Шаркан ёросын ортчиз фермерлэн нуналэз

Удмурт Дунне
By Удмурт Дунне Июль 27, 2017 21:43

27-тӥ пӧсьтолэзе Тол бабайлэн усадьбаяз люкаськизы шаерысьтымы 200-лэсь трос фермеръёс но крестьян хозяйство возисьёс. 

Тол бабайлэн усадьбаяз котырес ӝӧк радъяськиз.

 

Вазь ӵукна ик куноос вуизы Шаркан ёросысь Николай Собин азьмынӥсь фермер доры. Тодматскизы солэн хозяйствоеныз но ужан амалъёсыныз. Бӧрысь Тол бабайлэн усадьбаяз котырес ӝӧк радъяськиз. Солэн ужаз пыриськизы элькунысьтымы фермеръёс но кивалтӥсьёс — гурт удысъя но сиён-юонъёсъя министрлэсь ужзэ быдэсъясь Александр Прохоров, Кун Кенешысь гурт удысъя, музъем кусыпъёсъя, инкуазь узырлыкъёсъя но инкуазез утёнъя ялан ужась комиссиен кивалтӥсь Владимир Варламов, Удмуртиысь фермеръёслэн огазеяськонэнызы кивалтӥсь Михаил Лебедев но мукетъёсыз.

Вераськон лэчыт пӧрмиз. Фермеръёс сюлэмшугзэс веразы пудоез вандон интыос пумысен, озьы ик трос юанъёс кылдӥзы ветеринар ужкагазъёсын герӟаськем «Меркурий» программа ласянь, угось 2018-тӥ арын 1-тӥ толшорысен вань фермеръёсты но крестьян хозяйствоосты одно ик со программаен ужаны косозы. Со сяна, вераськон мынӥз йӧл дунъёс но субсидийёс сярысь.

Азьмынӥсь фермеръёсты данъян граммотаосын но таукаронъёсын пусйизы.

Михаил Лебедевлэн верамезъя, фермеръёслы асьсэлэсь кооперативъёссэс кылдотоно, валче кариськыса, сиён-юонэз переработь карон борды басьтӥськоно. Люкаськемъёс пуктӥзы: ужрадын чузъяськем дэмланъёсын рос-прос ужано, эскероно но резолюция гожтоно, сое Россиысь гурт удысъя министерствое  келяно.

Собере фермеръёслэн нуналзылы сӥзем сӥё-дано ужрад ортчиз, азьмынӥсь ужасьёсты данъян граммотаосын но таукаронъёсын пусйизы. Вуоно арын Фермерлэн нуналыз Воткинскын ортчоз.

Наталия Самсонова

Туспуктэм: udmurt.ru

Удмурт Дунне
By Удмурт Дунне Июль 27, 2017 21:43