Удмуртия пыре Россиысь 10 тужгес юись улосъёс пӧлы. Малы?

Удмурт Дунне
By Удмурт Дунне Июль 24, 2017 15:30

Югдур уг воштӥськы, пӧртэм ужрадъёс кутыса но. Та ужпум эскеремын Калыкез кышкытлыклэсь утёнъя советлэн кылем арня вискын ортчем кенешоназ. Отчы пыриськиз Удмуртилэн Тӧроезлэсь ужзэ быдэсъясь Александр Бречалов. Ӧтемын вал куд-ог министерствоослэн кивалтӥсьёссы, общественной ужен вырисьёс.

Кышкыт лыдпусъёс

Александр Бречалов пусйиз ужпумлэсь туж сюлмаськытӥсь луэмзэ. Шуиз: туэ ӝыны ар ӵоже гинэ юэм йырын 6 сюрс 800-лэсь ятыр йыруж лэсьтэмын. Со пӧлысь 31 процентэз — трос калык люкаськылон интыосын, 21 процентэз — семья куспын. Удмуртиын кадь трос юисьёс кылемын на Еврей автономной областьын, Архангельск, Вологда но эшшо 2-3 улосъёсын. Удмуртиысь Нацгвардилэн управлениез ивортэмъя, туэ гинэ законэз тӥяса вуз карисьёслэсь 35 сюрс «Боярышник» но мукет та выллем суретъёс, 60 тонна пала спирт таламын. 26 мурт кыл кутон улэ кыскемын.

А. Бречаловен верам лыдпусъёс борды аслэсьтыз ватсаз югдурез утёнъя министр А. Первухин:

— Туэ 55 адями виемын ни, со пӧлысь 43-ез йыруж юэм йырын лэсьтэмын. 2016-тӥ арын асьсэды быдтэмъёс пӧлысь 70 процентэз юэмын вал.  Сюрес вылысь туэ гинэ 4 сюрслэсь ятыр юэм водительёс ӝегатэмын, со пӧлысь 500-лэсь ятырез нырысьсэ ӧз сюре ни. Кудӟытӥсь суретъёсын кушласькисьёс уката трос Грак ёросын, солэсь бере уг кылё Кизнер, Кияса, Балезино, Сарапул ёросъёс.  Югдур пӧртэм ӧвӧл Ижысь Ленин ёросын но.

Аслаз сюлмаськонэз тазалыкез утёнъя министрлэсь ужзэ быдэсъясьлэн Андрей Воздвиженскийлэн но:

— Наркологияя диспансерын учётэ султэмын юонэн кушласькись 20 сюрс пала адями, со пӧлысь 5 сюрс 300-эз — нылкышноос. Туэ гинэ, кудӟытӥсь суретъёс юыса, 230 мурт шуге-леке вуиз, 105-сэ утьыны ӧз луы ни. Кылем арын таин сэрен 209 мурт улонэн люкиськиз.

План дасяно

Кун Кенешлэн депутатэз, Россиысь нылкышноослэн огазеяськонзылэн Удмуртиысь ёзэныз кивалтӥсь Зоя Степнова тодэ вайытӥз Россилэсь историзэ:

— 1913-тӥ-1925-тӥ аръёсы Россиын кудӟытӥсь юонэн вуз карыны лэземын ӧй вал — лулсэр висёнъёсъя больницаос соку ик буш кылизы. М. Горбачёв вакытъёсы юонэз эркын вузаны ӧз  луы — 2 ар куспын гинэ воргоронъёслэн улон вапумзы 37 процентлы йылӥз, тросгес нылпиос вордскыны кутскизы.

Туала вакытэ котькуд улос ас сяменыз нюръяськыны быгатэ юонэн — Россиысь законодательствоен та алэмын ӧвӧл. Озьы, кылсярысь, Ульяновск улосын субботае но арнянуналэ кудӟытӥсь юонъёсын вуз уг каро. Арня вискын но сое басьтыны луэ 20 часозь гинэ. Чечняын нуналаз 2 час гинэ вузало сое. Нош Якутиын чик уг вузало…

Элькунамы юонэн ум нюръяськиське, шуыны уг луы. Россиынлэсь азьло Кун Кенеш  законэн алӥз: кудӟытӥсь суретъёсты 22 часысен 10 часозь вузаны уг яра. Со сяна, 1-тӥ сентябре, 1-тӥ июне но 25-тӥ мае юонэн вуз карыны лэземын ӧвӧл. Соос борды туэысен ватсаськиз на 11-тӥ сентябрь.

