь фин-угор калыкъёслэн нырысетӥ ӧтчамзы. Та бӧрсьы Россиын фин-угор дунне быдэсак сайказ шуыны луоз.

АФУН-лэн кенешаз вераськон мынэ фин-угор съездлы дасяськон сярысь.

 

Инъет кылдытӥзы тодосчиос

Ортчемзэ тодытэк-валатэк вамышъян ӵемысь пӧрме интыяд лёгаськонлы. Яке ваньзэ но ӧвӧлтэм каронлы. Зэм, ӧвӧлтэмез туж ӝог маин ке тырмытӥське. Куддыръя туж уродэныз… Та малпанъёс йырын ӵемысь бергало, фин-угор дуннелэн кылдэмез, азинскемез сярысь малпаку. Фин-угор дунне кылдӥз бере, озьыен со туж кулэ вал,  со тырмытӥз калык сюлэмъёсын улӥсь кыӵе ке бушась (яке буш) интыез. Со улӟытӥз аслэсьтыд выжыдэ гажан, тодон, со пыр мукет калыкъёсты но валаны тыршон сямез.

Россиысь фин-угор движение сярысь вераку, тодэ лыкто 1990-тӥ аръёс. Зэм, соку кунысьтымы фин-угор калыкъёс гинэ ӧвӧл, вань ӧжыт лыдъем калыкъёс лопырскизы, асьсэ огазеяськонъёссэс кылдытыны ӧдъязы. Та вакытэ фин-угоръёс но шӧдӥзы но тодӥзы,  соос одӥг кыл семьяе пыро, соослэн огвыллемесь шугъяськонъёссы шуыса. Озьы ке но, историез тодэммы потэ ке, мургес учконо. Угось фин-угор калыкъёслэн огъя выжызы сярысь вераськонъёс кутскизы ни вал 17-тӥ-18-тӥ дауръёсы. Соку немец, венгер, швед тодосчиос фин, саам, венгер, эстон кылъёсты ӵошатыса, валазы: соос одӥг семьяысь пото. 18-тӥ дауре та эскеронъёсты умоен лыдъязы тодмо ӟуч тодосчиос В. Татищев, П. Рычков, М. Ломоносов но мукетъёс. Та вакытэ ик финно-угроведение азинскыны кутске нимаз наука луыса. Малпасько, та вакыт луиз  фин-угор дуннелэн нырысетӥ тубатэз.

Озьыен, ӵапак наука фин-угор калыкъёслы асьсэды огъя семьяен шӧдон понна туж ӟеч инъет кылдытӥз, «фин-угор дунне» нимо коркалэн фундаментэз луиз.

19-тӥ даурлэн пумаз но 20-тӥ даурлэн кутсконаз Россиысь фин-угоръёс доры фин-угор кунъёсысь трос гинэ тодосчиос ветлӥзы, материал люказы. Нош 1925-тӥ арын Ленинградысь университетын усьтӥськиз фин-угор кылъёсъя кафедра. Та аре ик Россиын кылдэ фин-угор калыкъёслэсь культуразэс эскеронъя общество.

Фин-угор дуннеез азинтон, валтон понна тодосчиос бӧрысь но, али но трос лэсьто.

Уродэзтэк ӧвӧл ӟечез

Уродэзтэк ӧвӧл ӟечез, шуо. 1920-тӥ-1930-тӥ аръёсысь Россия шоры учконо ке, озьы ик вал, дыр, со. Та вакытэ шаермы но секыт адӟонъёс пыр потоно луиз, уно визьмо, йӧно пиоссэ ыштӥз. Сталин репрессиос улэ шедизы пӧртэм выжы калыкъёслэн азьветлӥсьёссы. Но ӵапак та вакытъёсы ик кылдӥзы национальной республикаос. Кылсярысь, 1920-тӥ арын вордӥськиз Вотской автономной область, та аре ик Карельской трудовой коммуна, бӧрысьгес — Коми автономной область. История, пе, уг яраты «сал» шуэмез. Но озьы ке но, даур талэсь азьло удмуртъёслэн нимаз автономизы ӧй ке кылдысал, туннэ нуналлы луысал меда удмурт калык? Шуг вераны…

Совето вакытъёсы фин-угор движение нимаз ӧз но висъяськылы кадь, но фин-угор калыкъёслэсь историзэс, культуразэс тодосчиос та вакытэ мыло-кыдо эскеризы.  Азинскиз фин-угор кылъёсын литература, калык творчество вылэ пыкиськыса — крезьгур, театр но мукет. Ваньмыз огсыр вал.

