Шаркан ёрос: 1 сюресэз 2 пол лэсьтыны коньдон ӧвӧл

Удмурт Дунне
By Удмурт Дунне Июль 20, 2017 14:28

Кылем арня пумын Удмуртилэн Тӧроезлэсь ужзэ быдэсъясь Александр Бречалов ветлӥз Шаркан ёросэ но пумиськылӥз кӧня ке гуртъёсысь калыкен.

Шаркан ёролсысь вортчаос А. Бречаловен пумиськизы школа садзы азьын.

Эх, сюресъёс…

Тросэз шарканъёс ӝожтӥськизы урод сюресъёссы вылэ. Кылсярысь, Кулак-Куӵес гуртын выль сюрес вӧлдӥллям. Калык сое кема витиз. Но ужъёс мыныку ай, ваем щебень пичиен-пичиен ышылыны кутскиз. Соин гурезе тубонэ вӧлдыны щебень ӧз тырмы. Сюресэз лэсьтӥсьёс ужзэс быдэстӥзы но кошкизы, нош гурт калык зоро куазен Кулак-Куӵесысь мырдэм потэ — горд сюй напырӟе.

Сюрес урод ке но, матысь дыре тупатъян ужъёс ортчытыны отын чакламын ӧвӧл. Ёросысь мукет сюресъёс черодзэс возьмало. Кылсярысь, Ляльшурысен Мувырозь.

Кулак-Куӵесэ сюресэз тупатыны луысал, лушкам щебень интыяз берытскысал ке.

— Сое кин ке асьтэ палась ик капыръяз, луоз, — шуиз А. Бречалов. — Гуртъёс пичиесь бере, отын ваньмыз син шорын, ог-огдэс адӟытэк уд улӥське. Асьтэос ик тодӥськоды, дыр, кытчы луиз щебеньды. Соин ик, кин сое аслыз кариз, ӵектӥсько сюрес доры ик берыктыны мон та юан борды басьтӥськемлэсь азьвыл.

Сюрес  курыса, вазиськизы Шарканысь выль посёлоке пуктӥськемъёс но.

— Тӥледын та юанъя ми кенешимы ни, — шуиз Шаркан ёрослэн йырыз Василий Муклин. — Ульчаетӥды газ лэземын, но вань бускельёсты со борды ӧз на шедьытӥське. Ми али сюрес тӥледлы вӧлдом, нош кӧня ке улыса, сое нош ик копано луомы ук, ульчаысьтыды мукет семьяос газ пыртыны кутскизы ке.

— Югдур зэмзэ но таӵе ке, мон Василий Геннадьевичен быдэсак соглаш, — шуиз Александр Бречалов. — Нырысь огзэ ужез йылаз-пумаз вуттоно, собере — мукетсэ. 1 сюресэз 2 пол лэсьтыны коньдон ӧвӧл.

Шарканысен Быгыозь сюрес вань ке но, гуртоослы райцентре вуыны капчи ӧвӧл. Егитъёс машинаосын ветло, нош мӧйыослы нялтас ветлӥсь транспорт утчано луэ. Азьвыл гуртозязы автобус ветлӥз. Но кемалась ӧвӧл ужбергатӥсьсы автобус лэзьямысь дугдӥз — калык уг люкаськы, пе.

— Та рейс тӥледлы кулэ ке, автобусэн ветлӥды ке, ми тыршомы сое берыктыны, — шуиз А. Бречалов.

Нош Кулак-Куӵесысь Вортчаозь школа автобус ветлэ. Но анай-атайёс пиналъёссэс нылпи садэ пыдын нуллоно луо. Угось автобусэ школьникъёсты гинэ пукто, школае ветлӥсьтэм тэшкылиосыз — уг.

— Азьвыл гуртамы ик нылпи сад вал, — вера Кулак-Куӵесысь огез егит анай. — Сое пытсакузы, шуизы, нылпиосмес Вортча садике автобусэн вуттозы. Ми пиналъёсмес алвыламы пуктыса нуллысалмы, озьы ветлыны яра ук! Но со понна автобусмес переоборудовать кароно.

А. Бречалов та юанэз Транспортъя но сюрес хозяйствоя министерствоез эскерыны косӥз.

Нюлэс вань, пу ӧвӧл

Мукетыз бадӟым ужпум — газ пыртон. Тросаз гуртъёсын пуэн эстӥсько, нош пу шедьтыны капчи ӧвӧл.

— Тэльёсын трос миллион манет тыр куасьмем писпуос сисьмо, нош калык сое басьтыны уг быгаты, — ӝожтӥсько шарканъёс.

— Миллионъёс гинэ ӧвӧл, уно миллиард манет озьы ыше, — шуэ Александр Бречалов. — Ми та шугъяськонэз адӟытэк ум улӥське, со Россиысь унояз улосъёсын туж лэчыт сылэ. Сое сэрттон понна Нюлэс кодексэ воштонъёс пыртоно. Али ми Нюлэс хозяйствоя министерствоенымы та юан бордын ужаськом. Туж оскисько, матысь дыре наделъёс люкылыны быгатомы шуыса. Юанэз сентябрёзь сэрттомы. Толалтэ пуды луоз, — оскытӥз Удмуртилэн Тӧроезлэсь ужзэ быдэсъясь.