— Ларёкъёсты но пытсам, кудӟытӥсь юонъёсын вуз каро шуыса, — вераз югдурез утёнъя министр. — Но табере куд-ог адямиос пырак машинаысь вуз карыны кутскизы. Сыӵе машинаосты шараяськом — квартираосазы лавка усьто. Вылаз ик, законэз тӥяса вуз карисьёслы штраф туж пичи. Озьы, кылсярысь, гуртын таӵеосты шараяськом, 500 манет тыриськон тупатӥськом… Нош ӵуказеяз ваньмыз азьло кадь ик кыле. Штрафез ог 100 сюрс манетозь йылэтысалмы ке, оло, кин но со малпаськонэ усьысал.

Кенешонэ люкаськемъёс огкылысь карисько: юонлы пумит законъёсты чурытомытоно.  Калык пӧлын юонлы пумит валэктон уж нуоно, ужрадъёс кутоно. Нош кинлэсь адӟем карыны вань ни. Кылсярысь, туэ 2-тӥ ползэ ялэмын  «Юисьтэм гурт» элькун вожвылъяськон — солэн кичӧлтӥсез луэ Россиысь нылкышноослэн огазеяськонзылэн Удмуртиысь ёзэз. Кужымзэ мертано кариськиз 19 ёросысь 44 муниципал кылдытэт, кылем арынлэсь со кӧнялы ке тросгес.

Юонэн нюръяськыны огез амал — спортэн вырыны луонлыкъёс кылдытон.

— Кыӵе со юисьтэм гурт? Отын асьсэос ужбергатӥсьёс пумит луо кудӟытӥсь юонъёсты вузаны, отын семьяосын ӧвӧл керетонъёс, отын тросгес вордско пиналъёс, улэп анай-атайёссы вӧзын сирота будӥсь нылпиос ӧвӧл, йыртэмасьёс ичи, — пусйиз Зоя Степнова. — Басьтом, кылсярысь, Красногорск ёросысь Валамаз черкогуртэз.  Отын нылпиослэн футболкаосазы гожтэмын «За трезвый Валамаз». Отын бырйизы  юисьтэм семьяез, юисьтэм ульчаез…

Юонлы пумит трос ужрадъёс ортчытӥсько Якшур-Бӧдья ёросын но. Та уж борды гижысь-пиньысь басьтӥськиз ёрослэн йырыз Владимир Ефремов.

— Тодӥ: ёросамы воргоронъёс шорлыдын 56 аресозь уло, кылсярысь, Пушкарёво гуртын ик 50 аресъемъёс пӧлын 100 нылкышнолы 30 гинэ воргорон,  — шуиз Владимир Георгиевич. — Ёросамы лулсэр висёнъёсъя мӧйыослы 3 но нылпиослы 1 диспансер…

Туннэ ёросын юонлы пумит асьсэлэн программазы юнматэмын. Дасязы сюлме пырись фильм, кылдытӥзы «Возьыт пул» — отчы  пусйыло кудӟытӥсь юонъёсты законэз тӥяса вуз карисьёсты. Туэ ёросысь вань поселениос пыриськыны мылкыд каризы «Юисьтэм гурт» элькун вожвылъяськонэ.

— Одӥг пол гинэ ӧй вера ни: юонэн нюръяськонъя опытэнымы пыр-поч тодматыны ми дась,  — пусйиз Владимир Ефремов. Но туннэ нуналлы таӵеос ӧз сюре на, пе.

Александр Бречалов вань верамъёсты сак кылзӥз. Кенешон пумын йылпумъянъёс лэсьтӥз: юонэн нюръяськоно! Ужпум борды дырын-дырын гинэ ум берытскылэ. Нош ик таӵе кенешон, толэзь ортчыса, радъялом. Отчыозь вань муниципал кылдытэтъёслэн йыръёссы кудӟытӥсь юонъёсын нюръяськонъя план гожтыны кулэ.

Элина Кумачёва

Туспуктӥз А. Горбунов

 

Удмурт Дунне
By Удмурт Дунне Июль 24, 2017 15:30