Быронэ вуттэ кудӟон

Удмурт Дунне
By Удмурт Дунне Август 11, 2017 14:30

Элькунысьтымы кышкытлыклэсь утиськонъя министр Пётр Фомин ивортӥз  спасательёслэн туэ ӝыны ар ӵоже ужамзы сярысь.

Туэ вуын 14 адями быриз ни.

Визь пырымтэ…

Тылпуосъя лыдпусъёс, кылем арын сярысь, усизы. Туэ усыкмыса я ӝуаса сопал дуннее кошкиз 59 адями, миым 73 вал.

Берлоез кышкыт учыр луиз Кизнер ёросысь Асинерын 2-тӥ августэ.

— Гуртын 32 адями сяна улӥсез ӧвӧл, — вераз министр. — Соос доры ми 3 пол потам, тылпулэсь утиськон амалъёслы сӥзем буклетъёсмес люкылыса. Но визь-нодмы йыразы кыльымтэ. Родниковой ульчаысь огаз юртэ 5 воргоронъёс люкаськиллям. Ӵукнаысен бер ӝытозь пукиллям. Уйин 12 час бере корка гомӟем. Кытысь тыл потэм — эскеронъёс мыно на.

Быризы 34, 37 но 47 аресъем пиосмуртъёс. Кыкез улэп кылизы — огез тылпу потэмлэсь вазьгес дораз бертэм вылэм, мукетыз ӝуась коркась, укноетӥ тэтчыса, потэм.

Нюлэсъёс туэ ӵемгес кенжылӥзы — 15 пол, кылем арын 9 учыр вал. Ӝуаз ог 2 гектар музъем.

—  1 гектарез тыл басьтэ ке, со син куспын 100 гектар вылэ погыльске. Угось пу ӝог кенже — 1 минут куспын 10 метрез киултэ. Тӧл зол пельтыку, эшшо но шаплыгес. Туэ югдур уродмиз, тулыс кема кыстӥськемен, зоръёс ӧй вал, озьы сикъёс вож гуждорен шобырскыса ӧз вуттэ, — пусйиз П. Фомин.

Ӵем дыръя тылпуос пото чорыгасьёсын, губиясьёсын, нылпиосын сэрен. Кылсярысь, тополь мамык пурӟыку, пиналъёс мамыкез кенжыто.

 Губиясьёсты утчан

Спасательёс туэ 6 пол тэльёсы ышем губиясьёсты утчаны  потазы. 3  адямиез доразы вуттӥзы, эшшо 2-сэ утизы волонтёръёс, огезлы юрттыны ӧз луы — июне нюлэскын кулӥз. Вань ышемъёс — арлыдоос.

— Тросэз губиясьёс бадӟым янгыш лэсьто, — пусйиз министр. — Йыромо но ӵыжы-выжыоссылы жингыръяны кутско. Озьы телефонзы пуксе яке коньдонзы быре. Йыромыку умойгес луоз, соку ик спасательёслы вазиськыса. Угось отчы жингыртыку, уксё уг кошкы, та службаен связь котьку ӟеч луэ. Губияны потоно одно ик яркыт дӥсен — писпуос пыр кыдёкысен мед пиштод.

Ышемъёсты утчаны капчигес мед луоз шуыса, министерство азьланяз чакла геолокация — адямилэсь кытынзэ адӟон — системаез улонэ пыӵатыны. Та вакытэ Москва улосын эскеронъёс мыно ини. Ӟеч ужаз ке, система Россиысь улосъёсы вӧлмоз.

 Ву — шурдыт

Гужем вылтӥ шаерамы 14 адями вуын быриз ни. Кылем арын та лыдпус 2 поллы бадӟымгес вал. Выён учыръёс ӵемысь луо 3 мугъёсъя. Нырысь ик, анай-атайёс нылпиоссэс сак уг учко. Кылсярысь, туэ Юкаменск но Вотка ёросъёсын 7 но 15 аресъем пиналъёс быризы. Мумы-бубызы ӧз но тодылэ, нылпиоссы огназы пыласькыны кошкемын шуыса. Кыкетӥез, вуэ кошкемъёс пӧлысь 90 процентэз кудӟемын вал. Куинетӥез, 10 процентэз адямиос шуге-леке шедё уяны быгатымтэысьтызы.

— Кылем арын вуын 30 адями быриз. Ярам, туэ лыдпус пичигес. Со герӟаськемын калык пӧлын валэктон уж нуэменымы. Анай-атайёсын кенешем сяна, вераськиськомы нылпи садъёсысь покчиосын но. Та сяна, шаерамы тросгес бассейнъёс усьтӥськизы, отын пиналъёс уяны дышетско, — пусйиз Пётр Матвеевич.

Ольга Корепанова

Туспуктӥз Максим Егоров

Удмурт Дунне
By Удмурт Дунне Август 11, 2017 14:30