Электросчётчикъёсты воштӥзы, тыриськонъёссы будӥзы. Малы?

Удмурт Дунне
By Удмурт Дунне Август 9, 2017 12:30

Ижкарысь Ленин но Первомай ёросъёсысь улӥсьёс, «Энергоконтроль» огазеяськонлы оскиськыса, доразы выль электросчётчикъёс пуктылӥллям. Вуоно толэзяз тыриськонзы унолы будэм.

Быдэс Россиын сямен ик, Удмуртиын но ужало пӧртэм организациос, кудъёсызлэн  нимазы вань «энерго» кылыз. Кылсярысь, «Энергосбытконтроль», «Энергомонтаж» яке «Энергоконтроль», калыкез соос кужмысь электросчётчикъёсты воштыны косо. «Энергосбыт Плюс» огазеяськонлэн кивалтӥсез Денис Детинкин верамъя, со организациос нокызьы но герӟаськемын ӧвӧл «Энергосбыт Плюс» огазеяськонэн. Ленин но Первомай ёросъёсысь ас коркаосазы улӥсьёс доры «Энергоконтроль» огазеяськонысь электрикъёс пыраллям. Ленин ёросысь гинэ 150-лэсь тросгес коркаосын электросчётчикъёсты вошъятӥллям. Собере куд-огезлэн пӧсьтолэзь понна тыллы тыриськонзы 50-70 сюрс манет луэм. Малы?

«Ижевские электрические сети» огазеяськонлэн кивалтӥсез Сергей Клементьев валэктэмъя, корка кузё, счётчиксэ воштыны ӧдъя ке, одно ик куриськон гожтыны но сое электросетевой организацие 2 нуналлы вазьгес вайыны кулэ. Кылсярысь, Ижын со — «Ижевские  электрические сети». Нош адямиос оскиськиллям, «Энергоконтрольысь» ужасьёс ваньзэ шонер лэсьтозы шуыса, нокыӵе заявлениос гожъяллямтэ. Выль счётчикъёсъя лыдэ басьтымтэ киловаттъёс шараяськизы, со понна тыриськон лыдъямын. Сергей Клементьев ивортӥз: адямиослэн асьсэлэн но янгышсы вань ке но, тыриськонъёсты выльысен лыдъялозы. Кылсярысь, 22 сюрс манет интые 1 сюрс 517 манет тыроно луоз.

Кинъёс та секыт учыре шедизы, соос тыриськонэз выльысен лыдъян-чотан понна куриськон гожтыны но счётчикез воштэмзы сярысь документъёсын  «Ижевские электрические сети» огазеяськонэ лыктоно луозы. 30 адями тыриськонзэ выльысен лыдъян вылысь куриськон гожтэм ни. Но выль лыдпусъёсын квитанция сентябрь толэзе гинэ вуоз.

Электросчётчикез воштонлэн радлыкез:

1. «Ижевские электрические сети» огазеяськонэ электросчётчикез воштон сярысь куриськон гожтоно, одно ик 2 нуналлы ке но вазьгес.

2. Предприятиысь электрик счётчиктэс эскеремез сярысь  акт гожтэ, пломбазэ куштэ.

3. Корка кузё выль счётчик пуктэ, «Ижевские электрические сети» огазеяськонэ вазиське, выль счётчикез ужаны мед лэзёзы шуыса.

4. Та предприятиысь адями тупатэм дыре дорады лыктэ, выль счётчикез ужаны лэзён сярысь акт гожтэ, пломба пуктэ.

Наталия Самсонова

Туспуктӥз А. Горбунов

Удмурт Дунне
By Удмурт Дунне Август 9, 2017 12:30