Россиысь калыкъёс — нюлэс сяськаос

Удмурт Дунне
By Удмурт Дунне Июль 17, 2017 11:10

Россиысь егитъёслэн пӧртэм огазеяськонъёсысьтызы азьветлӥсьёс Иже дышетскыны вуылӥзы. Соосты 2-тӥзэ ни огазе люказ шаерысьтымы «Вместе» ассоциация.

Егитъёс Иже лыктӥзы олокыӵе но малпанъёсынызы, проектъёсынызы, шугъяськонъёсынызы. Пӧртэм удысъёсысь специалистъёс но экспертъёс кӧня ке нунал ӵоже тыршизы соослы визь-кенешъёс сётъяны, проектъёссэс тунсыкогес карыны, валэктӥзы, кытысь утчано коньдон малпанзэс улонэ пыӵатон понна.

Егитъёс пӧртэм выжыосысь вал бере, веразы, мар туннэ тужгес сюлмаськытэ соослэсь калыксэс, кыӵе валтӥсь ужпумъёс сыло соослэн огазеяськонъёссы азьын.

Алтынай Пустогачева, Алтай:

— Мон челкан выжыысь, Сибирь палъёсысь. 2010-тӥ арын ортчытэм лыдъян-чотанъя, ми 1 сюрс 181 кузя гинэ на. Но милям улэммы, азинскеммы потэ.

2014-тӥ арысен, «Букварьмы» потэм бере, челкан кылын гожъяськыны луэ ни, отчыозь книгаос поттыны шугъяськылӥм. Али но челкан кылын кыӵе ке книга вордске ке, милемлы со туж бадӟым шумпотон ни. Калыклэн узырлыкез возиське фольклорын. Туэ ми дасяськом челкан визькылъёсын, поговоркаосын но мадиськонъёсын книга.

Вотэсын кылдытӥм огинъёс, соос пыр кусып возиськомы челкан егитъёсын. Уноез постъёсмы #изучаемроднойязык хэштеген мыно, группаосамы ӵемысь луыло пӧртэм форумъёсысь но конференциосысь иворъёс, ортчыло вожвылъяськонъёс.

Туэ гужем, 9-тӥ гудырикошконэ, малпаськомы Дуннеысь выжы калыкъёслэсь нуналзэс пусйыны. Оскиськом, Курмач-Байгол черкогуртэ вань челканъёс лыктозы шуыса. Луозы кырӟанъёс-эктонъёс, концерт, вожвылъяськонъёс но ӵошатсконъёс.

Шумпотымон: али пӧртэм калыкъёс ог-огенызы тупаса, эшъяськыса уло. Алтайын пумитаны луэ ӟучъёсыз, алтаецъёсыз, казахъёсыз, нош пичи выжы калыкъёс пӧлысь — челканъёсты, кумандинъёсты, тубаларъёсты, теленгитъёсты но мукетъёссэ. Кун кивалтэт ласянь ваньмы ик юрттэт басьтӥськом.

 

Виктория Габова, Коми:

— Мон Ухтаысь Б. Шахов нимо коми культурая центрын егитъёсын ужасько. Уно ужрадъёсы, форумъёсы, фестивальёсы вуылӥсько. Та форумысен проектъёсы шоры мукет паласен учки. Кылсярысь, «Коми МАФИЯ» проектэ туж усто бизнес-проект луыны быгатэ вылэм.

Вераськон мынӥз брендъёс пумысен. Валай: Комилэн брендэз ӧвӧл. Пельнянь — огъя сиёнмы ке но, со Удмуртилэн брендэз ни. Перепечъёсты выллем сарваосмы вань ке но, соосты данъяны ноку ӧм тыршылэ. Милям шаермы нюлэс кушысь сяська выллем, дыр: сяськалы маке шат, адӟо сое яке уг. Со ас понназ пушъе. Коми шаер но ас понназ улэ. Брендэз ӧвӧл ке но, уг кайгыры.

Тросэз ӝожтӥськизы, котыразы егитъёсты люкамзы уг луы шуыса. Мынам сыӵе шугъяськонэ ноку ӧй вал, малы ке шуоно сыӵе ужпум азям ноку ӧй пуктылы. Ну, огазеяй, пе, трос егитъёсты, собере нош мар соосын кароно? «Томулов» огазеяськонамы (Ухтаысь коми егитъёслэн огазеяськонзы, Виктория Габова — кивалтӥсез — авт.) ми ум кырӟаське, ум эктӥське, но шумпотыса пыриськиськом коми КВН-э. Дасям номеръёсынымы пӧртэм гуртъёстӥ но каръёстӥ ветлӥськом, ӝоген быдэс Комиез озьы котыртомы ни.

Озьы ке но ӟучъёс шуо: тӥледыз, комиосыз, Ухтаын уд но адӟы, уд но кылы. Ма, карамы валтӥсь праздник но бигер Сабантуй луэ — «Паськыд гажа улича» уг! Сыӵеесь ми — шыпытэсь, возьдаськисесь.

 

Корюн Оганнисян, Удмуртия:

— Мон кивалтӥсько Глазовысь армян егитъёслэн «Масис» огазеяськонэнызы, солы туэ 3 ар тырмиз. Валтӥсь ужпуммы — кылмес но культурамес утён но азинтон, калыкез сям-йылолъёсынымы, кылбурчиосынымы, крезьгурчиосынымы тодматон. Потаськом ӟучъёс, бигеръёс, бесерманъёс доры. Ӵемгес ӧтчало нылпи садъёсы но школаосы. Котькытын туж шуныт пумитало. Бӧрысь дышетӥсьёс но директоръёс выльысь жингыръяло на, 2-тӥзэ но, 3-тӥзэ но куное ӧтё.

Жаль, мукет калыкъёс вӧзын улыса, ми соос сярысь туж ӧжыт тодӥськом. Пумиськонъёсамы тросэз шуо: нош ми ӧм тодэ, армянъёс православноесь шуыса, котьку кожамы: соос мусульманъёс. Но зэмзэ ке, армянъёс 301-тӥ арын чукиндыриськизы (христианствое выжизы) ни.

3 ар ужатозям, та выллем дышетсконэ нырысьсэ ветлӥ, тунсыко адямиосын тодматски, куд-ог ӵектонъёссэс аслым гожтыса кельтӥ. Кин тодэ, оло, азьланяз мае ке асьме ужамы кутыны быгатомы.

Елена Рябина

Удмурт Дунне
By Удмурт Дунне Июль 17, 2017 11:10