Дизайн нуналъёс: луоз-а Иж удмурт шӧмо?

Удмурт Дунне
By Удмурт Дунне Август 1, 2017 15:30

2-тӥ-6-тӥ гудырикошконэ Ижын ортчозы дизайнлы сӥзем шутэтскон нуналъёс. «Чекерил» комплексын Россиысь тусбурчиос (дизайнеръёс) вераськозы, кызьы чебергес кароно городлэсь вылтуссэ.

Ужрадлэн вотэсбамез: designweekend.ru

Та проектэз кылдытӥсь Вячеслав Правдзинский ужрадэ удмурт тусбурчиосты но ӧтиз. Шуиз: ӵошен малпаськом, кызьы удмурт шӧмо дизайн ассэ городын возьматыны быгатоз. Ижкарлэн, пе, ӧвӧл аслаз тусбуез, котькытын реклама ошылэмын — со синмез жадьытэ. Нош дизайн ивор но сётыны, чебереныз но шумпоттыны кулэ.

Мар бордын ужалозы дизайнеръёс? Малпаськозы, кызьы М. Горький парклэсь туссэ воштоно, кыӵе инты басьтэ городын куара. Луозы лекциос. Кылсярысь, кыӵе со графической, цифровой дизайнъёс, кыӵе пуштросэз Ижлэн, кудпала вамышто городъёс но мукет. Азьланез уго чебер тус бордын.

Кызьы вера удмурт азьветлӥсь Алексей Шкляев, удмурт дизайнеръёс но кылзэс, малпанъёссэс вераны кулэ. Куд-ог ӟуч тусбурчиос верамъя, Ижлэн удмурт шӧмыз ӧз луы ке, со мукет городъёс пӧлы ышоз-быроз. Алигес, кылсярысь, Ижын ортчиз городэз азинтонлы сӥзем семинар. Нимысьтыз вераськизы Суредаськон искусствоосъя элькун музей котырысь интыез чеберман, тодмамон карон сярысь.

Бен, удмурт тусбурчиосмы милям туж ик трос ӧвӧл — «Монами» студия бере кылдӥз «Намер» студия. Шумпотымон: соос ас уженызы уксё потто. Нош мар нимаз тусбурчиос? Кызьы вера «Дарт» газетлэн дизайнерез Вера Штыкова, азьтэм сяммы ужаны люкетэ. Оло, мукет дизайнеръёс шоры учкыса, мылкыдмы эшшо но лӧптоз.

Дизайнлы сӥзем шутэтскон нуналъёс ортчо ини 20-тӥзэ, лекция лыдӟись, семинар ортчытӥсь адямиос дунтэк ужало, кылзӥсьёс но татчы дунтэк пыро. Валтӥсез: дышетскыны но кисьматыны кыӵе ке емыш.

Мария Векшина

Удмурт Дунне
By Удмурт Дунне Август 1, 2017 15:30