Шаркан ёросын ӟичыос курегъёсты поттыло

Удмурт Дунне
By Удмурт Дунне Июль 25, 2017 15:42

Шаркан ёросысь Таклё, Байбек гуртъёсысь калык нерад луиз ини ӟичыосын сэрен. Кескич пӧйшуръёс гидъёсысь курегъёсты поттылыны дышиллям.

 

— Гуртамы февраль толэзьысен одӥг ӟичы пыраны кутскиз, — вера Таклё гуртлэн старостаез Светлана Аверкиева. — Май толэзьысен лушкаськон учыръёс эшшо но йылӥзы. Пӧйшур, 6 пиоссэ поттыса, капчи сиён доры уллёзэ но табере нуллэ ни. Та нуналлы ог 50 курегъёсмес изъянтӥзы ини. Кӧберзы но ӧвӧл, нуназе куазен гуртэ пыро. Тани алигес гинэ бускельёсмы веразы, ульчаын будӥсь кузь турын пӧлы ватӥськыса улэмзэ адӟизы шуыса, мукетъёсыз бакча бертӥ ветлэмзэ синйылтӥллям. Гуртоосмы курегъёссэс воляе лэзьямысь ик дугдӥзы. Но толалтэ но, гужем но бурдоосты пытсэт сьӧрын возёд шат? Соин ӧжытлы ке но соосты азбаре поттылыны тыршиськом. Но соку но сак кариськытэк ӧвӧл. тани гуртысь ик нылкышно 15 минутлы курегъёссэ азбаре лэзем, со куспын ӟичы одӥгзэ курегзэ ӧвӧлтэм карем ни. Гуртамы милям пенсионеръёсгес уло, скал вордыны секыт ни, сӥльлы чипы-курег ке но вордыны йӧндыро. Толэзьем чипыосты 280 манетэн басьтӥзы вал. Нош куд-ог хозяйствоосын 10 курегзы быриз ни. Ӟичыос, музъемез копаса, гидэ пыро.

Шаркан ёросысь пӧйшу-ран хозяйствоен кивалтӥсь Виктор Наговицын верамъя, али ӟичыос вылэ пӧйшураны лэземын ӧвӧл. Но урмон медаз аля шуыса, висись пӧйшуръёсты ыбылыны яра ик. Сыӵе разрешение сётэмын гуртысь 55 но 60 аресъем воргоронъёслы. Но гужем куазен гуртысь адямилэн ӟичыос сьӧры бызьылыны дырыз  ӧвӧл. Со сяна, кызьы вера В. Наговицын, пӧйшурасьёс кышкало, кузь турын пӧлысь, ӟичыез ыбиськом кожаса, кытӥ ӧвӧл адямиез но сӧсыртыны шедьтозы шуыса. Но та арня куспын гуртэ поталом, пӧйшурасьёсын кылдэм югдур пумысен кенешом, шуиз Виктор Евгеньевич.

Ӟичыосты, оло, пуныос уллясалзы, но пуныосты воля возьыны лэземын ӧвӧл, ваньмыз думылэмын. Соин но ӟичыос дасез вылын улыны дышизы, вылды.

Шӧкыч уром

 

 

 

Удмурт Дунне
By Удмурт Дунне Июль 25, 2017 15:42