Но тани вуиз выльдӥськон вакыт. Быдэс кунмы тус-тас карем кузьыли муӵ кадь луиз. Одӥгъёсыз дунлыкъёс куашказы, мукетъёсыз кылдыса ӧз вуттэ. Но, кызьы пусйим ни, буш интыез маке тырмытыны кулэ. Адямиос асьсэды асьсэос валаны, выжыоссэс утчаны кутскизы. Кулэ вал ваньзэс огазеясь малпан. Ӵапак соин но герӟаськемын, вылды, фин-угор калыкъёслэн та вакытъёсы лопырскемзы. Со дыръёсы Россиысь фин-угоръёс пӧлын удмуртъёс тужгес шаплыосыз, кыдёке азьпала учкыны быгатӥсьёсыз вал, дыр. Угось выль кылдэм «Удмурт Кенеш» уж борды ӝабыр-ӝабыр басьтӥськиз. Ассоциация ик туж трос лэсьтӥз нырысетӥ фин-угор съездэз Ижын ортчытон понна. «Удмурт Кенешлэн» соку кивалтӥсез Михаил Шишкин пусъе: съездэз нырысь ик ортчытыны чаклало вал коми калыклэн движениеныз кивалтӥсьёс. Быръемын ни вал ӧтчамез ортчытон дыр, «Удмурт Кенеш» бырйиз со съездэ мынӥсь делегатъёсты… Озьы ке но Коми музъем вылын съезд ӧз ортчы. Угось Россилэн мукет улосъёсысьтыз фин-угор калыкъёслы асьсэ огазеяськонъёссэс кылдытыны кулэ вал ай…

Быдэ вуон вакыт

Историын озьы луыны кулэ вал, дыр: фин-угор калыкъёслэн нырысетӥ бадӟым ӧтчамзы ортчиз Удмурт музъем вылын.

— Съездын туж секыт но эсэпез валаса лэсьтоно ужпумъёсты ӝутоно вал, — тодаз вае Михаил Шишкин. —  Нош со вакытэ Россия бугыръяськиз, нуналмысь улонын но политикаын ваньмыз туж тугаськемын вал. Нош съездын валамон луиз: география ласянь но, экономиказылэн азинскемезъя но фин-угор калыкъёс висъясько ке но, азязы сылӥсь ужпумъёс огвыллемесь. Соин ик кутоно документъёс но сыӵе луыны кулэ вал, кризисысь огъя кужымен потыны мед быгатом шуыса. Съездэз ортчытон но, документъёслэсь проектъёссэс дасян но усиз «Удмурт Кенеш» вылэ. Вань кужымзэс сётыса ужазы  тодосчиос, азьветлӥсьёс Кузьма Куликов но Карл Пономарёв.  Туж юрттӥзы коми калыклэн азьветлӥсьёсыз.

Ижын ортчем фин-угор ӧтчамын кылдӥз Россиысь фин-угор калыкъёслэн ассоциацизы, солэн уставез кутэмын но исполкомез юнматэмын вал. Та ӧтчам дыръя ик огкылэ вуизы: быдэс дуннеысь фин-угор калыкъёслэсь конгрессэс ортчытоно. Таиз ужрад ортчиз ини 1992-тӥ ар пумын Сыктывкарын. Татын фин-угор калыкъёсты утён но азинтон сярысь вераськон мынӥз. Кылдытэмын вал фин-угор калыкъёслэн Консультативной комитетсы.

Вакчияк вераса, 25 ар талэсь азьло кылдӥз  фин-угор движенилэн радлыкез, огъя ӧрез, кабъёсыз. Табере — ужа но ужа. 25 ар ӵоже фин-угор калыкъёс зэмзэ но туж трос лэсьтӥзы. Ваньмызлэн сямен кылдӥзы егитъёсын ужась огазеяськонъёссы, асьсэ удысъёссыя огазеяськизы фин-угор журналистъёс, тодосчиос, писательёс… Соос ог-огзылэсь дышетскизы, ог-огзылы визь-кенешен юрттӥзы. Тужгес но та шӧдӥськиз кадь потэ творчествоен вырисьёслэн улоназы. Шуом, литератураын но суредаськонын кылдӥз фин-угор этнофутуризм. Нялтас вераса, этнофутуризмлэн шоркареныз лыдъяськыны кутскиз Удмуртия.

Та дыр ӵоже будӥз фин-угор егитъёслэн выль поколенизы. Удмурт егитъёс сярысь верано ке, со дӥсьтӥсь, асьсэ калыксылэсь культуразэ, кылзэ, литературазэ азинтон сярысь малпаськись, пӧртэм выль амалъёсты кутӥсь нылъёс но пиос. Зэм, шуг-секытъёс ӧжыт ӧвӧл (ку соос ӧжыт вал ни?). Выльдӥськон вакытэ но со бӧрсьыгес лопыръясь романтизм  пумен пуксиз. Озьы луэ, вылды, огазеяськон быдэ вуон вакытсэ ортче ке, нуналмысь лэсьтоно ужпумъёсын пумиське ке.

Тросэз фин-угоръёсты ӵошато ислам но славян калыкъёс вискысь аспӧртэм выжен. Малпасько, туннэ нуналлы фин-угор дунне — со астэ кыӵе ке фин-угор калыкен шӧдон гинэ ӧвӧл, со аспӧртэм дунневалан.

Елена Миннигараева

 

Удмурт Дунне
By Удмурт Дунне Август 16, 2017 14:06