Анай кыл улляз азьтэмсконэз

Удмурт Дунне
By Удмурт Дунне Август 16, 2017 16:22

Якшур-Бӧдья ёросысьтымы «Удмурт Кенеш» огазеяськон пӧртэм ужрадъёс ортчытъя. Берлоосыз пӧлысь шуныт но пайдаё ортчиз анай кылэз дышетонлы сӥзем ӝыт. Та сярысь нимаз вераммы потэ.

Ужрадэз ортчытыны ӵектӥз вал «Удмурт нылкышно кенеш». Но удмуртлык бордын ужакумы, ми кин кыӵе огазеяськонэ пыре ум люкиськиське, ваньзэ ӵош лэсьтӥськомы. Озьы ёросысьтымы «Удмурт Кенеш» огазеяськонлэн ёзчиосыз «Анайлэн веттан гурез» проектъя ужрад ортчытӥзы. Кенешон амалэн радъям пумиськон удмурт кылэз дышетонлы, сое нырысь ик семьяын азинтонлы сӥземын вал.

«Анайлэн веттан гурез» ужрадэ анайёс пиналъёсынызы вуизы.

Ёрос музейлэн вашкала арбериосын тырмытэм залаз котырес ӝӧк сьӧрын вераськон туж интыяз луиз. Кенеше лыктэм анайёс пиналъёсынызы ӵош пукизы. Бадӟымъёсызгес лякыт улӥзы, анайёссылэсь вераськемзэс кылзӥзы. Нош пичиос со вискын бызьылӥзы, шудӥзы, пиналъёс вераськыны быгатытэк но огкыл шедьто уго — котькытын гуртазы кадь шудыны кутско.

Бен, семьяос трос ӧз люкаське, но трос люканы малпамын но ӧй вал. Пумиськонэ лыктӥзы Якшур-Бӧдьяын но Якшурын улӥсьёс. Якшурысь нылпи садын ужась воспитатель Надежда Вахрушева бадӟым пиналъёслэн группаязы анай кылын занятиос нуэ. Пумиськонэ со Арина нылыныз лыктӥз. Якшур-Бӧдьяысь 5-тӥ нылпи садысь крезьгуръя дышетӥсь Наталья Яковлева вуиз Арина но Сабина нылъёсыныз. Нылпи садазы со но воспитатель Роза Погосян сюлмысь тыршо пиналъёслы удмурт кылэз пыӵатон бордын. Нош 4-тӥ нылпи садысь крезьгуръя дышетӥсь Татьяна Головизнина ӟучлы быземын ке но, кузпалыз, пе, туж шумпотоз, 3-ез ик пиналъёссы удмурт кылэз дышетӥзы ке. Якшур-Бӧдьяын улӥсь Светлана Загребина музее 4-зэ ик нылпизэ вайиз. Озьы ик 4 пиналъёсыныз лыктӥз ёросысь «Удмурт Кенеш» огазеяськонлэн кивалтӥсез Вера Вахрушева. Пусъёно, тросэз семьяос гуртазы удмурт сямен верасько, озьы ке но пиналъёссы ӟуч палагес карисько. Соосъя анай-атай но ӵемысь ӟуч сямен вераськыны кутско. Малы озьы пӧрме?

Та юанлы котькыӵе валэктон шедьтыны луэ. Но ваньзы соглаш луизы кенеше ӧтем Роза Погосянэн: ӵем гинэ асьмеос, мумы-бубыос, азьтэмскиськом одӥг мар ке сярысь 2 пол — удмурт но ӟуч сямен — вераммы уг поты, дыр ӧвӧл, шуиськом. Но озьы луыны кулэ ӧвӧл, азьтэм луон медаз вормы, токма уг верало, анай кыл анай йӧлын ӵош пыӵа шуыса. Удмурт кылын ик чузъяськыны кулэ веттан гуръёс но, соку котькыӵе ӟучомем пинал но анай кылзэ гажалоз.

Котрес ӝӧк сьӧрын «Удмурт Кенеш» огазеяськонлэн кивалтӥсез Вера Вахрушева мадиз «Анайлэн веттан гурез» проект сярысь. Мадиз, кыӵе ужпумъёс сыло та проект но оглом удмурт нылкышноос азьын. Мыло-кыдо вераськиз Якшур-Бӧдья гимназиысь пичи классъёсты дышетӥсь Любовь Широбокова. Туэ сӥзьыл дораз, пе, удмурт кылэз валась 10 пала пинал лыктоз, тросэз — Якшурысь, кылемъёсыз — Выжоилысь, Кунянгуртысь но Якшур-Бӧдьяысь. Удмурт нылпиосын класс понна со ӧжыт. Угось райцентрын трос гинэ семьяос, кудъёсаз мумы-бубыос удмурт кылын верасько, но пиналъёссэс удмурт классэ малы ке уг сёто. Ёросысьтымы «Удмурт Кенешлэн» кивалтӥсез Вера Вахрушева та пумиськонэ Любовь Ивановнаез юри ӧтиз вал, анайёс соин мед тодматскозы но пиналзэс удмурт классэ мед сётозы шуыса. Ӧтемлэн пайдаез луиз. Кылсярысь, Татьяна Головизнина, улон интыез гимназилэсь кыдёкын ке но, соку ик мылкыд кариз отчы ветлыны, классэз учкыны, школаен тодматскыны.

Ужрадлэн кыкетӥ люкетаз Роза Погосян удмурт шудонъёс ортчытӥз. Татчы но ваньзы мыло-кыдо пыриськизы. Пичиез но, бадӟымез но. Озьы ик ваньзы ӵош инкуазьлы сӥзем бордгазет лэсьтыны пуксизы. Кык аресъем Захар Загребин но Айно Вахрушева бумагаез чебермазы, бадӟымъёсызгес писпуосты, шундыез, коркаез, бубылиосты, тылобурдоосты суредазы, мумыоссы чебер удмурт кылъёсты гожъяны юрттӥзы. Огъя туж яркыт суред пӧрмиз.

Пумиськонмы туж шуныт но пайдаё ортчиз. Мумы-бубыос малпанъёссэс шараязы, пиналъёс эшъяськизы, мукет семьяосын но удмурт кылын верасько шуыса, шумпотӥзы.

Нош та нуналъёсы тодмо луиз:  Головизнинъёслэн семьязы пизылэсь документъёссэ гимназиысь удмурт классэ сётэм ни. Ёросысьтымы «Удмурт Кенеш» понна со эшшо одӥг вормон — анай кылмес дышетӥсь пиналъёслэн лыдзы будэ. Бен, туж пичиен. Но ми оскиськом, калыкен пумиськылыса, кенешыса, трос лэсьтыны луоз на. Ми быгатом. Котрес ӝӧк сьӧрын анай-атайёсын пумиськонъёсты но азьланяз одно ик радъялом на. Малпаськомы, «Удмурт Кенеш» котыре тросгес егит удмурт семьяосты люкано. Анай кылмес утён ужын котькуд вамыш пайдаё луэ, сое лэсьтоно гинэ.

«Удмурт Кенеш» огазеяськонлэн

Якшур-Бӧдья ёросысь ёзэз.

 

 

 

Удмурт Дунне
By Удмурт Дунне Август 16, 2017 16:22