Юкаменск ёросысь возёсъёс ёрмо ужасьёслы

Удмурт Дунне
By Удмурт Дунне Июль 17, 2017 10:17

Юкаменск ёросын 2 СПК но 8 нимаз хозяйство. Ваньзы сямен секыт югдуре шедемын, ужасьёс тырмымтэен.

  Хозяйствоос гидъёслы кулэясько.

— «Родина», «Маяк» хозяйствоосы ужасьёс лыкто ик. Таосыз уго ёросын тужгес кужмоосыз,  нош мукетъёсыз шоры егитъёс но, шоро-куспо арлыдъемъёс но уг учкыло ни, —  вера Юкаменск ёрос администрациысь гурт удысъя управлениен кивалтӥсь Амир Бекмансуров. — Ижысь гурт удысъя академие направлениея дышетскыны пырисьёс но вань. Али Ёжгуртэ егит агроном бертӥз ик. Но мукет сыӵе берытскисьёс берло дыре ӧй вал.

Туннэ ёросысь хозяйствоосын ужасьёслэн шоро-куспо арлыдзы 45-50 арес. 70 аресъем механизаторзы но вань. Егитъёс уг лыкто бере, ужатӥськомы, шуэ А. Бекмансуров. Тужгес секыт югдуре вуэмын «Верх-Уни», «Урняк» но «Восход» хозяйствоос. Пудо сиён дасясьёс но, скал кыскисьёс но уг тырмо.

— Но пудозы сярысь сюлмаськисьёслэн йӧлзы люкаське. Кылсярысь, «Восходын» скалъёссэс али уен-нуналэн возь вылын возё. Озьы 4-тӥ июле котькуд скалзылэсь 22 литр басьтыны пӧрмытӥзы. Нош «Верх-Униын» но «Урнякын» 13 литр люкаськиз. Ёросын 3 сюрс 932 скал пӧлысь котькудӥзлэсь шорлыдын 16 литр кыскизы, — вера Амир Бекмансуров.

Ужасьёс тырмымтэен, хозяйствоослэн кивалтӥсьёссы тулысысен сӥзьылозь артысь гуртъёсысь но ёросъёсысь адямиосты медъяло ни. Азбаразы трактор я косилка возисьёс но колхоз бусыосы калым утчаса пото. Хозяйствоос но ог-огзылы юрттыны выро: я техниказэс, я воштос ёзъёссэс сёто. Но ваньмыз та дунтэк уг лэсьтӥськы. Берло 5 ар ӵоже банкрот кылисез ӧй вал ни, но уждунзэс будэтыны шугъясько. Кылсярысь, азьмынӥсь «Родинаын» ужасьёс шорлыдын 30 сюрс манет басьто ке, лябъёсаз 10 сюрс люкаське. Олокытысь олокинэ ужатыса ӧй улысалзы ке, гуртоос ик рос-прос тыршысалзы ке, уждунзэс будэтысалзы ни, шуэ Амир Бекмансуров.

— «Родина» лябӟыны кутскиз вал, — шуэ кивалтӥсь. — Хозяйство азьмынӥсьёс радэ потӥз 2009-тӥ арысен, соин Ильдар но Рустам Араслановъёс кивалтыны кутскем бере. Соос уго уксёзэс чурыт куто, кулэезъя быдто. Экономиказэс радъян юрттӥз 400 йырлы ферма ӝутыны. Ӟеч кидыс будэтонэн выро бере, али элитной хозяйство луыны тыршо.

Миым «Маякын», «Ежовоын», «Лучын» выльдӥськизы. Туэ «Нива» гид лэсьтыны медэ.  Хозяйствоос гидъёслы кулэясько. Но ферма пуктоно ке, отчы пудо пыртоно ке, соосты сюдон вылысь бусыосты паськытатоно. Нош кин гыроз, кин скал кыскоз? Ярам, туала 1 техника 2-3 ужез быдэстыны быгатэ, 2-3 механизаторез воштэ. Нош дояркаез кин воштоз? «Маякын» скал кыскисьёслэсь ужзэс капчиятон вылысь скал кыскон зал лэсьтӥзы, отчы компьютер пуктӥзы, табере дояркаослы котькуд скал сьӧры бызьылоно ӧвӧл — сюро ачиз лыктэ.

— Азьвыл зоръёс ужаны люкето вал, табере кадръёслы ёрмон итӥськиз, — шуэ Амир Бекмансуров. — 2015-тӥ арын зоремен бусыосы пырыны уг луы вал. Комбайнъёс выё, соосты тракторен кыскаса поттамы, бусыосы колеяос кылдӥзы. Трос уксё кошкиз ю тысез куасьтыны. Со но ӧз юртты — кот ю тысь сисьмыны кутскиз. Туэ но сыӵе ик югдур луиз ке, бусыосы нимысьтыз химия суретъёс пазяломы. Зэм, макем со ю тысьлэн ӟечлыкез, адямилэн тазалыкез вылын шӧдӥське — тодмо ӧвӧл. Но быдэс Европа озьы ужа. Миым «Верх-Уни» хозяйствоын сое эскеризы. Кизьыны бер потӥзы бере, лымы улэ кылёнлэсь кышказы. Химия ю-нянез ӝог куасьтӥз, эсьма, ӝог утялтӥзы, эстӥськон вылын шыръязы, тысь куасьтон но шертон комплексъёс но кулэ ӧй вал ни.

Туннэ ваньмыз сямен хозяйствоос сенажез клеёнкае биняло. Нимысьтыз техника басьтӥзы. Эсьма, бусыын ужасьёс ичигес кулэ. Технологиез чакласькод ке, ӟеч ческыт зыно сиён луэ, йӧл трос кыскыны юрттэ, шуо. Но тӧдьы клеёнка куакаосты гочатыны кутскиз. Вылаз пуксё, кокчало, пасяло. Пасям клеёнкаын сенаж уродме. Юрий Данилов фермер медъялляз нылпиосыз, куакаосты мед уллялозы шуыса. Но бусы кузя ялан уд бызьылы ук. Табере хозяйствоос вож буёло клеёнка вылэ выжизы — тазэ куакаос сокем уг синйылто.

Туннэ Гурт удысъя но сиён-юонъя министерство ёрос администрациосын ӵош егитъёсты гуртэ кельтон вылысь пӧртэм программаос утча-малпа. Министрлэсь ужзэ быдэсъясь Александр Прохоров верамъя, огез соос пӧлысь чакламын подъёмнойлэсь быдӟалазэ 200-сен 500 сюрс манетозь будэтыны. Но пыдлось гуртъёсы егитъёсты та гинэ кыскоз меда? Соин пичиоссэ хозяйствоосты бадӟымъёсыныз огазеян борды басьтӥськыны медо.

Елена Сараматова

Туспуктӥз А. Горбунов

 

Удмурт Дунне
By Удмурт Дунне Июль 17, 2017 10:17