Трос юанъёс вал улон интыос пумысен. Выль улон сэрегъёс возьмало аварийной коркаосын улӥсьёс, трос нылпиё семьяос, сирота нылпиос. Корка пуктонлы коньдон уг тырмы, соин черодэз туж кема возьмано луэ.

— Улон инты басьтыны ипотека бадӟым процентэн сётӥське, уноез сое курыны уг дӥсьто, — шуэ А. Бречалов. — Ми малпаськиськом процентэз пичигес кельтон пумысен, но таиз ар пумозь воштӥськонъёс уз луэ на.

Вортчаысь егитъёс ӝожтӥськизы, гуртазы корка пуктэмзы уг луы шуыса.

— Планъя гурт котырысь музъем гурт удысэн выронлы чакламын, пуктӥськонлы сое выжтыны дуно усёз, — шуо гуртоос. — Нош юаськисьёс — корка ӝутыны мылкыд карисьёс — вань.

— Жаляса верано, вань шуг-секытъёсыз огвакытэ сэрттыны коньдонмы ӧвӧл, ваньзэ тупен-тупен сэрттоно луоз, — валэктӥз А. Бречалов.

Тупен-тупен сэрт-тӥськоз связен но Интернетэн герӟаськем шугъяськон но. Туннэ нуналлы Шаркан ёросын вань на гуртъёс, кытын мобильной телефон воксё уг куты.

— Матысь 2 ар ӵоже ми тыршомы югдурез воштыны, — шуиз Александр Бречалов. — Али та пумысен операторъёсын кенешонъёс мыно ни, матысь дыре шаерамы кылдозы выль вышкаос.

Нялтас вераса, огез соос пӧлысь сылоз Вортчалэсь кӧня ке иськемын. Но ёросысь кивалтӥсьёс лыдъяло, Вортча дорозь связь уз сузьы. Интызэ кӧня ке воштысалзы ке, связь ваньмыз дорозь вуысал.

А. Бречалов оскытӥз, та пумысен операторен кенешозы шуыса.

Ичиялоз-а кредит?

Та нуналэ ик Удмуртилэн Тӧроезлэсь ужзэ быдэсъясь вуылӥз Шарканысь трикотаж фабрикае. Киужъёссэс возьматэмзы бере вуриськисьёс веразы: ужмес паськытатон вылысь милемлы выль тӥрлык кулэ, но кредит туж бадӟым процентэн гинэ сёто. Али фабрикалэн вань ини мукет басьтэм кредитъёсыз, соин эшшо огзэ со уз ни вормы.

А. Бречалов шуиз, огазеяськон федерал программае пыриськины быгатоз. Со сяна, оскемзэ вераз, Сбербанклэн кивалтӥсьёсыз, югдурез валаса, кредитлэсь процентсэ кулэстозы шуыса. Шаркан фабрикалы но куд-ог мукет та выллем огазеяськонъёслы со туж бадӟым юрттэт луысал.

Гажаса пумитало

Палэнысь куноосты пумитало Быгы гуртысь Удмурт культурая центр но Шарканысь Тол бабайлэн резиденциез. А. Бречалов со интыосыз палэнэ ӧз кельты.

Удмурт культурая «Быгы» центрлэн кивалтӥсез Жанна Ермолаева верамъя, кылем арын доразы 5 сюрс пала куноос вуылӥзы, туэ та лыдпус эшшо бадӟымгес луыны быгатоз. Тужгес трос калык лыктэ «Быг-быг» фестивале. Со туэ 4-тӥзэ ортчиз ини, одӥг площадкае 3 сюрс пала муртэ огазеяз.

Но куноос вуо ке, соосты интыяны нокытчы. Ярам, гуртоос валало, туристъёсты асьсэ доры кӧлыны пырто.

— Но ялан озьы кареммы уз луы: котькинлэн аслаз улонэз, сюлмаськонъёсыз, ужъёсыз вань, весь куно пумитаса гинэ уд улы, — шуэ Жанна Ермолаева. — Умой луысал, кунокуамы ке кылдысал.

— Азинскыны мылкыдды вань бере, юрттом, — шуиз А. Бречалов. — Дасялэ вуоно кунокуадылэсь  проектсэ.

Тол бабайлэсь юртъерзэ котыртэмез бере А. Бречалов маунтинбайкъя (горной велосипедэн ворттылон) ӵошатсконъёсы пыриськиз, нош бӧрысь «Эктоника» дискотекае лыктэм егитъёсын пумиськылӥз.

Журналистъёсын кенешонын со шуиз:

— Ёросын золэсь кивалтӥсьёс. Соос азинскыны выль луонлыкъёс утчало. Оскон кылдэ, Шаркан палъёсын ми трос ужез берыктыны быгатомы шуыса. Со туризмъя огез центр луыны кулэ. Мон ӧй малпа вал, татын ваньмыз сыӵе усто лэсьтэмын шуыса!

Елена Рябина

Туспуктӥз Э. Карипов

 

Удмурт Дунне
By Удмурт Дунне Июль 20, 2017 14:28