Сыктывкарын ортчоз фин-угор калыкъёслэн ӧтчамзы

Удмурт Дунне
By Удмурт Дунне Июль 12, 2017 10:20

Ӝоген, 27-тӥ-30-тӥ сентябре,  Сыктывкарын ортчоз фин-угор калыкъёслэн ӧтчамзы. Кыӵе ужпумъёс отын ӝутэмын луозы но маин паймытозы удмуртъёс? Та сярысь вераськон мынӥз «Удмурт Кенешлэн» съездлы дасяськон оргкомитетаз.

Оглом таиз съезд, мукет аръёсы ортчытэмъёсыныз ӵошатыса, ӧжытгес калыкез люкалоз. Мугез коньдон ужпумъёсын герӟаськемын.

«Удмурт Кенеш» огазеяськонлэн кивалтӥсез Татьяна Ишматова верамъя, ӧтчамын 5 секция ужалоз. Шумпотымон, удмуртъёс ваньмаз сямен валтӥсь докладъёс лэсьтозы. Кылсярысь, кыллы, дышетонлы но наукалы сӥзем секциын валтӥсь доклад лыдӟоз УдГУ-ысь Удмурт филологияя, финно-угроведениея но журналистикая институтлэн директорез Наталья Кондратьева, культуралы сӥзем секциын — «Лудорвай» музей-заповедниклэн кивалтӥсез Татьяна Шкляева,  инкуазез но тазалыкез утёнъя секциын — медициная академилэн ректорез Николай Стрелков, егитъёслы сӥзем секциын — Кун Думаысь депутат Алексей Загребин, иворъёсты вӧлмытонъя секциез нуоз «Удмуртия» ТРК-ысь анай кылъя передачаос понна кыл кутӥсь Сергей Касаткин. Съезд дыръя ик котрес ӝӧк сьӧрын вераськон мыноз социальной партнёрство но ужбергатон сярысь.

Оглом таиз съезд, мукет аръёсы ортчытэмъёсыныз ӵошатыса, ӧжытгес калыкез люкалоз. Мугез коньдон ужпумъёсын герӟаськемын. Озьы ке но делегатъёсын но наблюдательёсын, ӧтем куноосын ӵош 300 пала адями луыны кулэ.

Нялтас вераса, фин-угор калыкъёслэн нырысетӥ ӧтчамзы ортчиз вал 1992-тӥ арын Ижын. Сое радъян сярысь малпанэн нырысь ик потӥзы удмуртъёс. Озьыен, туэ фин-угор эшъяськонлы тырме 25 ар. Съездын аспӧртэм юбилейлы сӥзем доклад лэсьтоз «Удмурт Кенешлэн» кивалтӥсез Татьяна Ишматова.

Та нуналъёсы «Удмурт Кенешын» рос-прос малпасько: кинэ фин-угор съездэ келяно. Республикаысьтымы удмуртъёслэн нимынызы ӧтчаме пыриськоз  11 делегат но 8 ӧтем куно. «Кенешчиос» огкылэ вуизы: делегатъёс пӧлысь ӝыныез ёросъёсысь луыны кулэ.

Елена Васильева

 

 

Удмурт Дунне
By Удмурт Дунне Июль 12, 2017 10:20